Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺HIerom isser eenen langhen strijt gheresen tusschen Dauids huys, ende tusschen thuys van Saul, Dauid was toenemende ende altijt in hemseluen lancs soo machtiger, Maer Sauls huys minderde alle daghe,

+ A

2

Ende Dauid werden in Hebron kinderen gheboren, ende sijn ierste gheboren was Ammon van Achinoan die Iezrahelitinne,

3

Ende na hem was gheboren Cheleab van Abigail Nabals des Carmeliters huysvrouwe, Voorts was die derde Absalom die sone van Maacha Tholmai des conincs van Gessurs dochter,

4

Maer die vierde was Adonias Haggiths sone, ende die vijfste Saphatia Abitals sone,

5

Ende die seste was Iethraam van Egla Dauids huysvrouwe, Dese sijn Dauiden gheboren te Hebron,

6

Alst dan strijt was tusschen Sauls huys ende Dauids huys, soo regeerde Abner dat huys van Saul,

7

Maer Saul hadde een concubine gehadt Raspha genoemt die dochter Aia, Ende Isboseth seyde tot Abner. ⁺Waerom hebdi v versaent met mijns vaders concubine?

+ B

8

Die welcke seer gram wesende om Isboseths woorden seide. Wat dunct v ben ic heden eens honts hooft teghen Iuda, die bermherticheyt ghedaen hebbe ouer Saul ws vaders huys, ende ouer sijn broeders ende sijn naeste, ende ick en heb v in Dauids handen niet gheleuert, ende ghy hebt teghen my ghesocht, dat ghy my heden soudt straffen om een vrouwe?

9

God doe Abner dit, ende dat noch daer toe, eest dat ick Dauids huyse niet en doe, ghelijck die Heere tot hem ghesworen heeft,

10

dat het coninckrijck soude af ghenomen worden van Sauls huys, ende dat Dauids throon soude verheuen worden ouer Israel ende ouer Iuda, van Dan tot Bersabee toe,

11

Ende Isboseth en mocht hem niet andtwoorden, want hy ontsach hem,

12

Aldus soo heeft Abner boden aen Dauid ghesonden voor hem seluen, segghende. Wiens is dlant? Ende dat sij segghen souden. ⁺Maect vrintscap met my, ende mijn hant sal met v sijn, ende ick sal gheheel Israel wederom tot v brenghen,

+ C

13

Ende Dauid heeft gheseyt, Ick sal vrintscap met v maken Maer ic begheer van v een dinck seggende. Ghy en sult mijn aenscijn niet sien, voor dat ghy Michol Sauls dochter ghebracht hebt, ende alsoo suldi comen, ende my sien.

14

Doen sondt Dauid boden tot Isboseth Sauls sone seggende. Geeft mijn huysvrouwe Michol wederom die welcke ic tot een huysvrouwe vercreghen hebbe om hondert ouerslofkens der manlijcheyt vander Philistijnen,

15

Hierom heeft Isboseth wtgesonden en heeftse doen halen van haren man Phaltiel Lais sone,

16

Ende haer man volchde haer al weenende tot Bahurim toe, ende Abner seyde tot hem. Gaet henen ende keert wederom Ende hy is wederom ghegaen,

17

Oock soo heeft Abner tot die ouders van Israel een redene ghesproken seggende. Soo wel ghisteren als eerghisteren sochte ghy lieden Dauid dat hy ouer v lieden regneren soude,

18

Aldusdan so doet dat nv, want die Heere heeft tot Dauid ghesproken seggende. Door Dauid mijns dienaers hant sal ic mijn volc van Israel verlossen wt der Philistijnen hant, ⁺ende alle haerder vianden,

+ D

19

Ende Abner heeft ooc ghesproken tot die van Beniamin, Ende hy is wech ghegaen dat hy in Hebron Dauiden segghen soude alle dat behaecht hadde Israel ende gheheel Beniamin,

20

Ende hi is tot Dauid te Hebron comen met twintich mannen, Ende Dauid heeft hem ende sijnen mannen die met hem comen waren eenen maeltijt ghegheuen,

21

Ende Abner seyde tot Dauid. Ick sal opstaen om gheheel Israel tot v mijnen heere den coninc te vergaderen, ende dat ick een verbont met v maken mach, also dat ghi moecht ouer al heerscappie hebben, ghelijck v ziele begheert, Als nv Dauid Abner hadde wtgheley ghedaen, ende hy met vreden wech ghegaen was,

