Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxx. Capittel.

1

⁺ENde doen nv Dauid ende sijn mannen te Siceleg comen waren opden derden dach, soo hadden die Amaleciten eenen oploop ghedaen op Siceleg aen die suytsijde, ende sij hadden gheslaghen Siceleg, ende dat metten viere verbrant,

+ A

2

ende si hadden die vrouwen daer wt gheuanghen wech gheleydt van die minste tot die meeste toe, Ende sij en hadden niemant doot gheslaghen, maer sij hadden die met hen gheleydt, ende reysden alsoo wederom nae haren wech,

3

Als Dauid nv comen was, ende sijn mannen tot die stadt, ende vonden die metten viere ontsteken, ende dat hen huysvrouwen met haren soonen ende dochteren waren gheuanghen wech gheleydt,

4

soo hebben Dauid ende tvolck dat met hem was haer stemmen opghehauen, ende iammerlijck gheweent, tot dat hen die tranen begauen,

5

Want beyde Dauids huysvrouwen waren oock gheuanghen wech gheleydt, ⁺Achinoam die Iezrahelitinne, ende Abigail wijlen die huysvrouwe van Nabal den Carmelijter,

+ B

6

ende Dauid is seer bedroeft gheweest, want het volck woude hem steenen, want elcs mans ziele was bitterlijcke bedruct, om hen sonen ende dochteren wille, Maer Dauid worde versterct inden Heere sijnen Godt

7

Ende hy seyde totten priester Abiathar Achimelechs sone. Brengt tot my voorts dat Ephod ende Abiathar bracht den Ephod tot Dauid,

8

ende Dauid vraechde raet vanden Heere, segghende. Sal ick dese roouerkens veruolghen ende die achterhalen oft niet? Ende die Heere seyde tot hem. Veruolchtse, want ghy sultse sonder twijfel vanghen ende hen den roof ontnemen,

9

Aldus soo is Dauid wech ghetrocken ende die ses hondert mannen die met hem waren, ende sij sijn comen totter beken Besor, ende sommighe die moede waren bleuen daer staende,

10

⁺Maer Dauid heeftse veruolcht, hi ende vier hondert mannen, want daer wasser twee hondert achterbleuen staende, die vermoeyt sijnde niet en mochten ouer die beke Besor gaen,

+ C

11

Ende sij hebben eenen Egipschen man opt velt vonden, ende sij brachten hem tot Dauid, ende ghauen hem broot dat hy eten soude, ende water te drincken,

12

ende ooc een brocke van eenen clont vijghen, ende twee bondelkens van rosijnen, Ende als hy gheten hadde soo is sijnen gheest wederom comen, ende hy is vermaect gheweest, want hy en hadde gheen broot gheten noch water ghedroncken in drij daghen ende drij nachten,

13

Aldus soo seyde Dauid tot hem. Wiens sijt ghy ende van waer sijdi? ende waer henen gaet ghy? Die welcke seyde. Ick ben een ionghelinck wt Egipten eens Amaleciters knecht, ⁺maer mijn Heere heeft mi achterghelaten om dat ic eerghisteren begonste sieck te worden,

+ D

14

Want wij sijn wtgheloopen aen die suytsijde van Cerethi ende teghen Iuda, ende teghen die suytsijde van Caleb, ende wij hebben Siceleg metten viere verbrant,

15

Ende Dauid seyde tot hem. Soudi my connen gheleyden tot aen desen hoop? Hy seyde. Sweert my by Godt, dat ghi mi niet dooden en sult ende dat ghy my in mijns heeren handen niet leueren en sult, ende ick sal v tot aen desen hoop leyden, Ende Dauid heuet ghesworen,

16

Ende als hy hem gheleydt hadde, siet so waren die neder gheseten breedt op alle die eerde, etende ende drinckende, ende als eenen grooten feestdach houdende, om alle den buet ende die roouen die sij ghenomen hadde wt der Philistijnen lant ende wt dat landt van Iuda,

17

⁺Ende Dauid sloechse vanden auont aen tot des anderen daechs auonts, ende daer en is niemant van hemlieden ontgaen, dan vier hondert ionghe mans, die op kemels gheclommen waren ende gheuloden.

+ E

18

Aldus so heeft Dauid wederom ghenomen alle tghene dat die Amaleciten ghenomen hadden, ende hy ontnam ooc beyde sijn huysvrouwen,

19

ende daer en ghebrack niemant vanden minsten totten meesten, soo wel vanden sonen als vanden dochteren, ende van alle den roouen, Ende alle dat sij gherooft hadden heeft Dauid wederbracht

20

Ende hy nam alle die cudden van dat cleyn vee, ende die runderen, ende hy dreef die voor sijn aensicht, ende sij seyden. Dit is Dauids roof.

21

Doen quam Dauid tot die twee hondert mannen die van moetheden achterghebleuen waren, ende Dauid niet en hadden connen volghen, ende dien hy beuolen hadde dat sij blijuen sitten souden aen die beke van Besor, die welcke sijn wtghetrocken Dauid te ghemoete ende den volck dat met hem was, Ende Dauid comende tot dat volck heeftse ghegroet vredelijc,

22

⁺Ende alle die quaetste ende onrechtuerdichste vanden mannen die met Dauid ghegaen waren, hebben gheantwoort ende gheseyt. Aenghesien dat sij met ons niet comen en sijn, soo en sullen wij hen niet gheuen vanden roof die wij ontnomen hebben, maer sij sullen hem laten ghenoeghen een ieghelijck met sijn huysvrouwe ende met sijn kinderen, ende als sij die ontfanghen sullen hebben, soo laetse wech gaen,

+ F

23

Doen seyde Dauid. Ghy en sult alsoo niet doen mijn broeders van desen dinghen die ons die Heere gheleuert heeft, die ons oock bewaert heeft, ende heeft die roouerkens die teghen ons eenen oploop ghedaen hadden gheleuert in ons handen,

24

ende niemant en sal v hooren in dese woorden, Want sij sullen ghelijc deel hebben die ten strijde trecken, ende die by de bagagien blijuen, ende sij sullen ghelijckelijck deylen,

25

Ende dit is gheschiet van dien dach ende voortaen alsoo gheordineert ende ghestelt, ende ghelijc een wet in Israhel tot op desen dach toe.

26

⁺Aldus soo is Dauid comen te Siceleg, ende hi heeft ghiften vanden roof ghesonden tot die ouders van Iuda sijn naesten segghende. Ontfanct die benedijdinghe wt den roof van des Heeren vianden,

+ G

27

den ghenen die te Bethel woonden ende te Ramoth aen die suytsijde, ende die te Iether

28

ende die te Aroer woonden, ende die in Sephamoth, ende die in Esthamo,

29

ende die in Rachal ende die ghene die daer woonden in die steden van Ierameel, ende die daer woonden in die steden van Ceni,

30

ende die in Harana ende aen den poel van Asan woonden, ende die in Athach

31

ende die in Hebron woonden, ende den anderen die daer woonden op die plaetsen daer Dauid verkeert hadde, ende sijn mannen.