Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde tis ghesciet alst iaer omme was ten tijde als die coninghen pleghen ter orloghen te trecken, dat Dauid ghesonden heeft Ioab ende sijn knechten met hem ende gheheel Israel, ende sij hebben die kinderen van Ammon verdoruen, ende Rabba beleyt, maer Dauid bleef te Ierusalem.

+ A

2

Ende die wijle dat dese dinghen ghedaen worden, soo eest gheschiet dat Dauid opstont van sijnen bedde nae middach, ende wandelde bouen opden soldere van des conincs huys, ende hy heeft een vrouwe ghesien haer seluen wasschende recht teghen ouer van sijnen solder, ende het was een seer schoon vrouwe.

3

Hier om heeft die coninck wtghesonden ende vernomen wat vrouwe dat was. Ende hem is wederom ghebootscapt dat sij was Beth-sabee Eliams dochter, Vrias des Hethiters huysvrouwe.

4

Doen heeft Dauid boden wtghesonden ende heeftse doen halen, Die welcke als sij by hem comen was, soo heeft hy by haer gheslapen, ende terstont is sij ghereynicht van haer onsuuerhede, ende is weder in haer huys ghegaen,

5

hebbende een vrucht ontfanghen. Ende sendende heeft sij Dauiden ghebootscapt, ende gheseyt, Ick heb ontfanghen.

6

Doen sondt Dauid aen Ioab segghende, ⁺Seyndt my Vriam den Hethiter. Ende Ioab heeft Vriam tot Dauid ghesonden.

+ B

7

Ende Vrias is tot Dauid ghecomen, ende Dauid heeft gheuraecht hoe wel dat Ioab maecte ende het volck, ende hoe dat die orloghe gheuoert worde.

8

Ende Dauid seyde tot Vrias, Gaet henen in v huys ende wascht v voeten. Ende Vrias is wt des conincs huys ghegaen, ende des conincs spijse is hem naghedraghen.

9

Maer Vrias die sliep voor die poorte van des conincs huys, metten anderen dienaers sijns Heeren, ende hy is in sijn huys niet af ghegaen.

10

Ende het is Dauid te kennen ghegheuen vanden sommighen die seyden, Vrias en is in sijn huys niet ghegaen. Ende Dauid seyde tot Vrias, En sijdi niet vanden weghe comen? waerom en sijdi niet afghegaen in v huys?

11

Ende Vrias seyde tot Dauid, Die arcke Gods, ende Israel, ende Iuda woonen in tenten, ende mijn heere Ioab, ende mijns heeren knechten die ligghen op daensicht der aerden, sal ic dan in mijn huys gaen, om te eten ende te drincken, ende by mijn huysvrouwe te slapen? By uwe salicheyt ende by uwer zielen salicheyt, ic en sal dit dinck niet doen.

12

Aldus soo seyde Dauid tot Vrias, Blijft noch heden hier, ende morghen sal ic v laten gaen. Ende Vrias bleef te Ierusalem noch dien dach, ende des anderen daechs,

13

ende ⁺Dauid heeft hem ghenoodt, dat hy by hem soude eten ende drincken, ende hy heeft hem droncken ghemaect, ende als hy des auonts wtghegaen was soo heeft hy gheslapen in sijnen rustplaetse met sijns heeren knechten, ende en is niet neder ghegaen in sijn huys.

+ C

14

Aldus soo eest dach gheworden, ende Dauid heeft eenen brief aen Ioab ghescreuen, ende dien door Vrias hant ghesonden,

15

scrijuende inden brief, Stelt Vriam recht teghen den strijt, daer den strijt ten alderstercsten is, ende valt hem dan af dat hy verslaghen sijnde sterue.

16

Aldus doen Ioab die stadt beleyt hadde, so stelde hi Vriam in die plaetse daer hy wel wist dat die stercste mannen waren.

17

Ende die mannen wtghecomen sijnde wter stadt hebben teghen Ioab ghestreden, ende daer vielen sommighe vanden volck van Dauids knechten, ende Vrias die Hethiter is ooc ghestoruen.

18

Daerom heeft Ioab aen Dauid ghesonden ende hem ghebootscapt alle die ghesciedenissen vanden strijde,

19

ende hy heeft den bode beuolen segghende, Als ghy alle die woorden vanden strijde tot den coninck sult gheseyt hebben,

20

eest sake dat ghy siet dat hy gram is, ende dat hy seyt, Waerom sijdi soo nae den muer gheghaen om te strijden? en weet ghy niet datmen van bouen veel pijlen wtsciet?

21

Wie heeft doch Abimelech Ierobaals sone verslaghen? en wierper niet een vrouwe op hem een stuck van eenen molensteen vanden muer ende doode hem te Thebes? ⁺Waerom sijdi by den muer ghegaen? soo sult ghy segghen Oock is v knecht Vrias die Hethiter ghestoruen.

+ D

22

Hierom is die bode wech ghegaen, ende comen, ende heeft Dauiden al vertelt dat Ioab hem beuolen hadde.

23

Ende die bode seyde tot Dauid, Die mannen hebben teghen ons douerhant ghecreghen, ende sij sijn ons aencomen te velde, ende wij hebben eenen oploop ghemaect ende hen veruolcht tot aen der stadt poorte,

24

Ende die scutters hebben hen ghescutten op v dienaers ghestelt van bouen opden muer, ende sommighe van des conincs knechten sijn ghestoruen, ooc so is doot v dienaer Vrias die Hethiter.

25

Ende Dauid seyde tot den bode, Dit suldi Ioab segghen, En laet dit dinc uwen moet niet breken, Want die auontuere der orloghen is menigherande. Ende als nv desen, als nv dien vernielt dat sweert, Versterct v orloochs mannen teghen die stadt, dat ghy die bederuen moecht, ende verwectse.

26

Ende Vrias huysvrouwe heeft ghehoort dat Vrias haer man doot was, ende sij heeft hem beweent.

27

Ende als den rouwe ouerleden was, soo heeft Dauid ghesonden, ende heeftse in sijn huys doen leyden, ende sij is sijn huysvrouwe gheworden, ende sij heeft hem eenen sone ghebaert. Ende dit woort dat Dauid ghedaen hadde mishaechde voor den Heere.