Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺DAer nae eest ghesciet dat Dauid die Philistijnen gheslaghen heeft ende die vernedert, ende Dauid nam den tribuyts breydel wt der Philistijnen hant,

+ A

2

Ende hy heeft die Moabiten gheslaghen, ende hi heeftse met een coordeken ghemeten, makende die effen ghelijck der eerden, Ende hy heeftse met twee coordekens ghemeten, het een om doot te slaen, ende het ander om het leuen te gheuen, ende aldus sijn die Moabijten worden dienende Dauid onder tribuyt,

3

Ende Dauid heeft verslaghen Adarezer Roobs sone den coninck van Soba, als hy ghetrocken was om heerscappie te crijghen ouer die riuiere Euphrates,

4

Ende doen Dauid van sijnder sijden gheuanghen hadde duysent ende seuen hondert ruyters te peerde, ende twintich duysent voetknechten, so heeft hy alle die inghespannen waghenpeerden verminct maer hy heefter van dien hondert waghenen ghelaten,

5

⁺Ende van Sirien wt Damasco sijnder ooc comen om Adarezer den coninck van Soba te helpen, ende Dauid heeft van die van Sirien tweentwintich duysent mannen verslaghen,

+ B

6

ende Dauid heeft een garnisoen knechten tot Damascus in Sirien ghestelt, ende Sirien is worden Dauid dienende onder tribuyt, Ende die Heere heeft Dauid bewaert in alles werwaerts dat hi ghereyst heeft,

7

Ende Dauid heeft die gulden wapenen ghenomen die Adarezers knechten hadden, ende hy heeft die ghebracht te Ierusalem,

8

Ende van Bete ende van Beroth Adarezers steden, nam Dauid metael bouen maten veel, waer af dat Salomon ghemaect heeft alle die metalen ghereetscap inden tempel, ende die metalen zee, ende die columnen, ende den outaer,

9

Maer Thou die coninc van Emath heeft ghehoort dat Dauid alle die macht van Adarezer verslaghen hadde,

10

⁺Ende Thou heeft Ioram sijnen sone aen den coninc Dauid ghesonden dat hy hem groeten soude mede verblijdende, ende dat hy hem dancken soude om dat hi Adarezer bestreden hadde ende verslaghen, Want Thou was Adarezers viant,

+ C

[p. *251]

Ende in sijn hant waren iuweelen van goude ende van siluer ende van metale,

11

Die welcke die coninc Dauid den Heere gheheylicht heeft met dat siluer ende gout, het welck hi gheheylicht hadde van alle den heydenen die hy verwonnen hadde

12

van Sirien, ende van Moab, ende vanden kinderen van Ammon ende vanden Philistijnen, ende van Amalec, ende vanden roof van Adar-ezer Rohobs sone des conincs van Soba

13

⁺Oock soo heeft Dauid hem seluen eenen naem ghemaect als hy wederkeerde nae dat hy Sirien inghenomen hadde in die valleye der soutgroeuen hebbende verslaghen achtien duysent mannen, ende in Gebelem tot drijentwintich duysent,

+ D

14

Ende hy heeft bewaerders gheleydt inder Ydumiten landt ende een stercke hoede ghestelt ende tgeheel Ydumiters lant is gheworden dienende Dauid onder tribuyt, ende die Heere heeft Dauid bewaert in alles daer hi henen ghereyst is,

15

Ende Dauid heeft gheregneert ouer gheheel Israhel ende Dauid dede ooc recht ende rechtuerdicheyt alle sijnen volcke,

16

Maer Ioab die sone Saruie was ouer theyr, ende Iosaphat Ahiluds sone was greffier,

17

ende Sadoc Achitobs sone, ende Achimelech Abiathars sone waren priesters, ende Sarias die scrijuer,

18

Maer Banaias die sone Ioiade was ouer Cerethi ende Phelethi, Maer Dauids sonen waren priesters.