Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ALdus Dauid sijn volck ouersiende heeft daer ouer ghestelt capiteynen van duysent mannen, ende van hondert mannen,

+ A

2

ende hy gaf dat derden deel des volcs onder Ioabs hant ende het derden deel onder die hant van Abisai die sone van Saruie Ioabs broeder, ende het derden deel onder die hant van Ethai die van Geth was. Ende die coninck seyde tot den volcke, Ick sal oock met v lieden wt trecken.

3

Ende het volck heeft gheantwoordt, Ghy en sult niet wt trecken, Want al eest dat wij vlieden, soo en sal hen daer niet veel aen ligghen, oft oock al wordt die helicht van ons verslaghen, daer en sullen sij niet veel nae vraghen, Want ghy alleen wordt voor thien duysent mannen gherekent, daerom eest beter dat ghi in die stadt blijft tot onser bewaringhen.

4

Totten welcken die coninck seyde, Wat v goet dunct, dat sal ick doen. Aldus soo stont die coninck by die poorte, ende het volck ghinck wt by haren hoopen by honderden, ende duysenden.

5

Ende die coninc beual Ioab, ende Abisai, ende Ethai, segghende, Bewaert my den ionghelinck Absalom. ⁺Ende alle dat volck hoorde den coninck ghebiedende alle den princen voor Absalom.

+ B

6

Aldus soo is het volck te velde wt ghetrocken teghen Israel, ende den strijt is ghesciet in die bosschagie van Ephraim.

7

Ende dat volck van Israel is daer gheslaghen van Dauids heyr, ende daer is een groote nederlaghe ghesciet op dien dach, van twintich duysent mannen.

8

Ende den strijt was daer verstroyt ouer daenschijn van alle dat lant ende daer wasser veel meer vanden volcke die vernielt waren van die bosschagie, dan die ghene die op dien dach doort swaert verslint waren.

9

Ende het ghebuerde dat Absalom Dauids knechten te ghemoete quam sittende op eenen muyl, ende doen dien muyl gheghaen was onder eenen dicken ende grooten eycken boom, soo verhinck sijn hooft aen den eycken boom, ende die wijle dat hy hinck tusschen hemel ende aerde, soo is den muyl daer hy op sadt voorts wech ghegaen.

10

Dit sach iemant, ende bootschapte dat Ioab segghende, ⁺Ick heb Absalom sien hanghen aen eenen eycken boom.

+ C

11

Ende Ioab seyde tot den man die hem dit ghebootschapt hadde, Hebdijt ghesien, waerom en hebdi hem niet doorsteken teghen die aerde, ende ick soude v thien siclen siluers ghegheuen hebben, ende eenen wapenriem.

12

Ende hy seyde tot Ioab, Al waert dat ghy my in mijn hant duysent silueren penninghen met ghewichte ghaeft, soo en soude ick mijn handen gheenssins willen slaen aen des conincs sone, Want daer wij dat hoorden, soo beual die coninck v, ende Abisai, ende Ethai segghende, Bewaert my dat kint Absalom.

13

Maer al hadde ick dit oock stoutelijck teghen mijn ziele ghedaen, dat en soude gheenssins

[p. *259]

voor den coninck verborghen hebben moghen blijuen, ende ghy soudt daer teghen staen?

14

Ende Ioab seyde, Niet als ghy wilt, maer ick sal hem aenghaen voor v.

Aldus nam hy drij lancien in sijn hant, ende stack die in Absaloms herte, ende doen hy hem noch roerde hanghende aen die eycke,

15

soo quamen daer toe gheloopen thien ionghe mannen Ioabs wapendraghers, ende slaende hebben sij hem ghedoodt.

16

Doen blies Ioab met een trompette ende hiel dat volc stille, ⁺dat sij niet meer en souden veruolghen Israel die welcke vluchtende was, willende die menichte sparen.

+ D

17

Ende sij namen Absalom ende wierpen hem in die bosschagie in een groote grachte, ende droeghen tsamen op hem eenen hoop steenen wtermaten groot, ende gheheel Israel is gheulucht in sijn tabernakelen.

