Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxix. Capittel.

1

⁺ALdus sijn alle die heyren der Philisthijnen vergadert te Aphec, Ende Israhel heeft ooc sijnen legher ghemaect op die fonteyn die te Iezrahel is,

+ A

2

Ende die vorsten der Philistijnen trocken voorts met hoopen van hondert, ende van duysent, Maer Dauid ende sijn mannen waren inden lesten hoop met Achis,

3

Ende die princen der Philistijnen seyden tot Achis, Wat willen hen dese hebreeussche? Ende Achis seyde tot die princen der Philistijnen. En kendi Dauid niet, die Saul des conincks van Israhel knecht gheweest is, ende die nv by my is veel daghen oft iaren? ende ick en hebbe in hem niet vonden, ⁺vanden dach af dat hy tot my ouer gheuloden is tot op desen dach toe,

+ B

4

Maer die princen der Philistijnen worden gram teghen hem, ende seyden tot hem. Laet desen man wederom gaen, ende in sijn stadt blijuen daer ghy hem ghestelt hebt, ende en laet hem met ons inden strijt niet trecken, dat hy ons wederpartijder niet en worde, als wij begonst hebben te strijden, Want hoe soude hi anders sijnen Heere versoenen moghen, dan met onsen hoofden?

5

En is dit niet Dauid den welcken sij songhen aen die dansen, segghende. Saul heeft in sijn duysenden gheslaghen, ⁺maer Dauid in sijn thien duysenden,

+ C

6

Hierom heeft Achis Dauid gheroepen, ende tot hem gheseyt. Alsoo warachtelijc als die Heere leeft soo sijdi oprecht ende goet voor mijn ooghen, ende uwen wtganc ende inganck is by my altijt int heyr, ende ick en heb niet quaets in v gheuonden van dien dach dat ghi tot mi comen sijt tot op desen dach toe, maer den vorsten en behaechdi niet.

7

Aldus soo gaet wederom in vreden, ende en verstoort die ooghen niet van die vorsten der Philistijnen,

8

Ende Dauid seyde tot Achis. Wat heb ick ghedaen? ende wat hebdi in my uwen dienaer vonden vanden iersten daghe dat ic voor v aenschijn gheweest hebbe, tot op desen dach toe, ⁺dat ick niet en mach comen ende strijden teghen mijns Heeren des conincs vianden?

+ D

9

Maer Achis heeft gheantwoordt ende gheseyt tot Dauid. Ick weet wel dat ghy goet sijt in mijn ooghen ghelijc een Enghel Godts, maer die princen der Philistijnen hebben gheseyt. Hy en sal met ons ten strijde niet op trecken,

10

Hierom soo staet op morghen vroech, ghy ende ws Heeren dienaers die met v comen sijn, Ende als ghy inder nacht opghestaen sult sijn ende dat beghint claer dach te worden, soo gaet wech,

11

Aldus is Dauid des nachts opghestaen hy ende sijn mannen dat sij vroech souden wech trecken, ende wederom gaen nae der Phi-

[p. *244]

listijnen lant, Maer die Philistijnen sijn opwaerts ghetrocken tot Iezrahel.