Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ALdus nae desen so heeft Absalom voor sij seluen ghemaect waghenen, ende rosvolck, ende vijftich mannen die voor hem gaen souden.

+ A

2

Ende Absalom des morghens vroech opstaende stont by den inganck vander poorten inden wech, ende so wat man eenighe sake hadde om te comen tot des conincs recht, dien riep Absalom by hem, ende seyde, Van wat stadt sijt ghy? Ende als die antwoordende seyde, Wt een van Israhels gheslachten ben ic v dienaer,

3

soo antwoorde hem Absalom, My dunct dat v redenen goet ende rechtuerdich sijn, maer daer en is niemant vanden coninck ghestelt die v hooren mach.

4

Ende Absalom seyde ooc, Wie mocht my een richter maken ouer dlant dat sij alle tot my quamen die eenighe sake hadden, ende dat ic die mocht rechtuerdelijck ordeelen?

5

Oock soo wanneer eenich mensch by hem quam om hem te groeten, so reycte hy sijn hant wt, ende grijpende custe hy dien.

6

Ende hy dede dat alle die van Israel die te rechte quamen om vanden coninck ghehoort te worden, ⁺ende hy track tot hem die herten der mannen van Israel.

+ B

7

Maer nae veertich iaren soo seyde Absalom tot den coninck Dauid, Laet my gaen, ende mijn belofte betalen welck ic den Heere te Hebron gheloeft hebbe,

8

Want doen v dienaer te Gessur in Syrien was, soo gheloefde hy een ghelofte segghende, Eest sake dat die Heere my wederom brenghet te Ierusalem soo sal ick den Heere een sacrificie doen.

9

Ende die coninck seyde tot hem, Gaet henen in vreden. Ende hy is opghestaen ende wech ghegaen tot Hebron.

10

Ende Absalom heeft bespieders wt ghesonden tot alle die gheslachten van Israel, segghende, Terstont als ghy het gheluyt der trompetten hooren sult, soo segghet Absalom sal regneren te Hebron.

11

Voorts so waren met Absalom twee hondert mannen gheghaen van Ierusalem gheroepen, gaende met simpelder herten ende niet met allen wetende vander saken.

12

Oock soo heeft Absalom doen halen Achi-tophel den Giloniter Dauids raetsman wt sijnder stadt van Gilo. ⁺Ende als hy slachofferanden offerde, so isser een machtich verbont by eede ghemaect, ende het volck loopende te hoope vermeerderde met Absalom.

+ C

13

Hierom isser eenen bode aen Dauid ghecomen segghende, Gheheel Israel volcht Absalom met gheheelder herten.

14

Ende Dauid seyde tot sijnen knechten die met hem te Ierusalem waren, Staet op laet ons vlieden, want ons en sal gheen ontulieden sijn voor Absaloms aensicht Haest v om wt te gaen, op dat hy by auontuere comende ons niet en ouerualle, ende volbringhe ouer ons den val, ende slae die stadt door tscerp vanden sweerde.

15

Ende des conincs knechten seyden tot hem, Alle dat ons heere die coninck ghebiedet dat sullen wij v dienaers gheerne volbringhen.

16

Hier om soo is die coninck wtghegaen, ende alle sijn huysghesin met haren voeten, ende die coninck liet daer thien vrouwen van sijnen concubinen om dat huys te bewaren.

17

Ende die coninck wtgaende ende alle die van Israel met haren voeten stont verre vanden huyse,

18

⁺ende alle sijn knechten wandelden neffens hem, ende die hoopen Cerethi ende Pheleti, ende alle die Gethiters, vrome crijschluyden, ses hondert mannen die hem gheuolcht waren van Geth, ghinghen te voete voor den coninck.

+ D

19

Ende die coninc seyde tot Ethai den Gethiter, Waerom coemt ghy met ons? keert wederom, ende woont metten coninck, want ghy sijt een vreemdelinck, ende ghy sijt wt uwer steden ghegaen,

20

Ghisteren quaemt ghi ende heden wordi ghedwonghen met ons wt te gaen? maer ic sal gaen derwaerts dat ic gaen sal, keert weder om ende leyt v broeders met v wederom, Ende die Heere sal met v bermherticheyt ende warachticheyt doen, want ghy hebt gratie ende trouwe ghetoont.

