Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxxi. Capittel.

1

⁺MAer die Philistijnen streden teghen Israhel, ende die mannen van Israhel sijn gheulucht voor daenschijn der Philistijnen ende si vielen verslaghen opt gheberchte van Gelboe,

+ A

2

Ende die Philistijnen hebben sterck gheuallen op Saul ende op sijn sonen ende sij hebben verslaghen Ionathan, ende Abinadab, ende Melchisua Sauls sonen,

3

ende die heel cracht vanden strijde is op Saul ghekeert, ende die scutters hebben hem achterhaelt, ende hy is seer swaerlijck vanden scutters ghewont,

4

Doen seyde Saul tot sijnen wapendragher. Trect v swaert wt die scheyde ende slaet my, op dat dese onbesnedene by auontueren

[p. *245]

niet en comen en slaen my doot, ⁺haren spot met my makende, Ende sijn wapendragher en wilde dat niet doen, want hy was met te seer grooten grouwel veruaert, Aldus soo heeft Saul sijn swaert ghegrepen, ende hy is daer in gheuallen,

+ B

5

Ende als sijn wapendragher dat ghesien hadde (te weten dat Saul doot was) soo is hy oock in sijn swaert gheuallen, ende is met hem ghestoruen,

6

Aldus is Saul ghestoruen ende sijn drij sonen ende sijn wapendragher, ende alle sijn mannen te samen op dien dach.

7

Ende die kinderen van Israhel die ouer die valleye ende ouer die iordane waren, ⁺siende dat die mannen van Israhel gheuloden waren, ende dat Saul met sinen kinderen doot was, hebben haer steden verlaten ende sijn gheulucht, ende die Philistijnen sijn ghecomen ende hebben daer ghewoont.

+ C

8

Des anderen daechs sijn die Philistijnen comen, dat sij die verslaghen souden pluysteren, ende sij vonden Saul ende sijn drij sonen ligghende opt gheberchte van Gelboe,

9

Ende sij hebben Sauls hooft af gheslaghen, ende sij deden hem sijn harnasch wt, ende sij hebben dat inder Philistijnen lant ghesonden al rontsomme, datment vercondighen soude inder afgoden tempel, ende onder die luyden,

10

⁺Ende sij stelden sijn wapenen in Astharoths tempel, maer sijn lichaem hebben sij ghehanghen opden muer van Beth-san,

+ D

11

Het welck als die van Iabes Galaad ghehoort hebben, alle dat die Philistijnen Saul ghedaen hadden,

12

soo sijn alle die stercste mannen opghestaen, ende hebben alle den nacht ghewandelt, ende hebben ghehaelt Sauls doot lichaem, ende sijnder sonen doode lichamen vanden muer van Bethsan, Ende sij sijn te Iabes Galaad comen, ende hebben die daer metten vier verbrant,

13

ende si namen hen ghebeenten, ende begroeuent int bosch van Iabes, ende si vasten seuen daghen lanck.

Hier voleyndt dat ierste boeck der Coninghen.