Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde Dauid heeft gheseyt. Is daer oock iemant ouerbleuen van Sauls huys dat ick bermherticheyt met hem doen mach om Ionathas wille?

+ A

2

Ende daer was een knecht van Sauls huys Siba ghenoemt, den welcken als die coninc hadde tot hem gheroepen, soo seyde hy tot hem. Sijdi niet Siba? Ende hy antwoorde. Ic bent v dienaer,

3

Ende die coninck heeft gheseyt. En ysser niemant ouer bleuen van Sauls huys dat ick Gods bermherticheyt met dien doe? Ende Siba heeft totten coninc gheseyt. Daer leeft noch een sone van Ionathas, cruepel in sijn voeten,

4

Dauid seyde. Waer is die? ⁺Ende Siba totten coninc Siet (seyt hy) hi is te Lo-dabar int huys van Machir Amiels sone,

+ B

5

Hierom heeft Dauid die coninc wtghesonden ende dien doen halen wt den huyse van Machir Amiels sone van Lo-dabar,

6

Maer doen Miphi-boseth die sone van Ionathas Sauls sone by Dauid comen was, soo viel hy neder op sijn aensicht, ende heeft aenbeden, Ende Dauid heeft gheseyt Miphi-boseth? Ende hy antwoorde. Hier ben ick v dienaer,

7

Ende Dauid seyde tot hem. En vreest niet, want ic sal doende met v bermherticheyt doen om Ionathas ws vaders wille ende ick sal v alle die ackerlanden Sauls ws vaders wederom gheuen, ⁺ende ghy sult altijt aen mijn tafel broot eten,

+ C

8

Die welcke hem aenbiddende seyde. Wie ben ick v dienaer dat ghy op eenen dooden hont ghesien hebt mijns ghelijck?

9

Aldus soo heeft die coninck Sibam Sauls knecht gheroepen ende hem gheseyt. Alle dat Saul toebehoort ende alle sijn huys heb ic ws heeren sone ghegheuen,

10

Daerom ghy ende v sonen ende v knechten bouwet hem dlant, ende ghy sult ws heeren sone den cost inbrenghen, dat hy onderhouden worde, Maer Miphiboseth ws heeren sone sal altijt aen mijn tafel broot eten, Ende Siba hadde vijfhtien sonen ende twintich knechten,

11

Ende Siba seyde tot den coninck. Ghelijck ghy mijn heere die coninck uwen dienaer beuolen hebt alsoo sal v dienaer doen, Ende Miphiboseth sal altijt aen mijn tafel broodt eten als een van des conincks kinderen,

12

Ende Miphiboseth hadde eenen cleynen sone ghenaemt Micha, maer alle dat gheslachte des huys van Siba diende Miphiboseth,

13

Ende Miphiboseth woonde te Ierusalem, want hi adt altijt van des conincs tafel, ende hy was cruepel aen beyde sijn voeten.