Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺DOen heeft Dauid wederom vergadert alle die wtghelesen van Israhel dertich duysent

+ A

2

ende Dauid is opghestaen ende wech ghegaen, ende alle tvolc dat met hem was vanden mannen van Iuda, dat sij brenghen souden Godts arcke, waer ouer dat den naem des Heeren der heyrscaren aengheroepen is, sittende daer bouen tusschen die Cherubinnen

3

Ende sij hebben Gods arcke op eenen nieuwen waghen ghesteldt ende die wech gheuoert wt Abinadabs huys die te Gabaa woonde, Maer Oza ende Ahio Abinadabs sonen menden den nieuwen waghen,

4

Ende als sij die ghehaelt hadden wt Abinadabs huys die te Gabaa woonde bewarende Gods arcke, so ghinck Ahio voor die arcke,

5

Maer Dauid ende geheel Israel speelden voor den Heere op alderhande instrumenten van houte constelijc ghemaect ende op herpen ende lieren ende bommen ende met hoornkens ende met cimbalen,

6

Maer doen sij comen waren tot den dorschuloer van Nachor, so stack Oza sijn hant wt aen Gods arcke, ende hi heeft die ghehouden, want die ossen sloeghen achterwt, ende hadden die arcke doen helden,

7

Ende die Heere is met onwaerdicheden gram gheworden teghen Oza, ende hy versloech hem om die vermetenheyt, die welcke is daer ghestoruen by Godts arcke,

8

⁺Doen worde Dauid bedroeft om dat die Heere Ozan verslaghen hadde, ende die plaetse worde ghenoemt tverslaen van Oza, tot op desen dach toe,

+ B

9

Ende Dauid heeft den Heere seer ontsien op dien dach, segghende. Hoe sal des Heeren arcke binnen to my comen?

10

Ende hi en heeft des Heeren arcke niet willen laten ter herberghen comen tot hem in Dauids stadt, Maer hy heeft die doen herberghen int huys van Obededom den Gethiter

11

Ende die arcke des Heeren is gheherbercht gheweest in Obededoms des Gethiters huys drij maenden lanc, ende die Heere heeft Obededom ende alle sijn huys ghebenedijt,

12

Ende het is Dauid den coninc ghebootscapt dat die Heere Obededom ende alle sijn huys ghebenedijt hadde om Godts arcke, Ende Dauid seyde, ick sal gaen ende halen die arcke wederom metter benedijdinge in mijn huys, Aldus so is Dauid wtghegaen ende heeft Gods arcke wt Obededoms huys wech gehaelt tot in Dauids stadt met blijscappen, Ende daer waren met Dauid seuen dansen, ende een slachofferande van een calf,

13

⁺Ende als sij voorts gheghaen waren die des Heeren arcke droeghen ses screden soo offerde Dauid eenen osse, ende een schaep, ende eenen ram,

+ C

14

Ende Dauid speelde op orghelen aen die scouderen hangende, ende hy spranck met alle sijn macht voor den Heere Ende Dauid was met een lijnen Ephod omme ghegort,

15

Ende Dauid ende alle dat huys van Israhel leyden die arcke van dat verbont des Heeren met iolijt, ende met gheluyt der trompetten,

16

Ende als darcke des Heeren in Dauids stadt comen was, soo heeft Michol Sauls dochter nederwaerts siende wt der venster den coninck Dauid ghesien opspringhende ende dansende voor den Heere, ende sij heeft hem in haer herte versmaet,

17

Ende sij hebben des Heeren arcke inghebracht ende die op haer plaetse ghestelt int midden des tabernakels, welck Dauid voor hare wtghespannen hadde, ende Dauid heeft heelbrantofferanden ende vreedofferanden gheoffert voor den Heere,

18

Ende als hy offerende heelbrantofferanden ende vreedofferanden voldaen hadde, doen ghebenedijde hy dat volck inden naem des Heeren der heyrscaren,

19

Ende hi heeft bedeylt alle der menichten van Israhel, soo wel den mans als den vrouwen elcken besonder eenen coeck broots, ende een stuck ghebraden ossenvleesch ende bloem van mele met olie gheroost, ⁺ende alle dat volc is wech ghegaen, een ieghelijck in sijn huys,

+ D

20

Ende Dauid is wederom ghecomen om sijn huys te benedijden, ende Michol Sauls dochter wtghegaende Dauid te ghemoete heeft gheseyt. Hoe glorioos heeft die coninck van Israhel heden gheweest, ontdeckende sij seluen voor sijnder knechten dienstvrouwen, ende hi is ontdect gheweest ghelijc ofter een vanden scudden ontdect worde,

21

Ende Dauid seyde tot Michol. Also warachtelijc als die Heere leeft sal ic voor den Heere spelen, die my vercoren heeft meer dan uwen vader ende dan alle sijn huys, ende die mi beuolen heeft dat ic soude een prince wesen ouer des Heeren volck in Israhel, ende ic sal spelen,

22

ende noch verworpender worden dan ick gheweest hebbe, ende ick sal ootmoedich wesen in mijn ooghen ende met den dienstvrouwen daer ghy af ghesproken hebt sal ick glorioser schijnen,

23

Hierom so en heeft Michol Sauls dochter gheenen sone ghecreghen tot den dach haers doots toe.