Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺ENde Dauid heeft den Heere ghesproken die woorden van dit liet opden dach als hem die Heere verlost hadde wt die hant van alle sijnen vianden, ende wt Sauls hant,

+ A

2

Ende hi heeft gheseyt,

Die Heere is mijnen steen, mijn stercheyt, ende mijn salichmaker.

3

Godt is mijn stercke, in hem sal ic hopen, mijnen schilt, ende den horn mijnder salicheyt, mijn verheffer, ende mijn toeulucht, mijn verlosser, vander onrechtuerdicheyt suldi my verlossen.

4

Den loffelijcken Heere sal ic aenroepen, ende van mijnen vianden sal ic verlost sijn.

5

Want des doots benautheden hebben my omuanghen, Belials beken hebben my veruaert.

6

Die seelen der hellen hebben my omuanghen, ende die stricken des doots hebben my verrascht.

7

In mijn lijden sal ic den Heere aenroepen, ende tot mijnen Godt sal ic roepen, ende hy sal mijn stemme verhooren van sijnen heylighen tempel, ende mijn roepen sal tot sijnen ooren comen.

8

Die aerde is beroert ende sij heeft ghebeeft, die fundamenten vanden berghen sijn ghescuddet, ende tsamen ghestooten, want hy is op hen gram gheworden.

9

Eenen roock is wt sijnen nuese opghegaen, ende een vier wt sijnen mont sal verslinden, colen sijn daer af ontsteken.

10

Hy heeft die hemelen neder gheboocht, ende is nedercomen, ende duysterheyt is onder sijn voeten.

11

Ende hy is gheclommen op die Cherubims, ende heeft gheuloghen, ende hy is wech ghedreuen bouen die vederen der winden.

12

⁺Hi heeft die duysternisse al om hem ghestelt tot een verborghen, sichtende wateren van die wolcken der hemelen.

+ B

13

Van die blinckende claerheyt in sijn aensicht sijn daer colen des viers ontsteken.

14

Die Heere sal vanden hemel donderen, ende die alderhoochste sal sijn stemme gheuen.

15

Hy heeft pijlen wtghescoten, ende die verstroyt, blixem ende hy heeftse vernielt.

16

Ende die wtberstinghen der zee hebben hem gheopenbaert, ende die fundamenten der aerden sijn ontdect, van dat straffen des Heeren, Van dat inblasen des gheests van sijnder rasender gramscappen.

17

Hy heeft vanden hemel ghesonden ende my tot hem ghenomen, ende hi heeft my ghetrocken wt veel wateren.

18

Hy heeft my verlost van mijnen alder machtichsten viant, ende vanden ghenen die my haten, want sij waren machtigher dan ic.

19

Hy is my voor ghecomen opden dach mijns lijdens, ende die Heere is mijn vasticheyt gheworden.

20

Ende hy heeft my wtgheleydt tot in die breetheyt, hy heeft my verlost, want ic hem behaecht hebbe.

21

Die Heere sal mi loonen nae mijn rechtuerdicheyt, ende nae die suyuerheyt mijnder handen, sal hy my wederom gheuen.

22

Want ic heb des Heeren weghen bewaert, ende ic en heb niet ongoddelijc teghen mijnen Godt gedaen.

23

Want alle sijn ordeelen sijn voor mijn ooghen, ende sijn gheboden en heb ic van my niet ghedaen.

24

Ende ick sal met hem volmaect wesen, ende ic sal my van mijn boosheyt hoeden.

[p. *263]

25

⁺Ende die Heere sal my wederom gheuen nae mijn rechtuerdicheyt, ende nae mijnder handen suyuerheyt int aenschouwen van sijnen ooghen.

+ C

26

Metten heylighen suldi heylich sijn, ende met den vromen volmaect.

27

Metten wtuercorene suldi wtuercoren wesen, ende metten verkeerden suldi verkeert worden.

28

Ende het arme volck suldi salich maken, ende met uwen ooghen suldi die hooghe vernederen.

29

Want ghy Heere sijt mijn licht, ende ghy Heere sult mijn duysternissen verlichten.

30

Want door v sal ick aenghegort loopen, door mijnen Godt sal ick ouer die mueren springhen.

31

Godt is die ghene wiens wech ombesmet is, die wtsprake des Heeren door tvier gheproeft, is eenen scilt alle den ghenen die in hem hopen.

32

Want wie is Godt anders dan die Heere? ende wie is sterck anders dan onse Godt.

33

Godt die my vast omgort met stercheyt, ende die mijnen volmaecten wech effen ghemaect heeft,

34

Maeckende mijn voeten ghelijc der herten, ende stellende my op mijn hoochden.

35

Leerende mijne handen tot den strijt, ende voeghende mijn armen als eenen metalen boghe.

36

Ghy hebt my den schilt uwer salicheyt ghegheuen, ende mijn saechtmoedicheyt heeft my vermenichfuldicht.

37

Ghy sult mijn ganghen onder my breedt maken, ende die knokelen mijnder voeten en sullen niet beswijcken.

38

⁺Ic sal mijn vianden veruolghen, ende in stucken slaen, ende ic en sal niet wederom keeren voor dat ic die al vernielt hebbe.

+ D

39

Ic salse vernielen, ende in stucken breken, alsoo dat sij niet weder op staen en sullen, sij sullen onder mijn voeten vallen.

40

Ghy hebt my met vromicheyt vast omgort ten strijde, onder my hebdi nedergheboocht alle die my wederstonden.

41

Mijn vianden hebdi my doen den rugghe keeren die my haten, ende ick salse verderuen.

42

Sij sullen roepen, ende daer en sal niemant sijn die hen verlossen sal, totten Heere ende hy en sal hen niet verhooren.

43

Ic salse wtwisschen als dat stubbe der aerden, ick salse morselen ende in stucken breken als slijck der aerden.

44

Ghy sult my verlossen van dat wedersegghen mijns volcs, ghy sult my bewaren tot een hooft der heydenen, het volck dat ick niet en kenne sal my dienen.

45

Die vreemde kinderen sullen my wederstaen int ghehoor der ooren sullen sij my onderdanich wesen.

46

Die vreemde kinderen sijn wech gheuloten, ende sij sullen benaut worden in haer banghicheden.

47

Die Heere leuet ende ghebenedijt moet mijn Godt sijn, ende die stercke Godt mijnder salicheyt sal verheuen worden.

48

Godt die my wrake verleent ende veel volcs onder mijn bedwanck brenghet.

49

Die my leyt wt mijnen vianden, ende verheft my van den ghenen die my wederstaen, ghi sult my verlossen vanden onrechtueerdighen man.

50

Daer om sal ick v louen heere onder die heydenen, ende uwen naem lof singhen.

51

Grootmakende die salicheden sijns conincs ende bermherticheit doende sijnen ghesalfden Dauid, ende sijnen sade inder eewicheyt.