Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxiij. Capittel.

1

⁺ENde sij hebben Dauiden ghebootscapt segghende, Siet die Philistinen bestrijden Ceilam ende sij beroouen die dorschvloeren.

+ A

2

Hier om heeft Dauid den Heere te rade ghegaen, segghende, Sal ic gaen ende slaen dese Philistijnen? Ende die Heere heeft tot Dauid gheseyt, Gaet henen, ende ghy sult die Philistinen verslaen, ende Ceila behouden.

3

Ende die mannen die met Dauid waren seyden tot

[p. *239]

hem, Siet sij vreesen hier sijnde int lant van Iuda, hoe veel te meer eest sake dat wij gaen te Ceila teghen die heyrscaren der Philistijnen?

4

Aldus soo heeft Dauid noch eens vanden Heere raet gheuraecht, Die welcke antwoordende heeft gheseyt tot hem, Staet op, ende gaet tot Ceila, Want ick sal die Philistijnen in v hant leueren.

5

Hierom is Dauid ende sijn mannen ghereyst na Ceila, ende hy heeft teghen die Philistinen ghestreden, ende heeft haerlieden vee wech ghedreuen, ende die met eenen grooten slach gheslaghen, ende Dauid heeft die ingesetenen van Ceila verlost,

6

Voorts ten tijde doen Abiathar Achi-melechs sone vluchte tot Dauid in Ceila, soo was hy afcomen hebbende met hem eenen Ephod.

7

Ende het is Saul gheboodtscapt dat Dauid te Ceila comen was. Ende Saul seyde, Die Heere heeft hem in mijn handen gheleuert, ende hy is beuanghen, in een stadt ghegaen sijnde daer poorten ende sloten sijn.

8

⁺Ende Saul heeft alle den volcke beuolen dat sij nederwaerts ten strijde trecken souden in Ceilam ende dat sij Dauid met sijnen mannen omlegghen soude

+ B

9

Dwelck als Dauid vernomen hadde, dat Saul al heymelijck op handen hadde hem quaet te doene, so seyde hy tot Abiathar den priester, Doet den Ephod aen.

10

Ende Dauid seyde, Heere Godt van Israel v die naer heeft een tijdinghe ghehoort, dat Saul opstelt te comen in Ceila, om die stadt te bederuen, om mijnen wille.

11

Sullen die mannen van Ceila my in sijn handen leueren? ende sal Saul ooc nederwaerts comen also v dienaer ghehoort heeft? Heere Godt van Israel gheuet uwen dienaer te kennen. Ende die Heere heeft gheseyt, Hy sal nederwaerts comen.

12

Ende Dauid seyde, Sullen die mannen van Ceila my ende die mannen die by my sijn oock in Sauls handen leueren? Ende die Heere heeft gheseyt, Sij sullen v leueren.

13

Daer om is Dauid opghestaen, ende sijn mannen omtrent ses hondert, ende wt Ceila ghetrocken sijnde hebben sij onghestadelijc ghegaen herwaerts ende derwaerts onseker. Ende het is Saul ghebootscapt dat Dauid van Ceila gheulucht was, ende behouden. Waerom dat hy niet en heeft willen wt trecken.

14

Maer Dauid woonde in die woestijne in die stercste plaetsen, ende hi bleef op dat gheberchte der woestijnen van Ziph op eenen donckeren berch, Nochtans socht hem Saul tallen daghen ende die Heere en heeft hem niet gheleuert in sijn handen.

15

Ende Dauid heeft ghesien dat Saul wtghegaen was om sijn ziele te suecken, ⁺maer Dauid was in die woestijne Ziph int bosch.

+ C

16

Ende Ionathas Sauls sone is opghestaen ende is by Dauid int bosch ghegaen, ende hy heeft sijn handen ghesterct in Gode, ende heeft hem gheseyt,

17

En wilt niet vreesen, want mijns vaders Sauls hant en sal v niet vinden, Ende ghy sult regneren ouer Israhel, ende ic sal naest v die tweede sijn, Maer Saul mijn vader die weet dat ooc wel

18

Hierom soo hebben sij beyde een verbont ghemaect voor den Heere, ende Dauid is in die bosschagie bleuen, maer Ionathas is wederom ghekeert in sijn huys.

19

Hier om soo sijn die van Ziph opghetrocken tot Saul te Gabaa segghende, Seit en is Dauid by ons niet verborghen in die alderbeurijtste plaetsen der bosschagien op den hoeuele Hachila, welck leyt ter rechter sijden vander woestijnen?

20

Daerom soo coemt nv nederwaerts, ghelijck v ziele begheert heeft dat ghy nederwaerts comen soudt, ende tsal ons behooren hem te leueren in des conincs handen.

21

Ende Saul heeft gheseyt, Ghebenedijt sijdi vanden Heere, dat ghy medelijden met mi ghehadt hebt.

22

Aldus soo bid ick v, ghaet henen wech ende doet neerstelijck, ende hebt v scalckelijck, ende slaet ghade die plaetse daer sijnen voet is, oft wie hem daer ghesien heeft, Want hy ouerleyt van my, dat ic hem listelijcke laghen legghe.

23

⁺Aenmerct ende besiet alle die heymelijcke plaetsen daer hy verborghen is, ende coemt dan wederom by my, met een seker bootschap, dat ick mach met v lieden gaen. Ende al hadde hy hem oock onder die aerde verberghen, soo sal ic hem doorsoecken in alle die duysenden van Iuda.

+ D

24

Ende sij opstaende sijn te Ziph gheghaen, voor Saul. Maer Dauid ende sijn mannen waren in die woestijne Maon opt plat lant ter rechter sijden van Iesimon.

25

Hierom is Saul met sijnen ghesellen ghegaen om hem te soecken, ende het is Dauid ghebootschapt, ende hy is terstont nederwaerts ghegaen nae die steenrootse, ende hy verkeerde in die woestijne Maon. Het welck als Saul ghehoort hadde, soo heeft hy hem veruolcht in die woestijne Maon,

26

Ende Saul ghinck ter sijden vanden berch op die een sijde, ende Dauid met sijnen mannen waren op die ander sijde vanden berghe, Maer Dauid mishoepte dat hy soude moghen ontghaen van Sauls aensicht. Aldus soo hebben Saul ende sijn mannen Dauid met sijnen mannen omringhet int ronde als een croone, om dat sij die vanghen souden

27

Ende daer is een bode tot Saul comen segghende, Haest v en coemt, want die Philistijnen sijn met grooter menichten opt lant gheuallen.

28

Aldus soo is Saul wederom ghegaen, ophoudende van Dauid te veruolghen, ende hy is ghereyst teghen die Philistijnen. Daer om hebben sij die plaetse ghenoemt die sceydende steenrootse.