Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xxij. Capittel.

1

⁺HIerom is Dauid van daer ghegaen, ende gheuloden in die speluncke van Odollam, dwelck als sijn broeders ende alle sijns vaders huys ghehoort hadden, soo sijn sij daer tot hem nederwaerts comen.

+ A

2

Ende daer sijn tot hem vergadert alle die benaut waren, ende met scult beladen, ende die bitter van herten waren, ende hy is haerlieden hooftman gheworden, ende daer sijn ontrent vierhondert mannen by hem gheweest.

3

Ende Dauid is van daer ghetrocken te Maspha, welck is in Moab, ende hy seyde totten coninck van Moab, Ick bidde v laet doch mijn vader ende mijn moeder by v woonen, tot dat ic weten mach wat Godt my doen sal.

4

Ende hy heeftse ghelaten voor des conincs van Moabs aensicht. Ende sij bleuen by hem alle den tijt dat Dauid op sijn hoede was.

5

Ende Gad die prophete seyde tot Dauid, en wilt in die besloten hoede niet blijuen, reyst voorts ende gaet int lant van Iuda. Ende Dauid is wech ghereyst, ende is comen int bosch Hareth.

6

Ende Saul heeft ghehoort dat Dauid ghesien is gheweest, ende die mannen die met hem waren, ⁺Maer als Saul te Gabaa woonde, ende was int bosch welck te Rama is, hebbende een lancie in sijn hant, ende alle sijn knechten rontsomme hem stonden,

+ B

7

soo seyde hi tot sijnen knechten die by hem stonden, Hoort my nv ghy kinderen van Iemini, meyndi dat die sone van Isai v alle gader sal ackerlanden ende wijngaerden gheuen, ende dat hy v alle gader sal hooftmannen maken ouer duysent mannen ende capiteynen ouer hondert mannen,

8

aengesien dat ghi alle teghen my ghesworen hebt, also datter niemant en is die my iet te kennen gheuet, Besonder want mijn sone een verbont ghemaect heeft metten sone van Isai? Daer en es niemant van v lieden, die medelijden heeft met mij? oft diet mij te kennen gaue, om dat mijn sone mijnen knecht teghen mij opgheruct heeft, die welcke mij laghen leght tot op desen dach toe,

9

Doen antworde Doech een man van Edom die by hem stont, ende was dierste onder Sauls knechten. Ic heb (seyt hy) den sone van Isai ghesien te Nobe by Achi-melech Achitobs sone den priester,

10

die welcke voor hem van den Heere raet vraechde, ende hy gaf hem spijse, ende dat sweert van Goliath den Philistijn gaf hy hem oock.

11

Aldus soo heeft Saul wtghesonden om Achimelech den priester Achitobs sone te doen halen, ende alle sijns vaders huys al priesters woonende te Nobe, die welcke allegader sijn by den coninck comen.

12

Ende Saul seyde tot Achi-melech, Hoort ghy sone van Achitob. Ende hy antwoorde, Hier ben ick Heere,

13

Ende saul seyde tot hem, Waer om hebbi teghen my ghesworen, ghy ende die sone van Isai, ⁺ende hebt hem brooden ende een sweert ghegheuen, ende den Heere voor hem raets gheuraecht dat hy teghen my opstaen soude, een heymelijck laghen legghere blijuende tot op desen dach toe?

+ C

14

Ende Achimelech antwoordende den coninck seyde, Ende wie isser doch onder allen v knechten soo ghetrouwe als Dauid, ende des conincs behoude sone, ende reysende nae v ghebodt, ende glorieus in v huys?

15

Heb ick heden ierst begonst voor hem vanden Heere raet te vraghen? Verre sij dat van my, Die coninck en wil sulck dinck niet vermoeden teghen sijnen dienaer in alle mijns vaders huys, want v dienaer en heeft niet met allen gheweten van deser saken, tsij groot oft cleyne.

16

Ende die coninck seyde, Ghy sult die doot steruen Achi-melech, ghy ende alle ws vaders huys.

17

Ende die coninck seyde tot den artsiers die rontsomme hem stonden, Keert v omme ende slaet die priesters des Heeren doot, want hen hant is met Dauid, wetende dat hy vluchte, ende sij en hebben my dat niet te kennen ghegheuen. Maer des conincs knechten en wilden hen handen niet wtsteken aen des Heeren priesters.

18

Doen seyde die coninck tot Doeg, Keert v ghy om, ende valt op die priesters. Ende Doeg die Edumiter hem omkeerende oueruiel die priesters, ⁺ende versloech op dien dach vijfentachentich mannen ghecleedt met lijnen Ephods cleederen.

+ D

19

Ende hy versloech metten swaerde der priesteren stadt Nobe, mannen ende vrouwen, cleyn kinderen ende suyghelinghen, ossen ende esels, ende scapen vernielde hy metten scerp vanden swaerde.

20

Maer een sone van Achimelech Achitobs sone, wiens naem was Abiathar, ontcomende vluchte tot Dauid,

21

ende hy gaf hem te kennen hoe dat Saul des Heeren priesters ghedoot hadde.

22

Ende Dauid seyde tot Abiathar, Ick wist wel op dien dach doen die Edumijter Doeg daer was, dat hijt sonder twijfel Saul segghen soude, Ick ben sculdich alle der zielen ws vaders.

23

Blijft by my, en wilt niet vreesen, eest dat iemant mijn ziele suect, die sal v ziele oock suecken, ende ghy sult met my behouden worden.

[afbeelding]