Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺MAer Dauids daghen sijn aencomen dat hy steruen soude, ende hy heeft Salomon sijnen sone beuolen segghende.

+ A

2

Ic gaen den wech in van alle eertrijc. Versterct v ende weest een man,

3

Ende wacht dat ghy die gheboden des Heeren ws Gods onderhoudt, dat ghy wandelt in sijn weghen ende sijn ceremonien bewaert, ende sijn gheboden ende rechten ende ghetuyghenissen, ghelijck in die wet van Moyses ghescreuen is, dat ghi moecht verstaen al dat ghi doet, ende werwaerts dat ghy keeren sult,

4

Op dat die Heere sijn woorden vast make, die hy van my ghesproken heeft segghende. Eest dat v sonen mijn weghen bewaren, ende voor my wandelen inder waerheyt, met allen haer herte, ende met allen haer ziele, so en sal v gheen man af ghenomen worden vanden conincklijcken stoel van Israhel,

5

Ghy weet oock wel wat Ioab die sone van Saruie mi ghedaen heeft, Wat hy ghedaen heeft den twee ouercapiteynen des heyrs van Israel, Abner Ners sone ende Amasa Iethers sone die welcke hy ghedoodt heeft, ende dat orloochs bloet inden vrede ghestort, ende heeft des strijts bloet in sijnen ridders gordel ghedaen die om sijn lendenen was ende in sijnen schoen die aen sijnen voet was,

6

⁺Daerom suldi doen nae v wijsheyt, ende ghi en sult sijn grijs hayr ter hellen niet brenghen met vreden,

+ B

7

Maer Berzellai des Galaaditers sonen suldi dancbaer wesen, ende sij sullen aen v tafel eten, want sij quamen mi te ghemoete doen ick vluchte van Absalom ws broeders aensicht,

8

Oock hebdi by v Semei den sone van Gera een sone Gemini van Bahurim, die my vermalendijt heeft met een seer quade maledictie, doen ick ten heyrlegher ghinck, Maer aenghesien dat hy nederwaerts quam my te ghemoete doen ick ouer die iordane ghinck, ende ic hem doen heb ghesworen by den Heere segghende. Ick en sal v metten swaerde niet dooden,

9

en laet hem ghy niet onghepuniert blijuen, Maer ghy sijt een wijs man, alsoo dat ghy wel weten moecht, wat ghy hem doen sult, ende ghi sult sijn grijs hayr met bloede ter hellenwaerts brenghen,

10

Aldus is Dauid ontslapen met sijnen vaderen en begrauen in Dauids stadt,

11

Ende die daghen dat Dauid gheregneert heeft ouer Israel sijn veertich iaren te Hebron regneerde hy seuen iaren, te Ierusalem drijendertich,

12

Maer Salomon is gheseten op Dauids sijns vaders throon, ende sijn conincrijck is bouen-

[p. *267]

maten seer vast gheworden,

13

⁺Ende Adonias Haggiths sone is inghecomen by Bethsabee Salomons moeder, Die welcke heeft tot hem geseyt. Is v incoemst oock vreedsamelijck? Hy antwoorde. Ia hy is vredelijck,

+ C

14

Ende hy seyde daer toe. Ick heb een woort aen v, Ende sij seyde hem. Spreect,

15

Ende hy seyde. Ghi weet wel dat het conincrijc mijne was, ende dat gheheel Israel my hadde ouer sij seluen ghestelt tot eenen coninck, Maer dat conincrijck is ouerghesedt, ende is worden mijns broeders, want het is vanden Heere hem toeghescict,

16

Daerom bid ick nv een bede van v, en wilt mijn aensicht niet bescamen,

17

Ende sij seyde tot hem. Segghet, Ende hy seyde. Ick bidde v dat ghy Salomon den coninck segghen wilt (want hy en mach v gheen dinck weygheren) dat hi mi gheue Abisag die Sunamitinne tot een huysvrouwe,

18

Ende Bethsabee seyde. Wel ick sal voor v den coninc spreken,

19

Hierom is Bethsabee tot Salomon den coninc ghecomen, dat sij hem spreken soude voor Adonias, ende die coninck is opghestaen haer te ghemoete, ende hy heeftse aenbeden, ende is op sijnen throon gheseten, ende daer is eenen throon ghestelt voor des conincs moeder, die welcke is gheseten aen sijn rechte sijde,

20

⁺Ende sij seyde tot hem. Een cleyn bedeken bid ick van v, en wilt mijn aenschijn niet bescamen, Ende die coninck seyde haer. Bidt mijn moeder, want ten is niet behoorlijck dat ick v aensicht af keeren soude,

+ D

21

Die welcke seyde. Laet Abisag die Sunamitinne Adonias uwen broeder tot een huysvrouwe ghegheuen worden,

22

Doen antwoorde die coninck Salomon ende seyde tot sijnder moeder. Waerom begheerdy Abisag die Sunamitinne voor Adonias? begeert ooc het conincrijck voor hem, want hy is mijn broeder ouder dan ick, ende hy heeft Abiathar den priester, ende Ioab den sone Saruie,

23

Hierom soo heeft die coninc Salomon ghesworen by den Heere segghende. Dit doe my Godt ende dat noch daer toe, want Adonias heeft tseghen zijn ziele dit woort ghesproken,

24

Ende nv soo warachtelijck als die Heere leuet die my vast ghemaect heeft, ende my ghesteldt heeft op Dauids mijns vaders coninclijcken stoel ende die mi een huys ghemaect heeft, ghelijck hy gheseyt heeft. Huyden sal Adonias ghedoot worden,

