Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxvi. Capittel.

1

⁺ENde die van Ziph quamen tot Saul in Gabaa, segghende. Siet Dauid is verborghen op den hueuele van Hachila, welck is gheleghen teghen ouer die woestijne,

+ A

2

Ende Saul is opghestaen ende nederwaerts ghegaen in die woestijne Ziph, ende met hem drij duysent mannen vanden ghecoren wt Israhel, dat hy Dauid soecken soude in die woestijne Ziph,

3

Ende Saul heeft sijnen heyrlegher ghemaect in Gabaa Hachila, welc was teghen ouer die woestijne inden wech, Maer Dauid woonde in die woestijne,

4

Maer siende dat Saul hem nae quam in die woestijne, soo sandt hy bespieders wt, ende heeft vernomen dat hy warachtelijc daer comen was,

5

Ende Dauid stont al heymelijck op, ende hi is comen ter plaetsen daer Saul was, Ende als hy die plaetse ghesien hadde daer Saul sliep, ende Abner Ners sone die opperveltheere van sijnen heyre, ende Saul slapende in sijn tente, ende alle dat ander ghemeyn volck rontsomme hem,

6

Soo seyde Dauid tot Achimelech den Hethiter, ende tot Abisai den sone van Saruie Ioabs broeder, segghende. Wie sal met my beneden gaen tot Saul inden legher? Ende Abisai seyde, ic sal met v nederwaerts gaen,

7

Aldus so sijn Dauid ende Abisai des nachts totten volcke comen, ende sij hebben Saul gheuonden ligghende ende slapende in sijn tente, ende een lancie in die eerde vast ghesteken aen sijn hooft, Maer Abner ende dat volc slapende al rontsomme hem,

8

⁺Ende Abisai seyde tot Dauid. Die Heere heeft heden uwen viant besloten in v handen, Hierom soo sal ick hem nv metter lancien eens teghen die eerde doorsteken, ende soo en salt die tweede reyse niet meer van noode wesen,

+ B

9

Ende Dauid seyde tot Abisai. En doot hem niet, want wie sal sijn hant steken aen des Heeren ghesalfden, ende on-

[p. *242]

noosel wesen?

10

Ende Dauid seyde. Alsoo warachtelijck als die Heere leeft, ten sij dat hem die Heere verslae oft dat sijnen dach come dat hy sterue, oft dat hy ter oorloghe trecke ende daer sterue,

11

soo moet mi die Heere ghenadich wesen, dat ick mijn hant niet en steke aen des Heeren ghesalfden, Daerom soo neemt nv die lancie die aen sijn hooft is, ende den cop metten water, ende laet ons wech gaen,

12

Aldus soo heeft Dauid die lancie ende den cop metten water ghenomen die aen Sauls hooft was, ende si sijn wech ghegaen, ende daer en was niemant die dat sach oft mercte, oft wacker worde, maer sij sliepen alle gader, want den slaep des Heeren haddese oueruallen,

13

Ende als Dauid ouer ghegaen was teghen ouer, ende stont opt hoochste des berchs van verre, ende datter een groote ruymte was tusschen hen,

14

soo riep Dauid tot dat volck, ende tot Abner Ners sone, seggende. En suldi niet antwoorden Abner? Ende Abner antwoordende seyde. ⁺Wie sijt ghy die daer roept, ende doet den coninck onrust aen?

+ C

15

Ende Dauid seyde tot Abner. En sijdi niet een man? ende wie anders is ws ghelijck in Israhel? Waerom en hebdi dan uwen Heere den coninc niet bewaert? Want daer is een vanden scharen wt ghegaen om dat hy uwen Heere den coninck dootslaen soude,

16

Ten is niet goet dat ghylieden ghedaen hebt Alsoo warachtelijck als die Heere leeft, ghy sijt alle kinderen des doots, die uwen Heere den ghesalfden des Heeren niet bewaert en hebt, Daerom so besiet nv waer dat des conincs lancie is ende waer sijnen cop is metten water, die aen sijn hooft was,

17

Doen kende Saul Dauids stemme, ende seyde. En is dit niet v stemme mijn sone Dauid? Ende Dauid seyde. Het is mijn stemme mijn Heere die coninck,

18

Ende hi seyde Om wat sake veruolcht mijn heere sinen knecht, wat heb ick ghedaen? wat quaet is in mijn handen?

19

Daer om soo bid ick v mijn Heere die coninc wilt doch nv hooren ws dienaers woorden. Eest dat die Heere v verwect teghen my, soo laet een welriekende sacrificie ontsteken, Maer eest dat die kinderen der menschen v op rucken, soo sijn sij vermalendijt voor des Heeren aenschijn, die my heden verdreuen hebben, dat ick in des Heeren erfdeel niet woonen en soude, segghende. ⁺Ghaet henen ende dient vreemde Goden,

+ D

20

Ende nv soo en laet mijn bloet niet wtghestort worden op die aerde voor den Heere, want die coninc van Israhel is wtghetrocken om een vloo te soecken, ghelijckmen een velthoen veruolcht opt gheberchte

21

Ende Saul seyde. Ick heb ghesondicht, Gaet wederom mijn sone Dauid, want ick en sal v voortaen gheen quaet meer doen, om dat mijn ziele heden costelijck gheweest is in v ooghen, Want het is openbaer dat ick dwaselijck ghedaen hebbe, ende dat ick bouen maten seer onwetende gheweest hebbe,

22

Ende Dauid antwoordende seyde. Siet daer is des conincs lancie, laet een van des conincs knechten ouer comen diese hale,

23

Maer die Heere wil eenen ieghelijcken loon gheuen nae sijn rechtuerdicheyt ende ghetrouwicheyt, Want die Heere heeft v heden in mijn hant gheleuert, ende ick en heb mijn hant niet willen wtsteken aen des Heeren ghesalfden,

24

Ende ghelijck v ziele heden is groot gheacht gheweest in mijn ooghen, alsoo moet mijn ziele groot gheacht worden in des Heeren ooghen, ende hy wil my verlossen van alle benautheyt,

25

Hierom soo heeft Saul tot Dauid gheseyt. Ghebenedijt sijdi mijn sone Dauid, ende voorwaer ghy sult doende doen, ende ghy sult machtich worden ende machtich blijuen, Aldus is Dauid sijnen wech henen ghegaen, ende Saul is wederom ghekeert in sijn plaetse.