22

soo quamen ter stont Dauids knechten ende Ioab die welcke hadden die roouers verslaghen, brenghende eenen seer grooten roof, Maer Abner en was doen by Dauid te Hebron niet, want hy hadde hem nv laten ghaen, ende hy was met vreden wech ghegaen,

23

Ende Ioab ende alle theyr dat met hem was is achter nae comen, Aldus soo eest Ioab te kennen ghegeuen vanden sommighen die seyden. Abner Ners sone is by den coninc gecomen ende hi heeft hem laten gaen, ⁺ende hi is met vrede wech ghegaen,

+ E

24

Ende Ioab is by den coninc ingegaen ende heeft tot hem gheseyt Wat hebdi ghedaen? Siet Abner is by v comen, waerom hebdi hem laten gaen dat hy wech is ghegaen ende verre gereyst?

25

En kendi Abners Ners sone niet? dat hi daerom tot v comen is dat hy v bedrieghen soude, ende dat hy uwen wtganc ende inganc vernemen soude, ende weten al wat ghy doet?

26

Aldus Ioab van Dauid wtghegaen sijnde, heeft boden ghesonden nae Abner, ende heeft hem wederom doen comen vander cisternen Sira, sonder Dauids weten,

27

Ende als Abner wederom te Hebron comen was, soo heeft hem Ioab besijden gheleyt tot dat midden vander poorten, om dat hy hem spreken soude met bedroch, ende hy stack hem daer in sijn eeghenisse, ende hy is ghestoruen, ter wraken van Asael sijns broeders bloet.

28

Ende als Dauid hoorde dat daer nv ghesciet was, so seyde hy. Suyuer ben ick ende mijn conincrijck voor Gode, tot inder eeuwicheyt van Abners bloet des soons van Ner,

29

ende dat moet comen op Ioabs hooft, ⁺ende op alle sijns vaders huys alsoo datter van Ioabs huyse nemmermeer man en ghebreke den loop des saets lijdende, ende melaetsch ende die spille houdende, ende doort swaert vallende, ende broodts ghebreck hebbende.

+ F

30

Aldus soo hebben Ioab ende Abisai sijn broeder Abner verslaghen om dat hy haren broeder verslaghen hadde te Gabaon inden strijt,

31

Doen seyde Dauid tot Ioab ende tot alle tvolck dat met hem was. Scoort v cleederen ende omgort v met sacken, ende beclaecht met rouwe voor die wtuaert van Abner, Ende die coninck Dauid volchde die bare,

32

Ende als sij Abner te Hebron

[p. *248]

begrauen hadden soo heeft die coninc Dauid sijn stemme opghehauen ende geweent op Abners graf, ende alle tvolck heeft ooc gheweent,

33

Ende die coninc Abner beclagende ende beweenende seyde. Abner en is gheensins ghestoruen ghelijck die onvrome pleghen te steruen,

34

V handen en sijn niet ghebonden, ende v voeten en sijn met gheenen boeyen gheladen, Maer ghelijck sulck pleghen te vallen voor die boose kinderen, ⁺alsoo sijdi gheuallen, Ende alle dat tvolc hernemende heeft wederom ouer hem gheweent,

+ G

35

Ende als alle die menichte ghecomen was om met Dauid spijse te nemen doent noch claer dach was, so heeft Dauid ghesworen seggende. Dit moet my God doen, ende dat noch daer toe doen, eest sake dat ick voor der sonnen onderganck broot oft yet anders proeue,

36

Ende alle dat volck heuet ghehoort, ende het ghenoechde hen wel alle dat die coninc ghedaen hadde voor alle tvolc,

37

Ende alle dat ghemeyn volck ende gheheel Israel heeft ghekent op dien dach dattet vanden coninc niet ghesciet en was, dat Abner die sone van Ner doot gheslaghen was,

38

Ende die coninck seyde ooc tot sijnen knechten. En weet ghy lieden niet datter heden een prince, ende een die aldermeeste van Israel gheuallen is?

39

Ende ick ben noch een teer ende ghesalft coninck, Maer dese mannen die sonen van Saruia sijn my seer hart Die Heere wil den quaetdoenders loon gheuen nae haerlieden quaetheyt.