25

Ende die coninck Salomon heeft ghesonden door die hant van Banaias den sone van Ioiada, die welcke hem dootgheslaghen heeft ende hy is ghestoruen,

26

⁺Oock heeft die coninck gheseyt tot Abiathar den priester. Gaet henen na Anathoth tot uwen acker, ende ghy sijt voorwaer een man des doots, maer ick en sal v huyden niet dooden, om dat ghi die arcke des Heeren des Gods ghedragen hebt voor Dauid mijnen vader, ende hebt arbeyt verdraghen in alles daer mijn vader in ghearbeyt heeft,

+ E

27

Hier om heeft Salomon Abiathar verdreuen, dat hi gheen priester des Heeren meer sijn en soude, om dat des Heeren woort soude volbracht worden, dwelc hy ghesproken heeft ouer dat huys van Heli te Silo

28

Maer daer is een bode comen aen Salomon, dat Ioab afgheweken was nae Adoniam, ende nae Salomon niet ghegaen en was, Daerom soo is Ioab gheuloden in des Heeren tabernakel, ende hy heeft den horn des outaers aenghetast,

29

Ende het is Salomon den coninck te kennen ghegheuen, hoe dat Ioab in dat tabernakel des Heeren gheuloden was, ende dat hi was by den outaer, Ende Salomon heeft ghesonden Banaiam den sone van Ioiada segghende. Gaet henen ende slaet hem doot,

30

Ende Banaias is comen tot des Heeren tabernakel, ende heeft hem gheseyt, Dit seyt die coninck. Coemt wt, Hy seyde. Ick en sal niet wt comen, maer ick sal hier steruen, Banaias heeft den coninck dese woorden ontboden segghende. Dit heeft Ioab ghesproken, ende dit heeft hy my gheantwoordt,

31

Ende die coninck heeft hem gheseyt. Doet ghelijck hi gheseyt heeft, ende slaet hem doot, ende begraeft hem, ende ghy sult dat onnoosel bloet (het welcke van Ioab ghestort is gheweest) van my ende van mijns vaders huyse keeren,

32

⁺Ende die Heere sal hem sijn bloet wederom gheuen op sijn hooft want hy heeft twee rechtuerdighe mannen ghedoot die beter waren dan hy, ende hy heeft die metten swaerde verslaghen, sonder Dauids mijns vaders weten, Abner den sone van Ner, den prince van dat orloochs volck van Israel, ende Amasam Iethers sone den prince van Iudas heyr,

+ F

33

ende dat bloet van dien sal wederom keeren op Ioabs hooft ende op sijns saets hooft inder eewicheyt, Maer Dauid ende sijnen sade ende sijnen huyse ende sijnen throon sij vreede inder eewicheyt vanden Heere,

34

Hierom is Banaias die sone Ioiade opghegaen, ende hem aencomende heeft hy hem doot gheslaghen, ende hy is begrauen in sijn huys in die woestijne,

35

Ende die coninck heeft Banaiam den sone van Ioiada voor hem ghestelt ouer theyr, ende Sadoc den priester heeft hy ghesteldt voor Abiathar.

36

Oock heeft die coninck ghesonden ende gheroepen Semei, ende hem gheseyt. Timmert voor v een huys in Ierusalem ende woont daer, ende ghy en sult daer niet wtgaen herwaerts ende derwaerts

37

Maer op wat dach dat ghy wt sult ghegaen sijn, ende ouer die beke van Cedron ghereyst, soo weet dat ghi sult ghedoot worden. V bloet sal op v hooft wesen,

38

Ende Semei heeft totten coninck gheseyt. ⁺Dits een goet woort, ghelijck mijn heere die coninck ghesproken heeft, alsoo sal v dienaer doen, Hieromme heeft Semei binnen Iherusalem veel daghen ghewoont,

+ G

39

Maer het is ghesciet nae drij iaren dat die knechten van Semei vloden tot Achis den sone van Maacha den coninck van Geth, ende het is Semei ghebootscapt dat sijn knechten waren te Geth ghegaen,

40

Ende Semei is opghestaen ende heeft sijnen esel ghesadelt ende is tot Achis te Geth ghegaen, om sijn knechten wederom te crijghen, ende hy heeftse wederom bracht van Geth,

41

Maer het is Salomon ghebootscapt, dat Semei te Geth ghegaen was van Ierusalem, ende wederom comen,

42

Ende wtsendende heeft hy hem gheroepen ende tot hem gheseyt. En heb ick v niet ghesworen by den Heere ende v te voren gheseydt. Op wat dach dat ghy sult wtghegaen sijn herwaerts oft derwaerts, soo weet dat ghy steruen sult, ende ghy hebt my gheantwoort. Dits een goet woort dat ick ghehoort hebbe,

43

Waerom en hebdi dan den eedt des Heeren niet bewaeert, ende tghebodt dat ick v gheboden hadde?

44

Ende die coninck seyde tot Semei. Ghi weet alle tquaet, dwelck uwer herten wel kenlijck is dat ghy ghedaen hebt mijnen vader Dauid, die Heere heeft v wederom v boosheyt op v hooft ghegheuen,

45

Ende die coninck Salomon sij ghebenedijt, ende den throon van Dauid sal ghestadich sijn voor den Heere tot inder eewicheyt,

46

Hierom soo heeft die coninck Banaia den sone van Ioiada beuolen, die welcke hem aengaende heeft hem gheslaghen, ende hi is ghestoruen.