Den gheheelen Bybel, Inhoudende het oude ende nieuwe Testament (Leuvense bijbel 1548)

Dat ierste Capittel.

1

⁺NAE dat Saul doot was so eest gheschiedt dat Dauid weder om quam vanden slach der Amaleciters, ende bleef twee daghen te Siceleg,

+ A

2

ende opden derden dach is daer ghesien een mensch comende wt Sauls heyr met ghescoorden cleederen ende met stof der aerden op sijn hooft ghespraeyt, ende als hy by Dauid comen was, soo viel hy op sijn aensicht neder ende aenbede,

3

Ende Dauid seyde tot hem. Van waer coemdi? Die welcke seyde tot hem. Ic ben gheulucht wt dat heyr van Israhel,

4

Ende Dauid seyde tot hem. Welck is dwoort datter gheschiet is? wilt mi dat te kennen gheuen, Die welcke seyde. Het volc is wt den strijt gheulucht, ende veel vanden volcke sijn daer gheuallen ende ghestoruen, Oock soo sijn Saul ende sijn sone Ionathas ghestoruen,

5

Ende Dauid seyde totten ionghelinck diet hem bootschapte. Waerwt weet ghy dat Saul ende sijn sone Ionathas doot sijn?

6

Ende die ionghelinck (die hem dese tijdinghe brachte) seyde. Ic quam by gheualle opden berch Gelboe, ende Saul die leende op sijn lancie, ende die waghenen ende dat rosvolck quam hem nae by,

7

ende achter rugghe hem keerende ende my siende heeft hi gheroepen, Ende als ick hem gheantwoort hadde, ⁺Ick ben hier,

+ B

8

soo seyde hy my. Wie sijt ghy, Ende ick seyde tot hem. Ick ben een Amaleciter,

9

Ende hy seyde tot my. Staet op my ende slaet my doot, want ick ben beuanghen met benautheden, ende mijn ziele is noch gheheel in my,

10

Ende op hem staende sloech ick hem doot, Want ick wist wel dat hy niet en mocht leuen nae sijnen val, Ende ick nam die croone die op sijn hooft was, ende dat arm cieraet van sijnen arm ende ic hebt hier tot v mijnen heere ghebracht.

11

Doen greep Dauid sijn cleederen en scoordese, ende alle die mannen die met hem waren,

12

ende sij hebben beclaecht ende beweent ende gheuast totten auont toe, ouer Saul ende ouer Ionathan sijnen sone, ende ouer dat volck des Heeren, ende ouer dat huys van Israhel, om dat sij doort swaert gheuallen waren.

[p. *246]

13

Ende Dauid seyde totten ionghelinc die hem dese bootscap ghebracht hadde. Van waer sijt ghy? Ende hi antwoorde, ick ben die sone van eenen vreemdelinc eens Amaleciters,

14

⁺Ende Dauid seyde tot hem. Waerom en hebdi niet geureest v hant wt te steken dat ghi des Heeren ghesalfden soudt dooden?

+ C

15

Ende Dauid roepende eenen van sijnen knechten seyde. Gaet toe ende slaet op hem, Ende hy heeft hem gheslaghen ende hi is ghestoruen,

16

Ende Dauid seyde tot hem. V bloet sij op v hooft, want uwen mont heeft teghen v ghesproken, seggende. Ic heb des Heeren ghesalfden doot gheslaghen.

17

Ende Dauid heeft geclaecht ouer Saul ende Ionathas sijnen sone aldusdanighe claghe

18

(ende hy heeft beuolen datmen den kinderen van Iuda soude den boghe leeren, ghelijc dat ghescreuen is int boec der rechtuerdighen) Ende hy seyde.

19

Denct Israel op die ghene die ghestoruen sijn op v hoochden ghewoont, die heerlijcke van Israel sijn op v berghen doot gheslaghen, Hoe sijn die machtige neder gheuallen?

20

En wilt dit niet bootscappen te Geth, noch en segges niet voorts op die vergaderinghen der straten van Ascalon, dat der Philistijnen dochteren hen by auontueren niet en verblijden, dat die dochteren vanden onbesnedenen hen niet en verhueghen.

21

O ghi berghen van Gelboe noch reghen noch dau en come op v, noch gheen ackers van die ierste vruchten en moeten op v sijn, want daer is den scilt vanden stercken verworpen, den scilt van Saul, recht oft hi met olie niet ghesalft en hadde gheweest.

22

⁺Van dat bloet der verslaghenen, ende van dat vette der stercker en quam Ionathas pijl noyt wederom achterwaerts, ende Sauls swaert en is noyt ydel wederom ghecomen.

+ D

23

Saul ende Ionathas seer minlijc ende scoone in haren leeuen, sij en sijn inder doot ooc niet versceyden, snelder dan aren, ende stercker dan leeuwen.

24

O ghi dochteren van Israel weent ouer Saul, die v cleedde met roode sijde in wellusticheden, die gulden iuweelen gaf tot uwen cieraet.

25

Hoe sijn die machtighe inden strijt gheuallen? Ionathas is op v hoochsten verslaghen.

26

Ic ben bedroeft ouer mijn broeder Ionatha, bouen maten seer scoone ende lieflijc bouen der vrouwen liefde. Ghelijc een moeder haren eenighen sone bemint, also lief hadde ic v.

27

Hoe sijn die vrome gheuallen, ende hoe sijn die wapenen der orloghen vernielt.