Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺ENde die gramscap des Heeren is wederom verbolghen teghen Israel, ende heeft Dauiden beroert in hen, segghende. Gaet henen telt Israel ende Iudam,

+ A

2

Ende die coninck heeft gheseyt tot Ioab den prince van sijnen heyre. Doorwandelt alle die gheslachten van Israel van Dan aen tot Bersabee toe ende telt het volck, dat ick tghetal van dien mach weten,

3

Ende Ioab heeft totten coninck gheseyt. Die Heere v Godt doe noch meer tot uwen volcke soo veel alst nv is, ende make dat noch hondertfout meerder int aenschouwen mijns heeren des conincs, Maer wat wilt hem mijn heere die coninck in alsulck dinck?

4

Ende des conincs woort heeft Ioabs ende der princen woort verwonnen, ende Ioab is wt ghegaen ende die princen der orloochscer mannen, van des conincs aensicht, dat sij het volck van Israel tellen souden,

5

Ende doen sij ouer die iordaen ghegaen waren, sijn sij ghecomen te Aroer ter rechter sijden vander stadt die gheleghen is in die valleye Gad, ende door Iazer

6

sijn sij voorts ghetrocken in Galaad ende in dat nederlant Hadsi, ende sijn ghecomen in die wildernissen van Dan, Ende omgaende omtrent Sidon,

7

sijn sij voorts ghegaen omtrent die vesten van Tyrus, ende alle dlantscap vanden Heueen ende Chananeen, ende sijn ghecomen aen die suytsijde van Iuda in Bersabee,

8

ende nae dat sij alle het lant doorsocht hadden, so sijn sij wederom nae neghen maenden ende twintich daghen teghenwoordich gheweest in Ierusalem,

9

⁺Hierom heeft Ioab het ghetal van dat bescrijuen des volcs den coninck ghegheuen, ende daer sijn gheuonden van Israel acht hondert duysent stercker mannen die sweert wt trecken mochten, ende van Iuda vijfhondert duysent strijtbaerder mannen.

+ B

10

Maer Dauids herte heeft hem gheslagen nae dat tvolc getelt was, ende Dauid seyde totten Heere. Ic heb seer ghesondicht in dit werc maer ic bid v Heere dat ghy ws dienaers misdaet wech nemen wilt, want ick heb wtermaten seer dwaselijck ghedaen.

11

Aldus is Dauid des morgens opghestaen, ende het woort des Heeren is ghesciet tot Gad den propheet ende Dauids siender segghende.

12

Gaet henen ende spreect tot Dauid, Dit seyt die Heere. Van drijen wort v coese ghegheuen, kiest een van desen dwelcke v belieft, dat ict v doe.

13

Ende doen Gad tot Dauid comen was, so heeft hi hem ghebootscapt segghende. Oft seuen iaren sal v den dieren tijt in v lant comen, oft ghi sult drij maenden lanc vlieden van uwen vianden, ende sij sullen v veruolghen, oft emmer sal die pestilentie drij daghen in v lant sijn, Hierom soo beraedt v nv, ende besiet wat woorden ic hem sal moghen antwoorden die my ghesonden heeft,

14

Doen seyde Dauid tot Gad. Ick worde seer benauwet, maer this beter dat ick in des Heeren handen valle (want sijn bermherticheden veel sijn) dan inder menschen handen.

15

Aldus heeft die Heere ghesonden een pestilencie in Israel, van smorghens totten ghesetten tijt, ende daer isser vanden volcke ghestoruen, van Dan af tot Bersabee toe, tseuentich duysent mannen,

16

Ende doen die Enghel des Heeren sijn hant wt ghereyct hadde op Ierusalem om die te verderuen, soo heeft die Heere medelijden ghehadt ouer dat lijden, ende hy heeft gheseyt tot den Enghel die het volck sloech Het is ghenoech, hout v hant nv stille, ende dien Enghel des Heeren was by den dorschuloer van Areuna den Iebuseiter.

17

Ende Dauid seyde tot den Heere, als hy ghesien hadde den Enghel het volck slaende. Ick bent die ghesondicht hebbe, ende ick heb booselijck ghedaen, Wat hebben dese misdaen die scapen sijn? Ick bidde v laet v hant teghen my ghekeert worden, ende teghen mijns vaders huys,

18

Maer Gad is tot Dauid comen op dien dach, ende heeft hem gheseyt. Ghaet opwaerts ende stelt den Heere eenen outaer, inden dorschuloer van Areuna den Iebuseiter,

19

Ende Dauid is opghegaen nae die woorden van Gad, welck hem die Heere beuolen hadde,

20

Ende Areuna aensiende heeft ghemerct den coninck ende sijn knechten ouercomen tot hem, Ende wtghegaen sijnde, heeft hi den coninck aenbeden metten aensicht neder ter aerden, ende hy seyde.

21

⁺Wat sake eest, dat mijn heere die coninck tot sijnen dienaer coemt? Den welcken Dauid seyde. Om dat ic van v soude coopen den dorschuloer, ende daer den Heere eenen outaer maken, ende dat die sterfte mach ophouden die grouwelijck het volck verslaet,

+ D

22

Ende Areuna seyde tot Dauid. Mijn heere die coninc neme ende offere alsoot hem belieft, ghy hebt ossen totten heelenbrantoffer, ende eenen waghen ende die iocken der ossen tot ghebruycke vanden houte,

23

Alle dese dinghen heeft Areuna den coninck ghegheuen, ende Areuna heeft tot den coninck gheseyt. Die Heere v Godt ontfanghe v ghelofte,

24

den welcken die coninck antwoordende seyde. Gheensins alsoo ghy wilt, Maer ic salt van v om eenen prijs coopen, ende ic en sal den Heere mijnen Godt gheen brantofferanden offeren, die om niet ghegheuen sijn, Hierom heeft Dauid ghecocht dien dorschuloer, ende die ossen om vijftich siclen siluers,

25

ende Dauid heeft daer eenen outaer ghetimmert den Heere ende heeft

[p. *265]

daer op gheoffert heelbrantofferanden ende vreedofferanden, ende die Heere wert den lande versoent, ende die plaghe is afghekeert van Israel.

Hier eyndet dat tweede boeck der Coninghen.