Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxviij. Capittel.

1

⁺ENde het is ghesciet in die daghen, die Philistijnen hebben haer heyren verghadert, dat sij hem bereyden souden ten strijde teghen Israhel, Ende Achis seyde tot Dauid. Ghy sult nv weten dat ghy met my int heyr sult gaen ghy ende v mannen,

+ A

2

Ende Dauid seyde tot Achis. Nv suldy weten wat v dienaer doen sal, Ende Achis seyde tot Dauid Ick sal v maken een behoeder van mijnen hoofde tot allen daghen,

3

Maer Samuel is ghestoruen, ende gheheel Israhel heeft een groot iammerlijck gheschrey ouer hem ghehouden, ende sij hebben hem begrauen te Ramatha in sijn stadt, Ende Saul heeft alle die tooueraers ende waersegghers wt den lande verdreuen ende hy doode die ghene die boose waersegghende gheesten in haren buyck hadden,

4

Ende die Philistijnen sijn vergadert ende ghecomen, ende hebben ha-

[p. *243]

ren heyrleger ghemaect in Sunam, Ende Saul heeft ooc gheheel Israel vergadert, ende is te Gelboe ghecomen.

5

Ende Saul heeft den heyrleger der Philistijnen ghesien ende heeft gheureest, ende sijn herte is bouen maten seer verscrict geweest,

6

Ende hi heeft vanden heere raet geuraecht maer hi en heeft hem niet gheantwoort, noch door droomen, noch door priesters, noch door propheten,

7

Ende Saul heeft tot sijnen knechten gheseyt. Suect mi een vrouwe die eenen waersegghenden gheest heeft dat ick mach tot haer gaen, ⁺ende door haer vernemen die waerheyt, Ende sijn knechten hebben tot hem gheseyt. Daer is een vrouwe die eenen waersegghende gheest heeft te Endor,

+ B

8

Hierom soo heeft hy sijn habijt verandert, ende hem met ander cleederen ghecleedt ende hy is wech ghegaen, ende twee mans met hem ende sij sijn tot die vrouwe des nachts comen, ende hy seyde tot haer. Waersegghet mi door den waerseggenden gheest, ende verwect my vander doot den ghenen die ick v segghen sal,

9

Ende die vrouwe seyde tot hem, Siet ghy weet wel hoe groote dinghen dat Saul ghedaen heeft, ende hoe dat hy alle die waersegghers ende tooueraers wtgheroeyt heeft wten lande, waerom legdi mijnder zielen laghen, dat ick soude ghedoodt worden?

10

Ende Saul heeft haer ghesworen by den Heere segghende. Alsoo warachtelijck als die Heere leeft, v en sal gheen quaet gheschieden om dit dinck,

11

Ende die vrouwe seyde. Wien sal ick v verwecken? Ende hi seyde. Verwect my Samuel,

12

Ende als die vrouwe Samuel ghesien hadde, soo riep sij met luyder stemmen, ende seyde tot Saul. Waerom hebdi my bedroghen? Wan ghy sijt seluer Saul,

13

Ende die coninck seyde haer. En wilt niet vreesen, wat hebdi ghesien? ⁺Ende die vrouwe heeft gheseyt tot Saul. Ic heb die goden sien opclimmen wter aerden,

+ C

14

Ende hy seyde tot haer. Hoedanich is sijn ghedaente? Ende sij seyde. Daer is een out man opcomen ende hi is ghecleedt met eenen mantel, Ende Saul verstont dat Samuel was, ende hi boochde hem neder metten aensicht ter aerden, ende aenbadt,

15

Doen seyde Samuel tot Saul Waerom hebdi my onrust aenghedaen dat ick verwect soude worden? Ende Saul seyde. Ic ben bouen maten seer benauwet, Want die Philisthijnen strijden teghen my, ende Godt is van my ghegaen, ende hy en heeft my niet willen verhooren, noch door die hant der propheten, noch door droomen, daerom heb ic v gheroepen, dat ghy my toonen soudt wat ick doen moet,

16

Ende Samuel seyde. Wat vraechdy my, als die Heere van v ghesceyden is, ende is tot uwen viant ghegaen?

17

Want die Heere sal v doen ghelijc hy ghesproken heeft in mijn hant, ende hy sal v rijck van uwer hant afsnijden, ende dat gheuen uwen naesten Dauid,

18

om dat ghy des Heeren stemme niet ghehoorsaem en sijt gheweest, noch en hebt die gramscap van sijnen toren niet volbracht teghen Amalec, Daerom tghene dat ghy lijdet, dat heeft die Heere heden ghedaen,

19

Ende die Heere sal heden Israhel oock met v in die handen vanden Philistijnen leueren, ⁺Maer morghen sult ghi ende v sonen met my sijn, Ende die Heere sal dat heyr van Israhel oock leueren inder Phi-listijnen handen,

+ D

20

Ende terstont viel Saul lancks wtghesterct neder ter aerden, Want hi was seer verscrict van Samuels woorden, ende daer en was gheen cracht in hem, want hy en hadde van alle dien daghe gheen broot gheten.

21

Aldus soo is die vrouwe by Saul comen (want hy was seer ontstelt) ende sij seyde tot hem. Siet v dienstvrouwe heeft uwer stemmen ghehoorsaem gheweest ende ick heb mijn ziele in mijn handen ghestelt, ende ick heb v woorden ghehoort die ghy tot my ghesproken hebt,

22

Daerom soo wilt ghy nv oock nae uwer dienstvrouwen stemme hooren, ende ick sal v een bete broots voor setten, dat ghi etende moecht versterct worden, ende alsoo moecht voorts ouer wech gaen,

23

Maer hy weygherdet, ende hy seyde. Ick en sal niet eten, Maer sijn knechten ende die vrouwe dwonghen hem, Ende ten lesten verhoorende hen stemme, stont hy op vander aerden ende sadt opt bedde,

24

Ende die vrouwe hadde in haer huys een ghemest calf, ende si heeft haer ghehaest ende heuet doot gheslaghen, ende nemende meel besloech sij dat, ende bacte ongheheefde coecken,

25

ende sij sette dat voor Saul ende voor sijn knechten, Die welcke als sij gheten hadden soo stonden sij op, ende reysden alle dien heelen nacht.