Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xij. Capittel.

1

⁺HIerom soo heeft die Heere Nathan aen Dauid ghesonden, die welcke als hy tot hem comen was, so seyde hi hem, Twee mans waren in een stadt, die eene was rijck, ende die ander arm,

+ A

2

Die rijcke man hadde seer veel scapen ende runderen,

3

maer die arme man en hadde niet met allen, dan een cleyn scaepken, het welck hy ghecocht ende opgheuoet hadde, ende twas groot gheworden tsamen met sijnen kinderen, het adt van sijnen broode, ende het dranck wt sijnen beker ende tsliep in sijnen schoodt, ende het was hem als een dochter,

4

Maer doen totten rijcken man eenen vreemden ghast comen was, soo heeft hy vermijdt te nemen van sijn scapen ende runderen om dien vreemden gast (die tot hem comen was) eenen maeltijt te gheuen, ⁺maer hy heeft des armen mans scaepken ghenomen, ende daer af spijse bereyt den mensch die tot hem comen was.

+ B

5

Ende Dauid gram sijnde met een verbolghentheyt teghen dien man, seyde tot Na-

[p. *253]

than, Also warachtelijc als die Heere leeft, die man is een kint des doots die dat gedaen heeft,

6

Dat scaep sal hy vier dobbel wederom gheuen, om dat hy dit woordt volbracht heeft, ende niet vermijdt en heeft.

7

Doen seyde Nathan tot Dauid, Ghy sijt die man, Dit seyt die Heere die Godt van Israel, Ick heb v ghesalft tot eenen coninck ouer Israel, ende ick heb v wt Sauls hant verlost,

8

ende ic heb v ws Heeren huys ghegeuen, ende ws Heeren huysvrouwen in uwen schoot, ende ic heb v dat huys van Israel ende van Iuda ghegheuen, ende sijn dit cleyn dinghen, soo sal ick v noch veel meerder dinghen daer toe worpen,

9

Waerom hebdi dan des Heeren woordt versmaet, dat ghy quaet doen soudt voor mijn aensicht? Vriam den Hethiter hebdi metten swaerde verslaghen, ende sijn huysvrouwe hebdi voor v tot eender huysvrouwen ghenomen, ende ghy hebt hem ghedoot met den swaerde der kinderen van Ammon,

10

⁺Daer omme so en sal dat swaert van uwen huyse niet wech gaen, tot inder eewicheyt, om dat ghy my versmaet hebt, ende dat ghi die huysvrouwe van Vrias den Hethiter ghenomen hebt, dat sij v huysvrouwe wesen soude,

+ C

11

Aldus dit seyt die Heere, Siet ic sal een quaet op v verwecken wt uwen huyse, ende ic sal v huysvrouwen nemen voor v ooghen, ende die uwen naesten gheuen, ende hy sal by v huysvrouwen slapen, voor die ooghen van deser sonnen,

12

Want ghy hebt dit al bedectelijck ghedaen, maer ic sal dit woordt volbringhen voor daenschijn van gheheel Israel, ende voor dat ghesichte der sonnen.

13

Ende Dauid seyde tot Nathan, Ic heb den Heere ghesondicht. Ende Nathan seyde tot Dauid Die Heere heeft v sonde ooc wech ghenomen, ghy en sult niet steruen,

14

⁺Maer nochtans aenghesien dat ghy des Heeren vianden hebt doen blasphemeren, om dit woort sal dese sone die v gheboren is die doot steruen.

+ D

15

Ende Nathan is wederom in sijn huys ghegaen. Ende die Heere heeft dat ionc kint gheslaghen dwelck Vrias huysvrouwe Dauid ghebaert hadde, ende daer en was gheen hope van sijnen leuen.

16

Ende Dauid heeft den Heere gebeden voor dat kint, ende Dauid heeft een vasten gheuast, ende hy is inghegaen alleene ende lach opder aerden.

