Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺ENde tworde Ioab ghebootscapt dat die coninck weende, ende beclaechde sijnen sone,

+ A

2

ende die victorie is in eenen rouwe verkeert alle den volcke op dien dach, want het volck hoorde op dien dach segghen, Die coninck is rouwich ouer sijnen sone.

3

Ende het volck heeft hem vermijdt, op dien dach in die stadt te comen ghelijc het volc pleech besijden te gaen dat wederom keert, ende wt den strijdt vlucht.

4

Ende die coninck heeft sijn hooft bedect, ende riep met luyder stemmen, Mijn sone Absalom, Absalom mijn sone.

5

Hierom Ioab totten coninck in huys gaende heeft gheseyt, Ghy hebt heden bescaemt die aensichten van allen uwen dienaers, die behouden hebben v ziele ende die zielen van uwen sonen ende uwen dochteren, ende die ziele van uwen huysvrouwen, ende die ziele van uwen concubinen,

6

Ghi hebtse lief die v haten, ende ghy haetse die v lief hebben, Ende ghy hebt huyden ghetoont dat ghy v capeteynen ende v knechten niet en acht, ende ick heb nv waerlijc beuonden dat waert dat Absalom noch leefde, ende dat wij allen dootgheslaghen waren, dan soudet v wel behaghen.

7

Daerom staet nv op, ende gaet wt, ende aensprekende voldoet uwen knechten, ⁺want ic sweere v byden Heere, eest sake dat ghy niet wt en coemt,datter niet een man by v blijuen en sal desen nacht, ende dat sal v quader sijn, dan alle het quaet dwelck ouer v comen is, van uwer ioncheyt af tot op desen dach toe.

+ B

8

Hier om is die coninck opghestaen, ende sadt in die poorte, ende het is alle den volcke gheseyt hoe dat die coninck in die poorte sadt, ende alle die menichte is comen voor den coninck, Maer Israel was gheuloden in sijn tabernakelen.

9

Ende alle tvolc keef onderlinghe in alle die gheslachten van Israel segghende, Die coninck heeft ons verlost wt onser vianden hant, hy heeft ons verlost wt der Philistinen hant, ende nv is hy wten lande gheuloden om Absaloms wille,

10

Maer Absalom den welcken wij ouer ons ghesalft hadden is inden strijt ghestoruen, Hoe langhe suldi stille sijn ende den coninck niet wederom leyden?

11

Ende den raet van gheheel Israel quam tot den coninck, Maer die coninck Dauid sandt tot Sadoc ende Abiathar priesters segghende, Spreect tot die ouders van Iuda segghende, Waerom coemdi die laetste om den coninck weder te leyden in sijn huys? Ende het woordt van gheheel Israel was totten coninck comen in sijn huys dat die coninck gheseyt hadde, ⁺dit suldi segghen totten volcke van Iuda,

+ C

12

Ghy sijt mijn broeders, ghy sijt mijn ghebeente ende mijn vleesch, Waer om coem-

[p. *260]

di die alderlaetste om den coninck weder te leyden?

13

Segghet ooc tot Amasa, En sijdi niet mijn ghebeente ende mijn vleesch? Dese dinghen doe my Godt, ende die noch daer toe, also verre als ghy niet en sult sijn een opper veltheere voor my altijt in die stede van Ioab.

14

Ende hy buychde het herte van allen die mannen van Iuda, als eens mans herte, Ende sij hebben aen den coninck ghesonden segghende, Coemt wederom ghy ende alle uwe knechten.

15

Ende die coninck is wederom ghekeert ende hy is tot aen die Iordane comen, ende alle die van Iuda sijn ghecomen tot Galgala, om den coninck te ghemoete te ghaen, ende dat sij hem ouer die Iordane brenghen souden.

16

Maer Semei Geras sone des soons Gemini van Bahurim heeft hem ghehaest, ende is nederwaerts comen metten mannen van Iuda den coninck Dauid te ghemoete

17

met duysent mannen van Beniamin, ende Siba die knecht van Sauls huys, ende sijn vijfthien sonen, ende twintich knechten waren met hem, ende metter macht doorbrekende die Iordane sijn sij voor den coninck door die passagien ghegaen,

18

dat sij des conincs huys ouerhalen souden, ⁺ende dat sij nae sijn beuel doen souden. Maer Semei die sone van Gera nederuallende voor den coninck doen hy ouer die Iordane comen was heeft tot hem gheseyt,

+ D

19

En wilt my die boosheyt niet wijten mijn heere, noch en wilt niet gedachtich wesen alle die versmaetheden die ick v knecht v aendede op den dach doen ghy mijn heere die coninck wt Ierusalem ghinct, noch en stelt dat coninck op v herte niet,

20

Want ick v dienaer bekenne mijn misdaet, ende daer om ben ick heden die alder ierste comen wt dat gheheel huys van Ioseph, ende nederwaerts ghereyst te ghemoete mijnen heere den coninck.

21

Doen antwoorde Abisai die sone van Saruie ende seyde, En sal Semei om dese woorden niet steruen, die welcke des Heeren ghesalfden vermalendijt heeft?