21

Ende Ethai antwoorde den coninck segghende, Alsoo warachtelijck als die Heere leeft, ende als mijn heere die coninck leeft, op wat plaetsen dat ghi sijn sult, mijn heere die coninc, tsij in die doot oft int leuen, ⁺daer sal v dienaer wesen.

+ E

22

Ende Dauid seyde tot Ethai, Coemt ende gaet door. Ende Ethai die Gethiter ghinck voorts ouer ende alle die mannen die met hem waren, ende die ander menichte.

23

Ende sij weenden allegader met luyder stemmen, ende alle dat volck ghinck ouer den wech, ende die coninck is oock ghegaen ouer die beke van Cedron, ende alle dat volck ghinck teghen den wech des olijfbooms die teghen ouer die woestijne is.

24

Doen quam daer ooc Sadoc die priester ende alle die Leuiten met hem, draghende die arcke van Godts verbont, ende sij hebben die arcke van Godts verbont nedergheleyt. Ende Abiathar is opwaerts ghegaen, tot dat alle dat volck voorby ghepasseert was dat wt der stadt ghegaen was.

25

Ende die coninck seyde tot Sadoc, Draecht Godts arcke wederom in die stadt, eest sake dat ic gratie vinde in die ooghen des Heeren, so sal hy my wederom brenghen, ende hy salse my toonen ende sijn tabernakel.

26

Maer eest dat hy my segt, Ghy en behaecht my niet, ⁺so ben ic bereyt, Hy doe dat goet is voor hem.

+ F

27

Ende die coninck seyde tot Sadoc den priester, O ghy siender ghaet wederom met vrede in die stadt, ende Achimaas v sone, ende Ionathan Abiathars sone, v twee sonen laet by v sijn.

28

Siet ick sal verberghen sijn in dat plat lant der woestijnen, tot datter een bootschap van v sal comen, my te kennen gheuende.

29

Aldus soo hebben Sadoc ende Abiathar Godts arcke wederom in Ierusalem ghedraghen, ende sij sijn daer bleuen.

30

Maer Dauid ghinck op den berch vanden olijfboomen opclimmende ende weenende, ende met blooten voeten gaende, ende met bedecten hoofde, ende ooc alle het volck dat met hem was ghinc opwaerts met bedecten hoofde al weenende.

31

Ende het werde Dauid ghebootscapt dat Achitophel oock in die ghesworen bende was met Absalom, ende Dauid seyde, Ick bidde v Heere, maect dwaes Achitophels raet.

32

⁺Ende als Dauid climmende was op thoochste vanden berghe daer hy den Heere soude aenbidden, siet soo quam hem te ghemoete Chusai die Arachiter met ghescoerden cleederen, hebbende sijn hooft heel met aerden bedect.

+ G

33

Ende Dauid seyde tot hem, Eest sake dat ghy met my coemt, soo suldi my lastich wesen,

34

maer eest sake dat ghi wederom in die stadt gaet, ende dat ghi segghet tot Absalom V dienaer ben ic o coninck, laet my doch leuen, ghelijck ic ws vaders dienaer gheweest hebbe, alsoo sal ic v dienaer sijn, soo suldi den raet van Achi-tophel te niet doen.

35

Ende ghy hebt met v Sadoc ende Abiathar die priesters, ende alle die woorden die ghy hooren sult van des conincs huys, suldi den priesteren Sadoc

[p. *257]

ende Abiathar laten weten,

36

want met hen sijn hen twee sonen Achimaas Sadocs sone, ende Ionathan Abiathars sone, ende met desen suldi aen my seynden alle die woorden die ghy hooren sult.

37

Aldus doen Chusai Dauids vrint in die stadt quam, soo is Absalom oock in Ierusalem comen.