17

Ende die ouders van sijnen huyse sijn comen dwinghende hem dat hy opstaen soude vander aerden, maer hi en wilde dat niet doen, noch hy en heeft met henlieden gheen spijse gheten.

18

Aldus soo ghebuerdet opden seuensten dach dat het kint sterf, ende Dauids knechten en dorsten hem dat niet segghen dattet kint doot was, want sij seyden, Siet doen dat kindeken noch leefde, soo spraken wi hem aen, ⁺ende hy en hoorde onse stemme niet, hoe veel te meer, eest sake dat wij segghen, Het kint is doot, sal hy hem seluen pijnighen?

+ E

19

Als nv Dauid sijn knechten hoorde heymelijck veselen, soo heeft hy verstaen dat het kindeken doot was, ende seyde tot sijn knechten, Is dat kint doot? Ende sij antwoorden hem, Het is doot.

20

Ende Dauid stont op vander aerden ende heeft hem ghewasschen ende ghesalft, ende als hy sijn cleedt verandert hadde, soo is hy in des Heeren huys ghegaen ende heeft aenbeden, ende is weder in sijn huys ghecomen, ende hy begheerde datmen hem broot voorlegghen soude, ende hy heeft gheten.

21

Doen seyden hem sijn knechten, Wat woordt is dit dat ghy ghedaen hebt? om dat kindeken (doent noch leefde) hebdi gheweent ende gheuast, ende nv alst kint doot is, soo sijdi opghestaen ende hebt broot gheten.

22

Die welcke seyde, Om dat kindeken doent noch leefde heb ick gheuast ende gheweent, want ic seyde, Wie weet oft die Heere by auontueren my dat gheuen wilde ende dat tkint mocht leuen?

23

Maer nv want doot is, ⁺waerom vaste ic? sal ic dat wederom moghen roepen? Ic soude eer moghen tot dat kint gaen, maer dat en sal tot my niet wederom comen.

+ F

24

Ende Dauid heeft Beth-sabee sijn huysvrouwe ghetroost, ende tot haer inghegaen sijnde heeft hy by haer gheslapen, Die welcke heeft eenen sone voertbracht, ende hy noemde sijnen naem Salomon, ende die Heere heeft hem bemint.

25

Ende hy heuet ghesonden door die hant van Nathan den prophete, ende hem ghenoemt des Heeren-beminden, om dat die Heere hem lief hadde.

26

Ende Ioab streedt teghen Rabbath der kinderen van Ammon, ende hy bestormde die coninclijcke stadt

27

Ende Ioab heeft boden wtghesonden tot Dauid segghende, Ic hebbe ghestreden teghen Rabbath, ⁺ende die stadt der wateren sal inghenomen worden.

+ G

28

Aldus dan soo vergadert nv het ander deel des volcs, ende belegghet die stadt, ende neemt die inne, Op dat (als die stadt van my verdoruen ware) die victorie mijnen naem niet toeghescreuen en worde.

29

Hierom heeft Dauid alle dat volck vergadert, ende hy is ghetrocken teghen Rabbath, ende als hy die bestormt hadde, soo heeft hy die ghewonnen.

30

Ende hi heeft haers conincs croone van sijnen hoofde ghenomen, int ghewicht hebbende een talent gouts, hebbende ooc seer costelijcke ghesteenten, ende die is op Dauids hooft ghestelt. Oock soo heeft hy eenen seer grooten roof vander stadt wech ghedraghen,

31

ende het volck van dier wtbrenghende heeft hy ghesaghet, ende hy heeft ouer hen doen ommegaen waghenen met yseren tanden beslaghen, ende hy heeftse met messen in stucken ghedeelt, ende hy heeftse vervuert ghelijcmen die kareelen doet. Alsoo heeft hy ghedaen alle die steden der kinderen van Ammon, ende Dauid is wederom comen, ende alle sijn heyr in Ierusalem.