Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde doen Dauid een luttel ouer dat hoochste vanden berghe ghegaen was, soo quam Siba Miphi-boseths knecht hem te ghemoete, met twee ezels die gheladen waren met tweehondert brooden ende hondert bondelen rosijnen, ende hondert clonten vijghen, ende twee leren wijnflesschen.

+ A

2

Ende die coninck seyde tot Siba, Wat wildi hier mede doen? Ende Siba antwoorde, Die ezelen voor des conincs huysgesin dat sij daer op sitten souden, ende die brooden ende die vijghen voor v knechten om te eten, ende den wijn dat sij dien drincken souden waert datter iemant flau worde in die woestijne.

3

Ende die coninck seyde, Waer is ws heeren sone? Ende Siba antwoorde den coninck, Hy is te Ierusalem bleuen segghende, Heden sal het huys van Israel my wederom gheuen mijns vaders conincrijck.

4

Ende die coninc seyde tot Siba, Het sij al uwe tghene dat Miphiboseth pleech toe te behooren. Ende Siba seyde, Ic bidde v mijn heere die coninck dat ic gratie voor v vinden mach.

5

Aldus soo is die coninck Dauid comen tot Bahurim, Ende siet daer quam een man wt van Sauls huys maescap Semei ghenoemt, een sone van Gera, ende hy quam voorts uwtgaende ende hy vermalendijde,

6

⁺Ende hy wierp steenen teghen Dauid, ende teghen alle des conincs Dauids knechten, ende alle dat volck ende alle die strijtbaer mannen ghinghen ter rechter ende ter slincker sijden des conincs.

+ B

7

Ende aldus sprack Semei doen hy den coninck vermalendijde, Gaet wt, gaet wt, ghy bloetghierich man, ende ghy belials man,

8

Die Heere heeft v betaelt voor alle dat bloet van Sauls huys, om dat ghy trijck hebt inghenomen in sijn plaetse, ende nv heeft die Heere het rijck in ws soons Absaloms hant gegeuen, ende siet uwe quade wercken verdrucken v, want ghi sijt een bloetghierich man.

9

Doen seyde Abisai die sone van Saruia tot den coninc Waer om vermalendijt desen hont die steruen moet den coninck? Laet my gaen, ende ick sal hem thooft afslaen.

10

Ende die coninck seyde, Wat heb ick met v te doen ghy kinderen Saruie? Laet hem vermalendijden, Want die Heere heeft hem beuolen dat hy Dauid vermalendijden soude, Ende wie isser die soude derren segghen waerom dat hy dit also ghedaen heeft?

11

Ende die coninck heeft gheseyt tot Abisai, ende tot alle sijnen knechten, ⁺Siet mijn sone die wt mijnen lichaem comen is, soect mijn ziele, hoe veel te meer dese sone van Iemini? Laet hem gheworden, dat hy vermalendijde nae des Heeren ghebodt,

+ C

12

Oft die Heere by auontueren mijn lijden aensaghe, ende dat my die Heere goet wederom gaue voor dese vermalendijdinghe op desen dach.

13

Aldus soo is Dauid voorts ouer den wech ghegaen ende sijn ghesellen met hem. Maer Semei ghinck ouer die hoochde vanden berghe ter sijden, teghen hem, vermalendidende ende met steenen worpende teghen hem, ende aerde sprayende.

14

Aldus soo is die coninc comen ende alle tvolc met hem al moede, ende sij sijn vermaect aldaer.

15

Maer Absalom ende alle sijn volck sijn te Ierusalem binnen comen, ende Achi-tophel oock met hem.

16

Maer doen Chusai die Arachiter Dauids vrindt by Absalom comen was, soo heeft hy tot hem gheseyt Weest ghegroet coninck, weest ghegroet coninck.

17

Totten welcken seyde Absalom, Is dit v gratie tot uwen vrint? Waerom en sijt ghy met uwen vrint niet gheghaen?

18

Ende Chusai antwoorde tot Absalom, Gheenssins, maer ick sal diens sijn, ⁺den welcken die Heere vercoren heeft, ende alle dit volck, ende gheheel Israel, ende met dien sal ic blijuen,

+ D

19

Maer (op dat ick dat ooc bybrenghe) wien sal ic dienen? en sal ick des conincs sone niet dienen? Ghelijck ick uwen vader ghehoorsaem gheweest hebbe, alsoo sal ic v ooc ghehoorsaem sijn.

20

Doen seyde Absalom tot Achi-tophel, Gaet te rade wat dat wij doen moeten,

21

Ende Achi-tophel seyde tot Absalom, Versaemt v met ws vaders concubinen die hy ghelaten heeft om dat huys te bewaren, op dat gheheel Israels handen met v moghen versterct worden, als sij sullen ghehoort hebben, dat ghi uwen vader ontsuyuert hebt.

22

Aldus soo hebben sij Absalom een tabernakel ghespannen opden solder, Ende hy is inghegaen tot sijns vaders concubinen voor gheheel Israel.

23

Ende den raet van Achi-tophel, den welcken hi in dien daghen gaf, was recht oft iemant van Godt raet gheuraecht hadde, sulck was alle den raet van Achi-tophel, soo wel doen hy met Dauid was, als doen hy met Absalom was.