Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvij. Capitttel.

1

⁺ENde Dauid seyde in sijn herte. Ick sal noch eens op eenen dach in Sauls handen vallen en eest niet beter dat ick vliede, ende dat ick behouden worde in der Philistijnen lant, op dat Saul mishope, ende dat hy my voortaen niet meer en soecke in alle die palen van Israhel? Aldus so sal ic sijn handen vlieden,

+ A

2

Ende Dauid is opghestaen ende hy is wech ghegaen ende ses hondert mannen met hem tot Achis Maochs sone den coninc van Geth,

3

Ende Dauid heeft by Achiis te Geth ghewoont, hy ende sijn mannen ende sijn huysghesin, Dauid ende beyde sijn huysvrouwen, Achinoam van Iezrahel, ⁺ende Abigail die huysvrouwe van Nabal des Carmeliters,

+ B

4

Ende het is Saul te kennen ghegheuen dat Dauid te Geth gheuloden was, ende hi en heeft voortaen niet meer daerom ghearbeyt om hem te soecken,

5

Doen seyde Dauid tot Achis. Eest sake dat ick gratie in v ooghen vonden hebbe, soo gheeft my plaetse in een stadt van desen lande dat ick daer woonen mach, want waerom woont v dienaer in des conincs stadt met v?

6

Hierom soo heeft ham Achis op dien dach ghegeuen Siceleg, ⁺om welcke sake is Siceleg der coninghen van Iuda gheworden tot opden dach van heden,

+ C

7

Ende het ghetal der daghen dat Dauid inder Philistijnen lant woonde is gheweest vier maenden,

8

Ende Dauid ende sijn mannen sijn opghetrocken, ende sij hebben veel roofs ghehaelt van Gessuri ende Gerzi ende vanden Amaleciten, want dese dorpen worden bewoont van outs int lant alsmen gaet na Sur tot int lant van Egipten,

9

Ende Dauid versloech alle dat lant, ende hi en liet daer niet eenen leuenden man oft vrouwe, Ende nemende scapen ende ossen, ende eselen, ⁺ende kemelen, ende cleederen, keerde hy wederom ende quam tot Achis,

+ D

10

Doen seyde Achis tot hem. Teghen wien hebdi heden opgheloopen? Ende Dauid antwoorde Teghen die suytsijde van Iuda ende teghen die suytsijde van Ierameel, ende teghen die suytsijde van Ceni,

11

gheenen man oft vrouwe en liet Dauid leuen, noch hy en brachtse niet te Geth, segghende. Dat sij by auontueren teghen ons niet en spreken. Dit dede Dauid ende dit was sijn voornemen alle die daghen dat hy inder Philistijnen lant woonde,

12

Daerom soo heeft Achis Dauid betrout, seggende. Hi heeft veel quaets ghedaen teghen sijn volck van Israhel, daerom sal hy mijn eewich knecht sijn.