Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvij. Capittel.

1

⁺ALdus soo seyde Achi-tophel tot Absalom, Ic sal my kiesen twelf duysent mannen, ende opstaende sal ick Dauid veruolghen desen nacht,

+ A

2

ende hem haestelijck oueruallende (aenghesien dat hy nv vermoeyt is ende onmachtich van handen) sal ic hem slaen, ende als alle het volck gheulucht sal sijn dat met hem is, dan sal ic den verlatenen coninc slaen.

3

Ende ic sal alle dat volck wederom brenghen ghelijck een mensch pleech weder omme te comen, Want ghi suect eenen man, ende alle dat volck sal in vreden sijn.

4

Ende sijn redene behaechde Absalom wel, ende allen den ouders van Israel.

5

Maer Absalom seyde, Roept Chusai den Arachiter ende laet ons hooren wat hy ooc segghen sal.

6

Ende als Chusai by Absalom comen was, soo seyde Absalom tot hem, Alsulcke redene heeft Achi-tophel gheseyt, moeten wij dat doen, oft niet? wat raet gheeft ghy?

7

Ende Chusai seyde tot Absalom, Ten is gheenen goeden raet die Achi-tophel ghegeuen heeft dese reyse,

8

⁺Ende daer toe seyde Chusai noch, Ghy kent uwen vader wel, ende die mannen die met hem sijn, dat sij seer stercke mannen sijn ende bitter van moede, Ghelijc een beyrinne haer int bosch seer wreedelijc heeft als haer ionghen ghenomen sijn, Daer toe soo is v vader een orloochs man, ende hy en sal metten volcke niet vertoeuen,

+ B

9

By auontueren hy is nv verborghen in die holen, oft op eenighe plaetse, daert hem belieft, ende als daer iemant sal int beghinsel gheuallen sijn, dat sal iemant hooren diet hooren mach, ende die sal segghen, daer is eenen slach ghesciet int volck dat Absalom volchde,

10

Ende dan sal een ieghelijc vanden stercsten, wiens herte is als eens leuws herte, van vreesen onmachtich worden, ⁺want alle tvolc van Israel weet dat v vader sterck is, ende dat sij alle vroom mannen sijn die by hem sijn.

+ C

11

Maer dit dunct my rechten raet te wesen, Laet gheheel Israel by v vergaderen, van Dan tot Bersabee, als dat sant vander zee ontellijck ende ghy sult int midden van hemlieden wesen,

12

Ende

[p. *258]

wij sullen hem oueruallen op wat plaetsen dat hy sal gheuonden worden, ende wi sullen hem ouerdecken ghelijck den dau pleech op die aerde te vallen, ende wi en sullen niet soo veel als eenen laten leuen van allen den mannen die met hem sijn.

13

Eest ooc dat hy in eenighe stadt ghegaen sal sijn, soo sullen alle die van Israel zeelen om die stadt worpen, ende wij sullen die trecken in die beke, alsoo datmen daer niet soo veel als een cleyn steenken af vinden en sal.

14

⁺Doen seyde Absalom ende alle die mannen van Israel, Den raet van Chusai den Arachiter is beter dan Achi-tophels raet. Alsoo is door des Heeren wille den oirbaerlijcken raet van Achi-tophel te niet ghedaen, om dat die Heere op Absalom quaet brenghen soude.

+ D

15

Ende Chusai seyde tot Sadoc ende Abiathar den priesteren, In dese ende in die maniere heeft Achi-tophel gheraden Absalom ende den ouders van Israel, ende ic heb aldus ende alsoo gheraden.

16

Daerom soo seyndt nv wt aen Dauid haestelijck, segghende, En blijft desen nacht op die blacke velden der woestijnen niet, maer sonder vertrecken reyst voorts ouer, op dat die coninck by auontueren niet verslonden en worde, ende alle tvolck dat met hem is.

17

Maer Ionathan ende Achimaas stonden aen die fonteyne Rogel, ende die dienstvrouwe is henen ghegaen ende heeft hem dit te kennen ghegheuen. Ende sij sijn wech ghereyst dat sij dese bootschap souden ouerdraghen aen den coninck Dauid, want sij en mochten niet ghesien sijn, oft binnen die stadt comen.

18

Maer een knecht heeftse ghesien, ⁺ende ghaeft Absalom te kennen, maer sij sijn rasschelijck ghegaen in eens mans huys te Bahurim, die welcke hadde eenen put in sijn voorhof, ende sij daelden daer inne.

+ E

19

Doen nam die vrouwe ende spraeyde een decselcleedt ouer den mont vanden put, als oft sij gherste ghedroocht hadde, ende alsoo is dat verborghen bleuen.

20

Ende als Absaloms knechten int huys totter vrouwen quamen, soo seyden sij, Waer is Achimaas ende Ionathan? Ende die vrouwe antwoorde hen, Sij sijn haestelijck voorts door gheghaen, doen sij een luttel waters ghedroncken hadden. Ende diese sochten, doen sij die niet en vonden, sijn weder comen te Ierusalem.

21

Ende doen die wech waren, soo clommen dese wt den putte, ende ghinghen henen ende bootscapten den coninck Dauid, ende seyden, Staet op, ende gaet ter stont ouer die riuiere, Want Achi-tophel heeft alsulcken raet teghen v ghegheuen.

22

⁺Aldus is Dauid opghestaen ende alle tvolck dat met hem was, ende sij ghinghen ouer die Iordane tot dat claer dach worde, ende daer en bleef niet een achter die ouer die Iordane niet en ghinck.

+ F

23

Maer Achi-tophel siende dat sijnen raet niet ghedaen en was, heeft sijnen ezel ghesadelt, ende is opghestaen, ende wech gheghaen in sijn huys, ende in sijn stadt, ende als hy sijn huys beschict hadde, soo is hy (sij seluen verhanghende) ghestoruen, ende in sijns vaders graf begrauen.

24

Ende Dauid is ghecomen inden legher, ende Absalom is ouer die Iordane ghetrocken, hy ende alle die mannen van Israel met hem,

25

Maer Absalom stelde Amasam voor Ioab ouer dat heyr. Ende Amasa was eens mans sone die Iethra hiet van Iesraeli, die welcke hem versaemt heeft met Abigail Naas dochter, ⁺die suster van Saruie, die welcke Ioabs moeder was.

+ G

26

Ende Israel heeft sijnen legher ghemaect met Absalom int lant van Galaad.

27

Ende als Dauid inden legher comen was, Doen brachten hem Sobi Naas sone van Rabbath der kinderen van Ammon, ende Machir Amihels sone, van Loda-bar, ende Berzellai een Galaaditer van Rogelim,

28

beddecleederen ende tapijten, ende aerden vaten, tarwe, ende gherste, ende meel, ende brij, ende boonen, ende linsen, ende gherooste ciceren,

29

ende honich ende boter, scapen ende vette calueren, ende sij hebbent Dauid ghegheuen ende den volcke dat met hem was om teten, want sij vermoeden dattet volck van hongher ende dorst moede was gheworden in die woestijne.