Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺ENde het is gesciet als die coninc in sijn huys gheseten was ende die Heere hem ruste ghegheuen hadde van alle sijnen vianden van allen sijden,

+ A

2

so seyde hy tot Nathan den propheet, En siet ghi niet dat ic in een cederen huys woone, ende dat die arcke Gods ghestelt is int midden onder die vellen?

3

Ende Nathan heeft totten coninc gheseyt. Gaet henen ende doet alle dat ghi in v herte hebt, want die Heere is met v,

4

Maer het ghebuerde op dien nacht ende siet het woort des Heeren is tot Nathan gheschiet segghende.

5

Gaet henen, ende segghet mijnen knecht Dauid, Dit seyt die Heere. Meyndy dat ghy my suldt een huys maken om te woonen?

6

Want ick en heb in gheen huys ghewoont, van dien daghe dat ic die kinderen van Israhel wt dat landt van Egipten leyde tot op desen dach toe, maer ick wandelde in een tabernakel ende in een tente,

7

ouer alle die plaetsen daer ick door ghegaen ben met alle die kinderen van Israhel, ⁺Heb ick sprekende gheseyt tot eenighe van Israhels gheslachte den welcken ic beuolen hebbe dat

+ B

[p. *250]

sij mijn volc Israhel souden hoeden seggende. Waerom en hebdi my gheen cedren huys ghemaect?

8

Ende nv dit suldi mijnen knecht Dauid segghen. ⁺Dit seyt die Heere der heyrscaren. Ic heb v wter weyden ghehaelt doen ghi die scapen volchdet, dat ghi soudt een vorst sijn ouer mijn volc Israhel,

+ B

9

ende ic heb met v gheweest in alle plaetsen daer ghi ghewandelt hebt, ende ic heb alle v vianden doot gheslagen voor v aensicht, ende ic heb v eenen grooten naem ghemaect, als den naem vanden grooten die opder aerden woonen,

10

Ende ic sal mijnen volc van Israhel een plaetse stellen, ende ick sal hen daer vast planten, ende het sal daer onder woonen ende niet meer verstoort worden, ende die kinderen der boosheyt en sullen hen niet meer verdrucken ghelijc te voren

11

van dien dach aen dat ick rechters ouer mijn volck Israhel ghestelt hebbe, ende ic sal v ruste gheuen van alle uwen vianden, Ende die Heere seyt v te voren, dat die Heere v een huys maken sal,

12

Ende als v daghen sullen voleyndt sijn, ende dat ghi met uwen vaderen sult ontslapen sijn, dan sal ic v saet nae v verwecken, het welc wt uwen lichaem comen sal, ende ick sal sijn rijck vast maken.

13

Dese sal een huys maken mijnen naem, ende ic sal sijnen throon vast maken tot inder eewicheyt,

14

Ic sal hem tot eenen vader wesen, ende hi sal my tot eenen sone sijn, ende eest sake dat hi iet onrechtuerdelijc doet, so sal ic hem straffen met die roeden der mannen ende met die plaghen van der menschen kinderen,

15

⁺Maer mijn bermherticheyt en sal ic van hem niet wech nemen, ghelijc ic die van Saul ghenomen hebbe, den welcken ic van mijnen aensicht wech ghedaen hebbe,

+ C

16

ende v huys ende v rijck sal ghetrouwe sijn tot inder eewicheyt voor v aensicht, ende uwen throon sal altijt vast wesen.

17

Nae alle dese woorden, ende nae alle dit visioen heeft Nathan tot Dauid ghesproken.

18

Aldus soo is die coninck Dauid inghegaen ende sadt voor den Heere ende seyde.

Wie ben ick doch o Heere Godt? ende wat is mijn huys dat ghy my hier toe hebt ghebrocht?

19

Maer dit heeft v noch luttel ghedocht voor v aensicht o Heere Godt ten ware dat ghy noch van ws knechts huyse ghesproken hadt van verre naecomende dinghen, Want dit is die wet van Adam Heere Godt,

20

Daerom wat sal Dauid hier toe meer moghen doen, om met v te spreken want ghi kent uwen knecht o Heere Godt,

21

Om ws woorts wille, ende nae v herte, hebdi alle dese grootdadighe dinghen ghedaen, also om dat ghi die uwen dienaer soudt te kennen gheuen,

22

Daerom sijdi oock groot gheacht o Heere Godt, want daer en is niet ws ghelijc, noch daer en is gheen God buyten v in alle dat wij met onsen ooren ghehoort hebben,

23

Want wat volc isser opder aerden ghelijc v volc Israel, daer God om ghegaen is, ⁺dat hy dat soude verlossen tot een volc voor sij seluen, ende dat hy sij seluen eenen naem maken soude, ende dat hy haerlieden groote wonderlijcke grouwelijcke dinghen doen soude opder aerden voor dat aensicht van uwen volcke, dwelc ghy voor v verlost hebt wt Egipten, het volck ende haren Godt,

+ D

24

Want ghy hebt het volck van Israhel met v vast verbonden tot een eewich volc, Ende ghy Heere Godt sijt hen tot eenen God gheworden,

25

Hierom dan Heere God het woort dat ghi van uwen dienaer ghesproken hebt ende ouer sijn huys verwect inder eewicheyt, ende doet ghelijc ghi ghesproken hebt,

26

op dat uwen naem mach ghepresen worden tot inder eewicheyt, ende datmen segghe. Die Heere der heyrscaren is Godt ouer Israhel, Ende Dauids ws knechts huys sal gheuesticht worden voor den Heere,

27

Want ghy Heere der heyrscaren Godt van Israel hebt ws dienaers oore open ghedaen seggende. Ic sal v een huys timmsren, daerom heeft v dienaer sijn herte vonden, dat hy v met deser bedinghen bidden soude,

28

Nu dan o Heere Godt ghy sijt Godt ende uwe woorden sullen warachtich sijn, want ghi hebt tot uwen dienaer gheseyt dese goede dinghen,

29

daerom beghint doch, ende ghebenedijt ws dienaers huys, op dattet inder eeuwicheyt mach blijuen voor v, Want ghy (o Heere Godt) hebbet ghesproken, met uwer benedijdinghe sal ws dienaers huys ghebenedijt worden inder eewicheyt.

[afbeelding]