Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxi. Capittel.

1

⁺ENde daer is eenen dieren tijt opghestaen by Dauids tijde drij iaren achter een duerende. Ende Dauid vraechde raet van des Heeren antwoorde. Ende die Heere heeft geseyt, Om Sauls wille ende om sijn huys des bloets om dat hy die Gabaoniten ghedoot heeft.

+ A

2

Hier om heeft die coninck die Gabaoniten gheroepen ende seyde tot hen, maer die Gabaoniten en waren niet van den kinderen van Israel maer si waren ouergebleuen vanden Amorithen, want die kinderen van Israel hadden hen ghesworen, ende Saul wildese verslaen als ter liefden vanden kinderen van Israel ende Iuda.

3

Aldus seyde Dauid tot die Gabaoniten, Wat sal ic v doen? ende waer mede sal ick v versoenen, dat ghy dat erfdeel des Heeren moecht ghebenedijden?

4

Ende die Gabaoniten seyden, Wij en hebben gheen clachte van gout oft van siluer, maer teghen Saul ende teghen sijn huys, noch wij en begheren niet datter een mensch van Israel ghedoot worde. Totten welcken die coninck seyde, Wat wildi dan dat ic v doe?

5

Die welcke seyden totten coninc

[p. *262]

Den man die ons vernielt ende verdruct heeft tonrechte moeten wij also vernielen datter niet een van sijnen gheslachte ouer en blijue in alle die palen van Israel,

6

⁺Men gheue ons seuen mannen, van sijnen kinderen, dat wij die moghen cruycen voor den Heere te Gabaa in die stadt van Saul wijlen die wtuercoren des Heeren. Ende die coninck seyde, Ic salse v gheuen.

+ B

7

Ende die coninck spaerde Miphi-boseth die sone van Ionathas Sauls sone, om dat ghesworen verbont des Heeren, het welcke gheweest was tusschen Dauid ende Ionathan Sauls sone.

8

Aldus soe heeft die coninck ghenomen die twee sonen van Respha der dochter van Aia, die welcke sij Sauli ghebaert hadde, Armoni, ende Miphi-boseth, ende vijf sonen van Michol Sauls dochter die welcke sij ghebaert hadde Hadrielen die sone van Berzellai, die van Molathi was,

9

ende hi gaf die den Gabaoniten in handen, die welcke hebben dese opden berch gecruyst voor den Heere, ende dese seuen sijn ghestoruen tsamen ghedoot ten tijden vanden vroeghen oochst, alsmen begonste die gherste te maeyen.

10

Ende Respha die dochter van Aia nemende een hairen cleedt leyde dat onder haer op die steenroetse van tbeghinsel des oochsts tot dat het water wten hemel op hen druypte. Ende sij en heeft niet toeghelaten dat die voghelen hen verschoeren souden des daechs, oft die beesten des nachts.

11

Ende het werde Dauid ghebootscapt alle dat Respha die dochter van Aia Sauls concubine ghedaen hadde.

12

Ende Dauid is wech ghegaen ende heeft Sauls ende Ionathas sijns soons ghebeente ghehaelt van die mannen van Iabes-galaad, ⁺die dese hadden ghestolen van die strate te Beth-san, in die welcke die Philistinen die ghehanghen hadden, doen sij Saul te Gelboe hadden verslaghen,

+ C

13

ende hy heeft Saul ende Ionathas sijns soons ghebeente van daer wech ghedraghen, ende tsamen vergaderende die ghebeenten vanden ghenen die ghecruyst waren,

14

hebben sij die tsamen met Sauls ende Ionathas sijns soons gebeente begrauen int lant van Beniamin aen die sijde int graf van Cis Sauls vader, ende sij hebben ghedaen al dat die coninck gheboden hadde, ende Godt is den lande weder versoent gheweest nae desen.

15

Ende daer is weder een orloghe opghestaen vanden Philistinen teghen Israel, ende Dauid is nederwaerts ghetrocken ende sijn knechten met hem, ende streden teghen die Philistinen. Ende doen Dauid vermoeydt worde,

16

soo heeft Iesbi-benob die van Araphas gheslachte was (van wiens lancie het yser woech drijhondert vncien, ende was omgort met een nieuwe sweert) ghearbeyt om Dauid te slaen.

17

Ende Abisai die sone Saruie heeft hem gheholpen, ende den Philistijn doot gheslaghen. Doen swoeren Dauids mannen segghende, Ghi en sult nv voertaen met ons niet meer ter orloghen wt trecken, dat ghy by auontueren het licht van Israel niet wt en blaest.

18

Die tweede orloghe teghen die Philistijnen is gheweest te Gob, ⁺Doen versloech Sobachai van Husathi, Saph van Araphas gheslachte wt den gheslachte der ruesen.

+ D

19

Die derde orloghe was oock te Gob, teghen die Philistijnen, in die welcke Adeodatus die sone van Saltus een barduerwercker een Bethleemiter versloech Goliath den Gethiter, van wiens lancie den stock was ghelijck eenen weefboom der weuers.

20

Die vierde orloghe was te Geth, in die welcke was een lanck man die ses vingheren hadde aen elck van sijnen handen, ende ses teenen aen elck van sijnen voeten, dat is vierentwintich, ende hy was vanden gheslachte van Arapha.

21

Ende hi vermalendijde Israel maer Ionothan die sone van Samaa Dauids broeder versloech hem.

22

Dese vier waren gheboren van Arapha te Geth, ende sij sijn ghestoruen door die hant van Dauid ende van sijnen knechten.