Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺HIerom heeft Dauid hiernae den Heere gheuraecht seggende. Sal ic opwaerts trecken in een der steden van Iuda? Ende die Heere seyde tot hem. Trect opwaerts, Ende Dauid seyde. Waer sal ick henen trecken? Ende hy antwoorde hem. Te Hebron,

+ A

2

Aldus soo is Dauid opwaerts ghetrocken ende beyde sijn huysurouwen te weten Achinoam die Iezrahelitinne, ende Abigail Nabal des Carmeliters huysvrouwe,

3

oock heeft Dauid met hem gheleyt die mannen die by hem waren een yeghelijc met sijnen huysghesin, ende sij woonden in die steden van Hebron,

4

Ende die mannen van Iuda sijn comen, ende hebben Dauid daer ghesalft, dat hy regneren soude ouer dat huys van Iuda, Eude het is Dauid te kennen ghegheuen, hoe dat die mannen van Iabes Galaad Saul begrauen hadden,

5

Daerom soo heeft Dauid boden wt ghesonden tot die mannen van Iabes Galaad, ende hen gheseyt. Ghebenedijt moet ghi vanden Heere sijn, die dese barmherticheyt ghedaen hebt met uwen heere Saul, ende hebt hem begrauen

6

⁺Ende nv sal v die Heere wederom bermherticheyt ende warachticheyt gheuen, Ooc sal ic v dancbaerlijck loonen om dat ghi dit woort ghedaen hebt,

+ B

7

V handen laet verstercken ende weest kinderen der vromicheyt, Want al is Saul v heere doot, nochtans heeft dat huys van Iuda my ghesalft voor haren coninc,

8

Maer Abner die sone van Ner die opperveltheere van Sauls heyr heeft ghenomen Isboseth Sauls sone, ende hem omgheleyt door den heyrleger,

9

ende hy heeft hem coninck gemaect ouer Galaad, ende ouer Gessuri, ende ouer Iezrael, ende ouer Ephraim, ende ouer Beniamin, ende ouer gheheel Israel,

10

Veertich iaren oudt was Isboseth Sauls sone, als hy begonste ouer Israel te regneren, ende hi heeft twee iaren geregneert Maer dat huys van Iuda heeft alleen Dauid geuolcht,

11

⁺Ende tgetal der daghen dat Dauid ghewoont heeft regnerende te Hebron ouer thuys van Iuda, is geweest seuen iaren ende ses maenden,

+ C

12

Ende Abner die sone van Ner, ende Isboseth Sauls sone, sijn wten heyr leger ghegaen te Gabaon,

13

Voorts so sijn Ioab die sone Saruie ende Dauids knechten wtgetrocken, ende sij quamen hen te gemoete by die piscine te Gabaon, Ende doen sij daer te samen comen waren, soo sijn sij teghen malcanderen ouer gheseten te weten dese op deen sijde vander piscinen, ende die andere op dander sijde,

14

ende Abner seyde tot Ioab. Laet die iongelinghen opstaen ende voor ons spelen, Ende Ioab antwoorde, Laetse opstaen,

15

Aldus soo isser opghestaen ende ouerghegaen in ghetale twaelue van Beniamin, van Isboseths Sauls soons sijde, ende twaelue van Dauids knechten,

16

Ende een ieghelijc grijpende thooft van sijnen medegeselle stack sijn swaert in die sijde van sijnder wederpartien, ⁺ende aldus sijn sij al te samen nedergheuallen, ende die plaetse worde ghenoemt den acker vanden vromen te Gabaon,

+ D

17

Ende daer is op dien dach eenen strijt opghestaen hart ghenoech, Ende Abner metten mannen van Israhel is veriaecht gheweest (van Dauids knechten)

18

Ende daer waren drij sonen Saruie, Ioab, ende Abisai, ende Asael, Maer Asael was een seer rasch looper, ghelijc een wilde gheyte die in die bosschen woonen,

19

Ende Asael veruolchde Abner, ende hy en wijcte niet noch ter rechter noch ter slincker hant aflatende van Abner te veruolgen,

20

Hierom sach Abner achter sijnen rugge omme ende seyde. En sijt ghi niet Asael? Ende hy antwoorde. Ick bent,

21

Ende Abner seyde tot hem. Ghaet ter rechter oft ter slincker hant af, ende aenueert een vanden iongelinghen ende neemt sijnen roof voor v wech, ⁺Maer Asael en wilde niet aflaten van hem voorts te drijuen,

+ E

22

Ende Abner heeft noch eens gheseyt tot Asael. Gaet wech, noch en wilt my niet volghen, dat ick niet ghedwonghen en worde v te doorsteken inder aerden, ende dat ick dan niet en soude moghen mijn aensicht opheffen tot Ioab uwen broeder,

23

die welcke versmaede te hooren, ende hy en wilde ter sijden niet afkeeren, Aldus soo heeft hem Abner in sijn eeghernisse ghesteken met omghekeerder lancien, ende heeft hem doorsteken, ende is ghestoruen op die selue plaetse, ende alle die voorby die plaetse ghinghen daer Asael gheuallen was ende ghestoruen, bleuen staende,

24

Ende die wijle dat Ioab ende Abisai den vluchtighen Abner veruolchden, soo is die sonne onder gheghaen, ende sij sijn ghecomen totten hoeuele des waterloops, welck gheleghen is teghen ouer die valleye ende den wech der woestijnen van Gabaon,

25

⁺Ende die kinderen van Beniamin sijn vergadert by Abner, ende vergadert in eenen hoop stonden sij op dat opperste van een hoochde,

+ F

26

Ende Abner riep tot Ioab ende seyde. Salt v swaert al wreedelijc verslinden totten laetsten man toe? En weet ghi niet dat het

[p. *247]

mishopen seer sorghelijck is? Hoe langhe en suldi den volck niet segghen, dat sij ophouden van haer broeders te veruolghen?

27

Ende Ioab seyde. Alsoo warachtelijc als die Heere leeft, hadde ghy ghesproken soo soude het volck vroech wech ghegaen hebben ende opghehouden van haren broeder te veruolghen,

28

⁺Aldus so heeft Ioab een trompet gheslaghen, ende alle dat heyr is blijuen staende, ende sij en hebben Israel niet meer veruolcht, noch gheenen strijdt meer aengheghaen,

+ G

29

Maer Abner ende sijn mannen sijn wech ghetrocken alle den nacht door die platte velden, ende sij sijn ouer die iordane ghegaen, ende als sij gheheel Bethoron doorwandelt hadden, soo sijn sij inden legher ghecomen,

30

Maer Ioab wederom ghecomen sijnde, achterlatende Abner heeft alle dat volck vergadert, ende doen ghebraken daer van Dauids knechten neghentien mannen wtgenomen Asahel,

31

Maer Dauids knechten hadden verslaghen van Beniamin, ende vanden mannen die met Abner waren, drij hondert ende tsestich mannen die welcke ooc ghestoruen sijn,

32

Ende sij namen Asahel ende begroeuen hem in sijns vaders graf te Bethlehem Ende Ioab ende die mannen die met hem waren, hebben alle den nacht ghereyst, ende inden dagheraet soo quamen sij te Hebron.