18

Maer Absalom hadde voor sijn seluen eenen tijtel opghericht doen hy noch leefde, welck is in des conincs valleye, Want hy hadde gheseyt, Ick en hebbe gheenen sone, ende dit sal een ghedenckenisse wesen van mijnen naem, ende hy noemde dien tijtele met sijnen naem, ende hy wordt ghenoemt Absaloms hant, tot opden dach van heden toe.

19

Doen seyde Achimaas Sadocs sone, Laet my loopen ende den coninck die bootscap draghen, hoe dat die Heere hem recht ghedaen heeft van die hant sijnder vianden,

20

Tot wien Ioab seyde, Ghy en sult heden gheen bode wesen, maer op eenen anderen dach suldi die bootscap draghen, Ick en wil niet dat ghy heden die bode sijn sult, want des conincs sone is doot.

21

⁺Ende Ioab seyde tot Chusi, Gaet henen ende boodtschapt den coninck dat ghy ghesien hebt. Chusi aenbadt Ioab ende liep,

+ E

22

Maer Achimaas Sadocs sone seyde wederom tot Ioab, Wat mocht letten dat ick oock nae Chusi liep? Ende Ioab seyde, Waerom wildi loopen mijn sone? Coemt herwaerts, ghy en sult gheen goede bootschap draghen.

23

Die welcke antwoorde, Wat mach dat schaden oft ic loope? Ende hy seyde, Loopt henen. Achimaas aldus loopende door eenen corteren wech, ghinck voorby Chusi.

24

Ende Dauid sadt tusschen twee poorten, Ende die wachter die opt hoochste vander poorten was opden muer heffende sijn ooghen op, sach eenen mensch alleen loopen.

25

Ende luyde roepende heeft hy den coninck dat te kennen ghegheuen. Ende die coninck seyde, Is hy alleene, soo is daer een goede bootscap in sijnen mont. ⁺Ende doen hy seer haestelijck liep ende nader quam,

+ F

26

soo heeft die wachter noch eenen anderen man sien loopen, Ende roepende int opperste seyde hy, Ick sien noch eenen mensch loopen alleen. Ende die coninck seyde, Dits oock een goet bode.

27

Ende die wachter, Ick mercke (seyde hy) den loop van den iersten als den loop van Achimaas Sadocs sone. Ende die coninck seyde, Dat is een goet man, ende hy coemt een goede boodtschap brenghende.

28

Ende Achimaas roepende seyde totten coninck, Weest ghegruet coninck, Ende aenbiddende den coninck voor hem neder op die aerde, seyde hy, Ghebenedijt sij die Heere v Godt, die beuanghen heeft die menschen die hen handen opghehauen hebben teghen mijnen heere den coninc.

29

Ende die coninck seyde, Heeft dat kint Absalom oock vrede? Ende Achimaas seyde, Ick heb een groot gherucht ghesien o coninck doen Ioab v dienaer my uwen dienaer sandt, ⁺anders en weet ick niet.

+ G

30

Totten welcken die coninck, Gaet (seyt hy) door, ende staet hier.

31

Ende als hy door ghegaen was ende stont, soo sach men Chusi, ende comende seyde hy, Ick brenghe een goede bootscap o mijn heere die coninck, want die Heere heeft heden recht ghedaen voor v, van die hant van alle die ghene die teghen v opghestaen waren.

32

Doen seyde die coninck tot Chusi, Eest ooc vrede metten kinde Absalom? Den welcken Chusi antwoordende, Worden moeten (seyt hy) ghelijck dat kint alle die vianden van mijnen heere den coninck, ende alle die ghene die teghen hem opstaen in arghe.

33

Hier om worde die coninck bedroeft, ende ghinck op die eetcamer vander poorten, ende weende. Ende alsoo sprack hy al gaende, Mijn sone Absalom, Absalom mijn sone, Wie mocht my gheuen dat ick mocht voor v steruen, Absalom mijn sone, Mijn sone Absalom.