Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiiij. Capittel.

1

⁺MAer Ioab die sone van Saruie verstaende dat des conincs herte tot Absalom gekeert was,

+ A

2

heeft ghesonden tot Thecua, ende van daer doen halen een wijse vrouwe, ende hy seyde tot haer, Ghelaet v als oft ghy rou droecht, ende doet rouwe cleederen aen, ende en salft v niet met olien, dat ghy moecht sijn ghelijck een vrouwe die langhen tijt rouwe ghedraghen heeft ouer eenen dooden,

3

ende ghi sult binnen by den coninck ghaen, ende tot hem spreken aldusdanighe redenen. Ende Ioab heeft die woorden in haren mont ghestelt.

4

Aldus doen die vrouwe van Thecua by den coninck comen was, soo viel sij voor hem neder ter aerden, ende heeft aenbeden ende seyde, Bescermt my o coninck.

5

Ende die coninck seyde tot haer, Wat saken hebdi? Sij antwoorde, Eylaes ick ben een vrouwe die weduwe is, want mijn

[p. *255]

[afbeelding] man is ghestoruen.

6

Ende v dienstvrouwe hadde twee sonen, die welcke teghen malcanderen hebben ghekeuen opt velt, ⁺ende daer en was niemant by, diese hadde moghen beslichten, ende die eene heeft den anderen gheslaghen ende hem ghedoot.

+ B

7

Ende siet nv alle dat gheslachte opstaende teghen v dienstvrouwe seyt Leuert hem ouer die sijnen broeder verslaghen heeft, dat wij hem ooc dooden moghen voor sijns broeders ziele die hy ghedoot heeft, ende laet ons den erfghenaem te niet doen, ende sij soecken mijn vonxken wt te blusschen, welck my ouerbleuen is, alsoo dat mijnen man gheenen naem ende gheen nacomelinghen meer ouerblijuen en souden op aertrijck.

8

Ende die coninc seyde totter vrouwen, Gaet henen in v huys, ende ick sal ghebieden tot uwen voordeele.

9

Ende die vrouwe van Thecua seyde totten coninck, Mijn Heere die coninck, dese onrechtuerdicheyt sij op my, ende op mijns vaders huys, maer die coninc ende sijnen throon die moeten ontsculdich sijn.

10

Ende die coninck seyde, Soo wie teghen v seyt, brengt dien tot my, ende hy en sal voortaen niet meer daer toe doen om v aen te tasten.

11

Ende sij seyde, Die coninck ghedencke des Heeren sijns Godts, also dat die naesten des bloets niet te veel en worden om wraeck te doen, ende dat sij mijnen sone gheensins en dooden. ⁺Die welcke seyde, Alsoo warachtelijck als die Heere leeft, so en sal daer niet een hair van ws soons hooft op die aerde vallen.

+ C

12

Aldus soo heeft die vrouwe gheseyt, Laet v dienstvrouwe tot mijne heere den coninc een woort spreken. Ende hy seyde Spreect.

13

Ende die vrouwe seyde, Waerom hebdi alsulcken dinck teghen Gods volck ghedacht, ende waerom heeft die coninck dit woordt ghesproken, om te sondighen, ende dat hy sijnen ballinck niet wederom en haelt?

14

Wij steruen alle gader, ende als wateren vallen wij inder aerden die niet wederom en comen, ende Godt en wilt niet dat die ziele sal verloren gaen, maer hy ouerleyt dat denckende dat sulck niet heel verloren en gae die verworpen is.

15

Daerom soo ben ick nv comen dat ic dit woordt soude spreken tot mijnen heere den coninck in die teghewoordicheyt des volcs, Ende v dienstvrouwe seyde, Ick sal totten coninc spreken, oft die coninck eenichsins het woordt van sijnder dienstvrouwen dede,

16

Ende die coninck heuet ghehoort dat hy sijn dienstwijf soude verlossen wt die hant van alle den ghenen die my ende mijnen sone tsamen wilden te niet doen, ⁺wt des Heeren erfdeel.

+ D

17

Aldus soo laet v dienstvrouwe spreken, dat mijns heeren des conincs woordt worde ghelijck een sacrificie, Want mijn heere die coninck is ghelijck eenen Enghel des Heeren, alsoe dat hy niet beweecht en wordt noch door ghebenedidinghe oft door veruloeckinghe, ende daer om is die Heere v Godt met v.

