Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺ENde het is ghebuert na desen, dat die coninc der kinderen van Ammon sterf, ende dat Hanon sijn sone voor hem heeft gheregneert,

+ A

2

Doen seyde Dauid. Ic sal bermherticheyt doen met Hanon Naas sone ghelijc sijn vader my bermherticheyt ghedaen heeft, Hierom heeft Dauid wtghesonden troostende hem door sijn knechten van sijns vaders doot Maer als Dauids knechten inder kinderen van Ammon lant ghecomen waren,

3

soo seyden die princen der kinderen van Ammon tot Hanon haren heere, Meyndi ooc dat Dauid dese troosters aen v ghesonden heeft ter eeren van uwen vader? ende en meynde niet dat Dauid daerom sijn knechten tot v ghesonden heeft dat hy ondersoecken ende bespieden soude die stadt ende die verderuen?

4

Aldus so heeft Hanon Dauids knechten ghenomen ende haren baert half af ghescoren, ende haerlieden cleederen half int midden af ghesneden tot haren billen toe ende heeftse laten gaen,

5

⁺Dwelck alst ghebootschapt was aen Dauid, soo heeft hy hen te ghemoete ghesonden, want die mannen waren seer leelijcken bescaemt, Ende Dauid heeft hen gheboden. Blijft te Iericho, tot dat uwen baert ghewassen is, ende dan coemt wederom,

+ B

6

Ende die kinderen van Ammon siende dat sij Dauid onrecht ghedaen hadden hebben wtghesonden, ende om loon ghehuert die Siriers van Rohob ende die Siriers van Soba, twintith duysent mannen voetvolcs, ende vanden coninc van Maacha een duysent mannen, ende van Istob twaelf duysent mannen,

7

Dwelck als Dauid ghehoort hadde, so heeft hi Ioab met alle theyr der strijtbaer mannen ghesonden.

8

Aldus so sijn die kinderen van Ammon wtghetrocken ende hebben hen slachoorden ghestelt voor den inganck der poorten, Maer die Siriers van Soba ende Rohob ende van Istob ende van Maacha waren besonder int velt

9

siende dan Ioab datter eenen strijt teghen hem ghereet was, soo wel van vore als van achter, soo heeft hy wtghecosen wt alle die wtghelesen van Israhel, ende heeft sijn slachoorden ghestelt teghen die Siriers

10

⁺Maer dat ander deel des volcs heeft hy Abisai sijnen broeder ghegeuen, die welcke heeft sijn slachoorden gestelt tegen die kinderen van Ammon,

+ C

11

Ende Ioab seyde, eest sake dat die Siriers my verwinnen, soo suldi my helpen Maer eest dat die kinderen van Ammon v te machtich worden, soo sal ic v helpen,

12

Weest een vroom man ende laet ons strijden voor ons volck, ende voor die stadt ons Godts, Ende die Heere sal doen dat goet is in sijn ooghen.

13

Aldus soo heeft Ioab ende tvolc dat met hem was begonst te strijden tseghen die Siriers, die welcke ter stont vluchten voor sijn aensicht,

14

Ende die kinderen van Ammon siende dat die Siriers gheuloden waren sijn ooc gheuloden voor daensicht van Abisai, ende sij sijn in die stadt ghegaen, Ende Ioab is weder ghekeert vanden kinderen van Ammon, ende ghecomen te Ierusalem.

15

Siende dan die kinderen van Ammon dat die Siriers veruaert waren, ende dat si voor die van Israhel gheuallen waren, soo sijn sij tsamen vergadert,

16

Ende Adarezer heeft wtghesonden ende opghebracht die Siriers die ouer die riuiere waren, ⁺ende hi heeft hen heyr aenghebracht, ende Sobach die velthooftman van Adarezer was hen capiteyn,

+ D

17

Dwelck alst ghebootschapt was Dauid, soo heeft hy ghe-

[p. *252]

heel Israhel tsamen verghadert, ende hy is ouer die iordane ghetrocken, ende is ghecomen te Helam, ende die Siriers hebben hen slachorden ghesteldt teghen Dauid ende streden teghen hem,

18

Maer die Siriers sijn gheuloden voor daensicht van Israel, ende Dauid heeft vanden Siriers seuen hondert waghenen verslaghen, ende veertich duysent rosvolcs, ende Sobach den capiteyn des heyrs heeft hy ooc verslaghen die welcke terstont ghestoruen is.

19

Ende alle die coninghen die tot Adar-ezers helpe comen waren, siende dat sij van Israel verwonnen waren, werden veruaert ende sijn gheuloden tot achtenvijftich duysent mannen toe voor Israel. Ende sij hebben met Israel pays ghemaect, ende hebben hen ghedient, ende die Siriers hebben hen ontsien den kinderen van Ammon meer te helpen.