Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

[p. *268]

1

⁺ALdus soo is dat conincrijck vast gheworden in Salomons hant, ende hy is door swagerscap vereenicht met Pharao den coninc van Egipten, want hy heeft sijn dochter te wijue ghenomen, ende hy heeftse in Dauids stadt ghebracht, tot dat hi sijn huys ghemaect hadde dat hi timmerde, ende des Heeren huys ende die mueren van Ierusalem int ronde,

+ A

2

Niet te min het volck offerde op die hoochden want des Heeren tempel en was noch niet ghesticht tot op dien dach toe,

3

Ende Salomon heeft den Heere lief ghehadt, wandelende in Dauid sijn vaders gheboden, wtghenomen dat hy offerande dede op die hoochden ende ontstack welriekende offerande,

4

Hierom is hy ghegaen te Gabaon om dat hy daer soude offerande doen (want dat was die meeste hoochde) duysent slachofferanden offerde Salomon op dien outaer te Gabaon,

5

Maer die Heere openbaerde Salomon door eenen droom des nachts segghende. Begheert dat ghy wilt, dat ick v dat gheue,

6

Ende Salomon seyde Ghy hebt met uwen dienaer Dauid mijnen vader groote bermherticheyt ghedaen, ghelijck hy voor v aensicht ghewandelt heeft in die waerheyt ende rechtuerdicheyt, ende met rechter herten met v, ghy hebt hem v groote barmherticheyt bewaert, ende hebt hem eenen sone ghegheuen sittende op sijnen throon ghelijck dat heden is,

7

⁺Ende nv o Heere Godt ghi hebt uwen dienaer doen regneren voor mijnen vader Dauid, maer ick ben een cleyn kindeken, ende niet verstaende mijnen wtganck ende inganc,

+ B

8

Ende v dienaer is int midden van een volck dat ghy vercoren hebt, een volck dat sonder eynde is, dwelc men tellen noch rekenen en can om der menichten wille,

9

Hierom suldi uwen dienaer gheuen een leerbaer herte, dat hy v volck ordeelen mach, ende ondersceyden tusschen goet ende quaet, want wie soude dit volck connen gheordeelen, dit v volck soo groot van ghetale?

10

Ende dit woort heeft voor den Heere behaechlijck gheweest, dat Salomon aldusdanich dinck begheert hadde,

11

Ende die Heere heeft tot Salomon gheseyt. Om dat ghy dit woort begheert hebt, ende voor v niet en hebt begheert veel daghen, noch rijcdommen, oft die zielen van uwen vianden, maer hebt voor v begheert wijsheyt om dat recht ordeel te ondersceyden,

12

siet ic heb v ghedaen nae uwe woorden, ende ick heb v ghegheuen een wijs ende verstandich herte, alsoo grootelijck datter niemandt ws ghelijck voor v gheweest en is, noch nae v opstaen en sal,

13

Maer noch heb ic dese dinghen (die ghy niet begheert en hebt) v oock ghegheuen, te weten rijckdommen ende glorie, also datter niemant vanden coninghen ws ghelijc en sal gheweest hebben in allen voorledenen daghen,

14

⁺Maer eest dat ghy wandelt in mijn weghen, ende dat ghy mijn gheboden ende insettinghen onderhoudet, ghelijc v vader ghewandelt heeft, soo sal ick v daghen lanck maken,

+ C

15

Aldus is Salomon ontspronghen, ende hy heeft verstaen dattet eenen droom was, ende als hy te Ierusalem comen was, soo heeft hi ghestaen voor die arcke des Heeren, ende heeft heelbrantofferanden gheoffert, ende hy heeft vreedsamighe slachofferanden ghedoot, ende eenen grooten maeltijt ghegheuen alle sijnen dienaers.

16

Doen sijn daer comen twee ghemeyn vrouwen tot den coninck, ende hebben voor den coninck ghestaen

17

vanden welcken die een seyde. Ick bidde v mijn heere, ick en dese vrouwe woonden in een huys, ende ick hebbe by haer ghebaert in een slaepcamer,

18

Maer ten derden daghe nae dat ick ghebaert hadde soo heeft dese oock ghebaert, ende wij waren tsamen, ende niemant anders en was int huys met ons, wtghenomen ons beyden,

19

Maer deser vrouwen sone is des nachts ghestoruen, want si heeft dien voorwaer al slapende doot gheleghen,

20

Ende opstaende in des middernachts stillicheyt heeft sij mijnen sone ghenomen van mijnder sijden uwer dienerssen doen ick sliep, ende dien in haren scoodt gheleyt, maer haren sone die doot was heeft sij in mijnen schoot gheleyt,

21

Ende als ic des morghens opghestaen was om mijnen sone te sooghen, so sachmen dat hi doot was ende doen ick dien naerstelijcker besach metten claren lichte, soo heb ick beuonden dat dit mijn sone niet en was den welcken ick ghebaert hadde,

22

⁺Ende die ander vrouwe antwoorde. Ten is alsoo niet ghelijc ghi segghet maer v sone is doot, ende den mijnen is leuende, Die ander seyde daer teghen. Ghy liecht, want mijn sone leeft, ende v sone is doodt, Ende in deser manieren soo keuen sij voor den coninck,

+ D

23

Doen seyde die coninck. Dese seyt, Mijn sone leeft, ende v sone is doodt, Ende die heeft gheantwoort. Neen, maer v sone is doot, ende mijn sone is leuende,

24

Hierom seyde die coninck. Haelt my een swaert, Ende doen sij een swaert voor den coninck ghebracht hadden.

25

Deylt (seyt hy) het leuende kint in twee stucken ende gheeft der helicht der eender, ende dander helicht der ander,

26

Maer die vrouwe (wiens sone dat leefde) seyde tot den coninck, want haer binnenste waren beweecht ouer haren sone. Ic bidde v heere, gheeft haer dat leuende kint, ende en wilt dat niet dooden, Maer die ander seyde daer teghen. Het en si mijne nocht uwe, maer latet deylen,

27

Die coninc heeft gheantwoort ende gheseyt. Gheeft deser het leuende kint ende en laet dat niet dooden, want dit is sijn moeder,

28

Aldus heeft gheheel Israel ghehoort het vonnisse dat die coninc ghevonnist hadde, ende sij hebben den coninck ontsien, siende dat Gods wijsheyt in hem was om recht te doen.