Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺ENde alle die gheslachten van Israel sijn ghecomen tot Dauid te Hebron, segghende. Siet wij sijn v ghebeente ende v vleesch,

+ A

2

Daer toe ooc ghisteren ende eerghisteren doen Saul coninc ouer ons was, so leyde ghi Israel wt ende in, ende die Heere heeft tot v gheseyt. Ghi sult mijn volc van Israel hoeden, ende ghi sult een prince sijn ouer Israel,

3

Ooc so sijn die ouders van Israel by den coninck in Hebron comen, ende die coninc Dauid heeft met henlieden een verbont ghemaect te Hebron voor den Heere, ende sij hebben Dauid tot eenen coninck ghesalft ouer Israel,

4

Een sone van dertich iaren was Dauid doen hy begonste te regneren, ende veertich iaren heeft hy gheregneert.

5

Te Hebron regneerde hy ouer Iuda seuen iaren ende ses maenden, Maer in Ierusalem regneerde hy drijendertich iaren ouer gheheel Israel ende Iuda.

6

Ende die coninc is wtghetrocken, ende alle die mannen die met hem waren nae Ierusalem teghen die Iebusiters des lants bewoonders, Ende sij seyden tot Dauid, Ghi en sult hier binnen niet comen, ten sij dat ghi verdreuen sult hebben die blende ende die cruepele seggende. Dauid en sal hier binnen niet comen,

7

⁺Aldus so heeft Dauid die borch van Sion inghenomen, ende dit is Dauids stadt,

+ B

8

Want Dauid hadde op dien dach eenen prijs daer op ghestelt, voor den ghenen die de Iebusiters verslaen soude, ende aen die goten vanden daken soude comen ende verdrijuen die blende ende die cruepele die Dauids ziele haetten, Daerom seyt men int ghemeyn segwoort. Die blende ende die cruepele en sullen inden tempel niet comen,

9

Doen woonde Dauid in die borch, ende hi heeft die ghenoemt Dauids stadt, ende hy heeft die ghetimmert int ronde van Mello ende van innewaerts,

10

Ende hy ghinc altijt voorts toenemende ende grooter wassende, ende die Heere die Godt der heyrscaren was met hem.

11

Oock soo heeft Hiram die coninck van Tyren boden aen Dauid ghesonden ende cederen houten, ende constighe werclieden in houte ende in steenen om die mueren, ende sij hebben Dauids huys ghetimmert,

12

Ende Dauid heeft ghekent dat die Heere hem tot eenen coninc ouer Israel vast ghemaect hadde, ende dat hy sijn coninckrijck verhauen hadde ouer sijn volck van Israhel,

13

Aldus soo heeft Dauid noch concubijnen ende huysvrouwen ghenomen van Ierusalem, ⁺nae dat hy van Hebron comen was, Ende Dauid worden noch andere sonen ende dochteren gheboren,

+ C

14

ende dit sijn die namen der gheender die hem te Ierusalem gheboren sijn, Samua, ende Sobab, ende Nathan, ende Salomon,

15

ende Iebathar, ende Elisua, ende Nepheg ende Iaphia,

16

ende Elisama, ende Elioda, ende Eliphalet.

17

Aldus so hebben die Philistijnen ghehoort datmen Dauid ghesalft hadde tot eenen coninc ouer Israel, ende sij sijn alle ghader opghetrocken om Dauid te soecken, ende als Dauid dit hoorde, soo ghinck hy nederwaerts in die sterckte,

18

Maer die Philistijnen comende sijn breedt nedergheslaghen in die valleye Raphaim,

19

Ende Dauid vraechde den Heere segghen-

[p. *249]

de. Sal ick opwaerts trecken tot die Philistijnen? ende sult ghy die in mijn handt leueren? Ende die Heere heeft tot Dauid gheseyt. Trect opwaerts, Want ick sal die Philistijnen leuerende gheuen in v handt,

20

Aldus soo is Dauid ghecomen te Baal-pharasim, ende heeft die Philistijnen daer gheslaghen ende gheseyt. Die Heere heeft mijn vianden voor my ghedeylt, ghelijck die wateren worden ghesceyden, daerom is die plaetse ghenoemt Baal-pharasim,

21

⁺Ende die Philistijnen hebben haer ghesneden afgoden daer ghelaten, die welcke Dauid ende sijn mannen wech ghedraghen hebben.

+ D

22

Ende die Philistijnen bestonden wederom op te trecken, ende sij sijn breedt ghespraeyt in die valleye van Raphaim,

23

Ende Dauid vraechde den Heere. Sal ic teghen die Philistijnen optrecken, ende suldi die in mijn handen leueren? Die welcke antwoorde, en trect niet opwaerts teghen hen, maer draeyt om achter haren rugghe, ende ghi sult hen aencomen teghen ouer die peerboomen,

24

ende als ghi sult hooren dat gheruysch van eenen gaende op die toppen vanden peerboomen, dan suldi den strijt beghinnen, want dan sal die Heere voor v aensicht wtgaen, om die heyren der Philistijnen te verslaen,

25

Aldus soo heeft Dauid ghedaen ghelijc hem die Heere beuolen hadde, ende heeft die Philistijnen gheslaghen van Gabaa tot dat ghi coemt in Gezer.