Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺DAer nae so ist ghesciet dat Amnon Dauids sone verlieft is geweest op die alderscoonste suster van Absalom Dauids sone ghenoemt Thamar,

+ A

2

ende hy was soo seer op haer verlieft, dat hy sieck worde om haerder liefden, want aenghesien dat sij maghet was, soo docht hem swaer om doen, dat hy iet oneerlijcs met haer soude bedrijuen.

3

Maer Amnon hadde eenen vrint ghenaemt Ionadab, een sone van Semmaa Dauids broeder, een seer wijs man,

4

Die welcke seyde tot hem, Waer af wordi soo magher van daghe te daghe ghy conincs sone? Waerom en gheeft ghy my dat niet te kennen? Ende Amnon heeft tot hem gheseyt, Ick heb Thamar Absoloms mijns broeders suster lief.

5

Ende Ionadab heeft hem gheantwoordt, Ligghet op v bedde, ende veynst oft ghy sieck waert, ende als v vader comen sal om v te besoecken, soo seght hem, Ick bidde v laet doch Thamar mijn suster comen dat sij my teten gheue, ende dat sij my een pappeken make, dat ict wt haer hant mach eten.

6

Aldus soo heeft Amnon gaen ligghen te bedde, ende hy heeft hem begonst te ghelaten als een sieck mensch, ⁺ende als die coninck comen was om hem te besoecken, soo seyde Amnon totten coninck, Ic bidde v laet doch Thamar mijn suster comen, dat si voor mijn ooghen twee suypekens make, ende dat ict wt haer hant ete.

+ B

7

Hierom soo heeft Dauid aen Thamar in haer huys ghesonden segghende, Coemt in

[p. *254]

Amnon ws broeders huys, ende maect hem een pappeken.

8

Ende Thamar is in Amnons haers broeders huys comen, maer hy lach, Die welcke nemende meel heeft dat ghemenghet ende makende dat al dunne voor sijn ooghen heeft sij dat ghesoden tot suypekens

9

Ende nemende dat sij ghesoden hadde heeft sij dat wtghegoten, ende steldet voor hem, ende hy en wildet niet eten. Ende Amnon seyde, Iaechtse alle van my. Ende als sij die alle hadden doen wtgaen,

10

doen seyde Amnon tot Thamar, Brengt die spijse in die camer binnen dat ict van uwer hant ete. Hierom so heeft Thamar dat suypen ghenomen welck sij ghemaect hadde, ende dat by haren broeder Amnon bracht in die camer.

11

⁺Ende als sij hem die spijse ghebracht hadde, so greep hy haer, ende seyde, Coemt ende slaept by mi, mijn suster,

+ C

12

Die welcke antwoorde, En wilt niet mijn broeder en wilt my niet vercrachten, want dat en is niet gheorlooft in Israel, en wilt dese dwaesheyt niet doen,

13

Want ic en sal mijn scande niet connen verdraghen, ende ghy sult sijn als een vanden dwasen in Israel, Maer lieuer spreect tot den coninc ende hy en sal my v niet ontsegghen.

14

Maer hy en wilde nae haer beden niet doen, maer verwinnende metter macht heeft hy haer vercracht, ende heeft hem met haer versaemt.

15

Ende Amnon haettese met eenen bouen maten seer grooten haet, also dat dien haet daer hijse mede haette meerder was, dan die liefde daer hy haer te voren mede lief ghehadt hadde. Ende Amnon seyde tot haer, Staet op ende ghaet wech,

16

Die welcke antwoorde, Meerder is dit quaet dat ghi nv teghen my doet, my wtstootende, dan dat ghy te voren ghedaen hebt. Ende hy en wilde haer niet hooren,

17

maer roepende den ionghe die hem diende, heeft hy gheseyt, Stoot dese van my daer buyten, ende sluyt die doore achter haer toe.

18

Die welcke was ghecleet met eenen tabbaert totten voeten toe, want alsulcken habijt droeghen des conincks dochteren die noch maechden waren. ⁺Aldus heeft haer die dienaer wtghestooten, ende die doore achter haer toe ghesloten.

+ D

19

Die welcke spraeyende asschen op haer hooft, ende scoerende haren tabbaert lanck totten voeten, ende legghende haer handen op haer hooft ghinc al gaende ende roepende.

