Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺DIt sijn die laetste woorden die welcke Dauid die sone Isai gesproken heeft. Dit heeft gheseyt een man, den welcken ghestelt es vanden ghesalfden Gods van Iacob, een heerlijck sanckdichter in Israel.

+ A

2

Des heeren gheest heeft doer my ghesproken, ende sijn woort doer mijn tonghe.

3

Godt van Israel heeft my gheseyt, die stercke van Israel heeft ghesproken, Een regeerder der menschen, een rechuerdich regeerder inder vreesen Gods

4

Ghelijck dat licht vanden dagheraet (als die sonne opstaet) des morghens sonder wolcken blincket, ende ghelijck door die reghenen tcruyt wter eerden groeyet

5

Noch mijn huys en is so groot niet by Gode dat hy een eewich verbont met my soude maken in alles vast ende wel bewaert, Want dat is al mijn salicheyt ende alle mijnen wille, ende daer en is niet van dien dat niet en groyet.

6

Maer die ouertreders sullen alle gader ghelijc dornen wtgheroyet worden, die niet ghenomen en worden metten handen.

7

Ende eest datse iemant handelen wilt, die sal hem wapenen met yser ende met een hout der lancien, ende sij sullen metten viere verbrant worden heel te niete.

8

Dit sijn die namen van Dauids stercke mannen, Dauid sittende op sijnen setel een die alder wijste prince onder die drie, hy is ghelijc een alder teederste houtwormken die acht hondert mannen verslaghen heeft met eenen oploop.

9

Nae desen was Eleazar sijns ooms sone een Ahohiter, ⁺onder die drij vrome mannen, die met Dauid waren, doen si die Philistijnen bescimpten, ende sij daer waren ten strijde vergadert.

+ B

10

Ende als die mannen van Israel opghecomen waren, so stont hy ende sloech die Philistijnen tot dat hem sijn hant begaf, ende dat die stijf worde metten swaerde, ende die Heere dede een groot salicheyt op dien dach, ende het volck dat gheulucht was is wederom comen, om die roouen af te trecken vanden ghenen die daer verslaghen waren.

11

Ende nae desen was Semma die sone van Age, van Arari. Ende die Philistinen sijn vergadert in den heyrlegher, ende daer was eenen acker vol vitsen. Ende doen dat volc gheuloden was voor daensicht der Philistijnen

12

so stont hy int midden van den acker, ende hy heeft dien beschermt, ende hi heeft die Philistijnen gheslaghen, ende die Heere heeft een groote salicheyt ghedaen.

13

Ooc daer te voren waren afcomen die drije die princen waren onder dertich mannen, ende waren ghecomen ten tijde vanden oochst tot Dauid in die speluncke van Odollam, maer den legher der Philistijnen was doen ghestelt in der ruesen dal,

14

ende Dauid was doen in een stercte, ende die scaerhoede vanden Philistijnen was te Bethlehem.

15

Ende Dauid begheerde water wten putte, ende hy seyde, Och oft iemant my gaue eenen dronck waters wt den put die te Bethlehem is by die poorte.

16

Hierom so sijn dese drij stercke mannen door die Philistijnen heyrlegher metter macht ghebroken, ⁺ende sij hebben water gheuaet wt den put van Bethlehem, die by die poorte was, ende sij hebben dat tot Dauid ghebracht, maer hy en wilde dat niet drincken, Maer hy storte dat wt voor den Heere tot een offerande

+ C

17

segghende, Die Heere sij my ghenadich dat ic dit niet en doe, Soude ick het bloet van desen mannen die derwaerts ghegaen sijn, ende het perikel van haren zielen drincken? Hier om en wilde hy dat niet drincken, Dit hebben die drij aldervroemste gedaen.

18

Abisai ooc Ioabs broeder die sone Saruie, was een prince vanden drijen hy is die ghene die sijn spiesse ophief teghen drij hondert mannen, die welcke hy doot sloech, vernaemt onder die drije ende onder die drie dalder edelste,

19

ende hy was hen prince, maer tot die ierste drije, en was hy niet comen.

20

Ende Banaias die sone van Ioiada des alderstercsten

[p. *264]

mans van grooten daden van Cabseel, dese sloech twee leeuwen van Moab, ende hy is nederghedaelt ende heeft eenen leew verslaghen int midden van eenen putte inden sneeu tijt,

21

Hy heeft ooc eenen Egipschen man verslaghen, eenen man die besiens weert was, die een lancie in sijn hant hadde, Hierom doen hy nederghegaen was tot hem met eender roeden, soo heeft hy met ghewelt die lancie wt die hant van den Egiptenaer ghenomen, ende heeft hem met sijns selfs lancie ghedoot,

22

⁺dese dinghen heeft Banaias Ioiadas sone ghedaen,

+ D

23

Ende hy was vernaemt onder die drij vrome die dalder edelste waren onder die dertich, maer nochtans tot die drije en was hi niet ghecomen, ende Dauid heeft hem ghemaect sijnen heymelijcken raet,

24

Asael Ioabs broeder onder die dertich, Elehanan sijns vaders broeders sone van Bethlehem

25

Semma van Harodi, Elica van Harodi,

26

Heles van Phalti, Hira Acces sone van Thecua,

27

Abiezer van Anathoth, Mobonnai van Husati,

28

Selmon die Ahohiter, Maharai een Netophathiter,

29

Heled sone van Baana oock een Netophathiter, Ichai die sone van Ribai van Gabaath der kinderen Beniamin,

30

Banaia die Pharathoniter, Heddai vander beken Gaas,

31

Abialbon die Arbathiter, Azmaueth van Beromi,

32

Eliaba van Salaboni, Die sonen Iassen, Ionathan

33

Semmaa van Orodi, Ahiam Sarars sone die Arariter,

34

Eliphelet die sone van Aasbai des soons Machati, Eliam Achitophels sone die Geloniter

35

Hesrai van Carmelus, Pharai van Arbi,

36

Igaal Rathans sone van Soba, Bonni van Gadi,

37

Selec van Ammoni, Naharai een Berothiter die wapendrager van Ioab sone van Saruie,

38

Ira die Iethriter, Gareb ende hy oock een Iethriter,

39

Vrias die Hethiter, alle seuenendertich.