22

Ende Dauid seyde, Wat heb ick met v lieden te doen ghy kinderen van Saruie? Waer om wort ghy my heden als Satan? Sal dan heden eenich man ghedoot worden in Israel? Meyndi dat ick niet en weet dat ick heden coninck ouer Israel gheworden ben?

23

Ende die coninck seyde tot Semei, Ghy en sult niet steruen. Ende hy heuet hem ghesworen.

24

⁺Oock soo is Miphiboseth Sauls sone afghecomen den coninck te ghemoete, met onghewasschen voeten, ende met onghescoren baerde, ende hi en hadde sijn cleederen niet ghewasschen van dien dach dat die coninck wt gheghaen was, tot op den dach dat hy met vrede wederom quam.

+ E

25

Ende als hy te Ierusalem den coninck te ghemoete quam, so seyde die coninck tot hem, Waer om en quaemdi met my niet Miphiboseth?

26

Ende hy antwoordende seyde, Mijn heere die coninck, mijn knecht versmaedde mi want ic v dienaer seyde hem dat hy my eenen ezel sadelen soude, ende dat ick daer op sittende soude met den coninck wech trecken, want ic v dienaer ben crepel,

27

Daer bouen ooc soo heeft hy my uwen dienaer besculdicht voor v mijnen heere den coninck, Maer ghi mijn heere die coninc zijt ghelijc een Enghel Gods, doet dat v belieft,

28

Want mijns vaders huys en was mijn heere die coninck anders niet dan die doot sculdich, maer ghi hebt my uwen dienaer ghestelt onder die ghene die aen v tafel eten, wat heb ic dan met rechte te claghen? oft wat mach ic meer roepen totten coninck?

29

Daerom heeft die coninck tot hem gheseyt, Wat suldi meer spreken? Het is vast dat ick ghesproken hebbe, Ghy ende Siba deylt onderlinghe die besittinghen.

30

Ende Miphiboseth antwoorde den coninck Latet hem ooc al te male nemen, nae dien dat mijn heere die coninck vredelijck wederom in sijn huys comen is.

31

Berzellai die Galaaditer oock afcomende van Rogelim, ⁺heeft den coninck ouer die Iordane ghehaelt, oock bereedt sijnde om hem te volghen ende wtgheleyde te doen leden den vloet.

+ F

32

Ende Berzellai die Galaditer was seer oudt, te weten van tachtentich iaren, ende hy gaf den coninck victalie doen hy inden legher was, Want hy was wtermaten seer rijck.

33

Aldus soo seyde die coninck tot Berzellai, Coemt met my dat ghy moecht vrijlijck rusten met my in Ierusalem.

34

Ende Berzellai seyde totten coninck, Hoe veel daghen sijnder van die iaren mijns leuens, dat ic metten coninck soude opwaerts na Ierusalem reysen?

35

Ick ben heden out tachtentich iaren, sijn mijn sinnen noch vroom ghenoech om te ondersceyden suet oft bitter? oft mach uwen dienaere voortaen ghenoechlijck sijn spijse oft dranck? oft mach ick voorts hooren den sanc vanden sangers oft sangerssen? Waer om soude dan v dienaer mijnen heere den coninck lastich wesen?

36

Laet mi uwen dienaer een luttel voorts met v gaen vander Iordanen, Ick en heb desen wederloon van gheenen doene,

37

maer ick bidde v, dat ick v dienaer mach wederom gaen, ende in mijn stadt steruen, ende begrauen worden by mijns vaders ende moeders graf, Maer daer is Chamaam v knecht laet dien met v gaen mijn heere die coninck, ende doet hem wat v goet dunct.

38

Aldus seyde die coninc tot hem, Laet Chamaam met my voorts gaen, ende ick sal hem doen al dat v belieft, ende al dat ghi van my begheren sult, dat suldi vercrijghen.

39

⁺Als dan alle het volck ende die coninck ouer die Iordane comen waren, soo heeft die coninck Berzellai ghecust ende hem gebenedijt, ende hy is wederom ghekeert in sijn plaetse.

+ G

40

Aldus soo is die coninck voorts ouer ghetrocken tot Galgala, ende Chamaam met hem, ende alle dat volc van Iuda hadde den coninck ouer ghehaelt, ende daer en hadde maer die helicht van het volck van Israel by gheweest.

41

Hier om alle die mannen van Israel tsamen totten coninck loopende seyden hem, Waerom hebben ons broeders die mannen van Iuda v heymelijck ghenomen, ende den coninck ende alle sijn huys ouder die Iordane ghehaelt, ende alle Dauids mannen met hem?

42

Ende alle die mannen van Iuda antwoorden tot die mannen van Israel, Om dat die coninck ons naerder is, wat stoort ghy v om dese sake? Hebben wy den coninck iet af gheteert, oft sijn ons eenighe ghiften ghegheuen?

43

Ende elck man van Israel antwoorden tot die mannen van Iuda, ende seyde, Thien deelen ben ick meerder by den coninck, ende Dauid gaet my meer aen dat v lieden, waer om hebdi my onghelijck ghedaen, ende waer om en eest my niet ierstmael ontboden dat ick mijnen coninck souden wederom halen? Maer die mannen van Iuda hebben straffelijcker gheantwoordt dan die mannen van Israel.