20

Doen seyde Absalom haer broeder tot haer, Heeft Amnon v broeder hem met v versaent? Maer nv suster swijcht, het is v broeder, noch en wilt v herte niet bedroeuen om dit dinck. Aldus so bleef Thamar verdwijnende in Absaloms huys.

21

Maer als die coninck Dauid dese woorden ghehoort hadde, soo is hy seer bedroeft gheweest, ende hy en wilde Amnons sijns soons gheest niet bedroeuen want hy hadde hem lief om dat hy sijn ierste gheboren sone was.

22

Ende Absalom en heeft Amnon niet gheseyt noch goet noch quaet, want Absalom haette Amnon, om dat hy Thamar sijn suster ghescent hadde.

23

Ende het is ghebuert na den tijt van twee iaren, datmen Absaloms scapen schoer, te Baal-hasor, ⁺welc is by Ephraim, ende Absalom heeft alle des conincs sonen gheroepen,

+ E

24

ende hi is by den coninck comen, ende seyde tot hem, Siet ws dienaers schapen sullen worden ghescoren, Ick bidde dat die coninck met sijnen knechten wil tot sijnen dienaer comen.

25

Ende die coninck seyde tot Absalom, En wilt niet (mijn sone) en wilt niet bidden, dat wij alle souden comen, ende v verlasten. Maer doen hy hem seer quelde, ende hy niet ghaen en wilde, soo heeft hy hem ghebenedijt.

26

Ende Absalom seyde, Eest dat ghy niet comen en wilt soo bidde ick v dat te minsten Amnon mijn broeder met ons mach comen. Ende die coninck seyde tot hem, Ten is gheen noot dat hy met v gae.

27

Maer Absalom dwanck hem, ende hy heeft Amnon met hem laten gaen, ende alle des conincs sonen.

28

Aldus soo hadde Absalom eenen maeltijt bereyt ghelijck eens conincs maeltijt. Maer Absalom hadde sijnen knechten beuolen segghende, ⁺Merct wel aen wanneer dat Amnon droncken wert vanden wijne, ende als ict v segghen sal, soo slaet ende doodet hem, en wilt niet vreesen, want ic bent diet v beuele, weest vroem, ende weest stercke mannen.

+ F

29

Aldus soo hebben Absaloms knechten teghen Amnon ghedaen ghelijc hen Absalom beuolen hadde, ende alle des conincs sonen opstaende sijn elck op hen muylen ghaen sitten, ende vluchten wech.

30

Ende doen sij noch opden wech reysden, soo is die tijdinghe aen Dauid comen segghende, Absalom heeft alle des conincs sonen verslaghen, ende daer en is niet soo veel als een ouerbleuen.

31

Hierom soo is die coninck opghestaen ende heeft sijn cleederen ghescoert, ende viel neder op die aerde, ende alle sijn knechten die by hem stonden scoerden oock haer cleederen.

32

Maer Ionadab die sone van Semma Dauids broeder antwoordende seyde, Mijn heere die coninck en laet hem niet duncken, dat alle des conincks kinderen doot gheslaghen sijn, Amnon is alleen doot, want hy was in Absaloms mont ghestelt van dien daghe dat hi Thamar sijn suster vercrachte

33

Daerom nv mijn heere die coninc en stelle dit woort niet op sijn herte segghende, alle des conincks sonen sijn dootgheslaghen, want Amnon is alleen doot.

34

Maer Absalom is gheuloden. ⁺Ende die knecht die wachtere hief op sijn ooghen, ende sach toe, ende siet daer quam een groot volck door eenen zijwech ter sijden vanden berch.

+ G

35

Ende Ionadab seyde tot den coninc Siet des conincs sonen sijn hier by, nae ws dienaers woordt alsoo eest ghesciet.

36

Ende als hy ophiel van spreken, so sachmen des conincs sonen, ende binnen comende soo hieuen sij haer stemmen op, ende weenden, desghelijcs soo heeft die coninck ende alle sijn dienaers oock gheweent met een wtnemende groot ghescreye.

37

Ende Absalom vliedende is wech ghegaen tot Tholomai Ammiuds sone den coninc van Gessur. Hierom soo heeft Dauid grooten rouwe ghemaect ouer sijnen sone seer veel daghen lanck.

38

Maer doen Absalom gheuloden was ende ghecomen te Gessur, soo is hy daer bleuen drij iaren. Ende die coninc Dauid en veruolchde Absalom niet meer, om dat hi ghetroost was van Amnons doot.