Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiiij. Capittel.

1

⁺HIerom so is Dauid van daer opwaerts ghereyst, ende heeft ghewoont in die alder beurijtste plaetsen van En-gaddi.

+ A

2

Ende als Saul wederom comen was, nae dat hy die Philistijnen veruolcht hadde, soo hebben sij hem ghebootscapt segghende, Siet Dauid is in die woestijne Engaddi.

3

Aldus soo heeft Saul met hem ghenomen drij duysent wtghecoren mannen van gheheel Israel, hy is wtghereyst om Dauid ende sijn mannen te soecken, ooc op die aldersteychste steenrootsen die alleen den wilden bocken gancbaer waren.

4

Ende hy is ghecomen aen die scaepstallen die onder weghen laghen, ende daer was een speluncke, in die welcke Saul ghegaen is om sijn gheuoech te doene, Maer Dauid met sijnen mannen waren int binnenste van dier speluncken verborghen.

5

Ende Dauids knechten seyden tot hem, Siet dit is den dach daer af dat die Heere tot v ghesproken heeft, Ick sal v leueren uwen viant, dat ghy hem doen soudt alsoot belieuen sal in uwen ooghen. Hierom soo stont Dauid op, ende sneedt af den boort van Sauls mantel al swijghende.

6

Daer nae sloech Dauid sijn herte om dat hy den boort van Sauls mantel afghesneden hadde.

7

Ende hy seyde tot sijnen mannen, Die Heere wil my ghenadich wesen, dat ic dit dinck niet en doe mijnen Heere den ghesalfden des Heeren, dat ick mijn hant soude aen hem steken, want hy is een ghesalfde des Heeren, Alsoo warachtelijck als die Heere leeft, ten sij dat hem die Heere slae, oft dat sijnen sterfdach coemet, ⁺dat hy sterue, oft dat hy ten strijde treckende daer verslaghen worde, soo moet my die Heere ghenadich sijn, dat ick mijn hant niet en steke

+ B

[p. *240]

aen des Heeren ghesalfde,

8

Ende Dauid heeft sijn mannen ghebroken met woorden, ende hy en heeft hen niet toeghelaten dat sij teghen Saul opstaen souden, Maer Saul opstaende wter speluncken ghinck voorts sijnen iersten wech,

9

Ende Dauid is nae hem opghestaen, ende wter speluncken ghegaen sijnde heeft hi achter Sauls rugghe gheroepen, segghende. Mijn Heere coninck, Ende Saul sach achter hem omme, ende Dauid hem neder booghende metten aensicht ter aerden, heeft aenbeden

10

ende gheseyt tot Saul. Waer om hoordi nae die woorden der menschen die segghen Dauid soect arch teghen v,

11

Siet heden hebben v ooghen ghesien dat die Heere v in mijn handen gheleuert heeft in die speluncke, ende ick dachte dat ick v dooden soude, maer mijn ooghe heeft v ghespaert, ⁺want ick seyde. Ick en sal mijn hant niet wt reycken aen mijnen Heere, want hy is des Heeren ghesalfden,

+ C

12

Daer toe noch meer mijn vader besiet, ende kent hier den boort van uwen mantel in mijn hant, want doen ic dat wterste van uwen mantel afsnede, so en wilde ick mijn hant aen v niet steken, Aenmerct ende siet datter gheen quaet in mijn hant en is, noch gheen onrechtuaerdicheyt, noch ick en heb teghen v niet ghesondicht, Maer ghy legghet laghen mijnder zielen dat ghy die wechnemen soudt,

13

Die Heere ordeele tusschen v ende my, ende die Heere wreke my van v, maer mijn hant en sij op v niet,

14

Ghelijckmen int ghemeyn oudt segwoort segt. Vanden boosen sal boosheyt wtcomen Daerom soo en moet mijn hant op v niet wesen, Wien veruolchdy doch ghy coninck van Israhel?

15

wien veruolchdi? ghy veruolcht eenen dooden hont ende een vloo,

16

Die Heere die sij rechter ende ordeele tusschen my ende v, ende hy aensie ende ordeele mijn sake, ende hy moet my wt v hant verlossen,

17

Maer als Dauid sprekende tot Saul alle dese woorden volseyt hadde, soo seyde Saul. ⁺En is dit v stemme niet mijn sone Dauid? Ende Saul hief sijn stemme op ende weende,

+ D

18

ende hy seyde tot Dauid. Ghy sijt rechtuaerdigher dan ick, want ghi hebt my goet ghedaen, ende ic heb v met quaden gheloont,

19

Ende ghy hebt heden ghetoont wat goet dat ghy mi ghedaen hebt, hoe dat die Heere mi in v hant gheleuert heeft, ende dat ghy my niet ghedoot en hebt,

20

Want wie ysser die sijnen viant sal laten gaen in eenen goeden wech, als hy hem gheuonden heeft, Maer die Heere wil v van deser weldaet loonen, voor het tghene dat ghy aen my heden ghedaen hebt,

21

Ende nv aenghesien dat ick wel weet dat ghy sekerlijck coninck sijn sult, ende dat ghi dat rijck van Israhel in v hant hebben sult,

22

daerom sweert my byden Heere dat ghi mijn saet nae mi niet en sult te niet doen, ende dat ghy mijnen naem van mijns vaders huys niet wech nemen en sult,

23

Ende Dauid heeft Saul dat ghesworen, Aldus soo is Saul wech gheghaen in sijn huys, ende Dauid ende sijn mannen sijn oock opwaerts ghetrocken nae die bevrijtste plaetsen.