18

Ende die coninck antwoordende seyde totter vrouwen, En verborcht voor my niet het woordt dat ick v vraghe. Ende die vrouwe seyde tot hem, Spreect mijn heere die coninc.

19

Ende die coninck seyde, En is Ioabs hant met v niet in alle dese redenen? Ende die vrouwe antwoorde ende seyde, ⁺By die salicheyt van uwer zielen mijn heere die coninck, ten is ander niemant noch ter rechter sijden noch ter slincker sijden, van alle desen welck mijn heere die coninc ghesproken heeft, Want v dienaer Ioab heeft seluer my dit beuolen, ende hy heeft alle dese woorden uwer dienstvrouwen inden mont ghegheuen,

+ E

20

Dat ic die ghelijckenisse van deser redenen soude ommekeeren, dit heeft v dienaer Ioab my beuolen, maer ghy mijn heere die coninc sijt wijs ghelijc een Enghel Gods wijsheyt heeft, om te verstaen alle saken opder aerden.

21

Ende die coninck seyde tot Ioab, Siet ic ben te vreden ghestelt, ende heb ghedaen nae v woordt. Hierom soo gaet henen ende roept wederom den ionghelinc Absalom.

22

Ende Ioab op sijn aensicht ter aerden vallende aenbede ende ghebenedijde den coninck, ende Ioab heeft gheseyt, Heden heeft v dienaer verstaen dat ick gratie vonden hebbe voor v ooghen, mijn Heere die coninck, want ghi coninc hebt nae ws dienaers woorden ghedaen.

23

Aldus soo is Ioab opghestaen ende is wech ghegaen te Gessur ende heeft Absalom te Ierusalem bracht.

24

Ende die coninck seyde, ⁺Laet hem in sijn huys wederom keeren, maer dat hy mijn aensicht niet en sie. Aldus is Absalom wederom in sijn huys ghegaen, ende hy en heeft des conincs aensicht niet ghesien.

+ F

25

Maer ghelijck Absalom en was gheen soo schoonen man in gheheel Israel, ende bouen maten seer weselijck, Van dat hol sijnder voeten, tot den top van sijnen hoofde en was aen hem niet een smette.

26

Ende als hy dat hayr sijns hoofs af schoer (want eens tsiaers werde hy gheschoren om dat den crans sijns hairs hem beswaerde) soo woech het hair van sijnen hoofde twee hondert siclen, nae dat ghemeyn ghewicht.

27

Ende Absalom werden gheboren drij sonen, ende een dochter Thamar ghenoemt, schoon van ghedaente.

28

Ende Absalom bleef te Ierusalem twee iaren ende hi en sach des conincs aensicht niet.

29

Hierom heeft hy aen Ioab ghesonden, dat hy hem aen den coninc soude senden, maer hy en wilde by hem niet comen. Ende doen hy die tweede reyse ghesonden hadde, ende hy niet en wilde comen tot hem,

30

soo seyde hy sijnen knechten, Ghy weet wel Ioabs acker byden mijnen hebbende nv eenen oochst ghersten. Aldus gaet derwaerts ende verbrant dien metten viere. Hier om soo hebben Absaloms knechten dat coren opt lant aenghesteken metten viere. Ende Ioabs knechten comende met ghescoerde cleederen hebben gheseyt, Absaloms knechten hebben een deel vanden acker metten viere verbrant.

31

⁺Ende Ioab stont op ende quam tot Absalom in sijn huys ende seyde, Waer om hebben v knechten mijn coren metten vier verbrant?

+ G

32

Ende Absalom antwoorde tot Ioab, Ic heb aen v ghesonden biddende dat ghy by my comen soudt, ende dat ick v seynden soude aenden coninck, ende dat ghy hem segghen soudt, Waerom ben ic van Gessur comen? het was my beter daer te sijne, aldus soo bidde ic, dat ic mach des conincs aensicht sien, maer is hy noch ghe-

[p. *256]

dachtich mijnder boosheyt, soo slae hy my doot.

33

Aldus so is Ioab byden coninc ghegaen sijnde heeft hem dese dinghen al te kennen ghegeuen, ende Absalom is gheroepen, ende hy quam in byden coninck, ende aenbede op daensiht der aerden voor hem, ende die coninck heeft Absalom ghecust.