Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xix. Capittel.

1

⁺SAul heeft ghesproken tot Ionathas sijnen sone ende tot alle sijn knechten, dat sij Dauid dooden souden. Maer Ionathas Sauls sone hadde Dauiden seer lief,

+ A

2

Ende Ionathas gaf dit Dauid te kennen, segghende, Mijn vader Saul leyt daer op toe, om v te dooden, daer om bidde ick v wilt v doch morghen vroech wachten, ende houdt v int heymelijck, ende blijft verborghen.

3

Ende ic sal wtgaen ende staen by mijnen vader opt velt, soo waer hy sijn sal, ende ick sal van v tot mijnen vader spreken, ende al wat ic sien sal, dat sal ick v bootscappen.

4

Aldus heeft Ionathas van Dauid int beste ghesproken tot Saul sijnen vader, ende hy heeft tot hem gheseyt, O coninc en sondicht niet teghen uwen knecht Dauid, want hy en heeft v niet misdaen, ende sijn wercken sijn v seer goet,

5

Ende hy heeft sijn ziele in sijn hant ghestelt, ende den Philistijn verslaghen, Ende die Heere heeft een groote salicheyt ghewracht voor geheel Israel, ghy hebbet ghesien, ende v daer af verblijt, Waerom sondicht ghy dan aen dat ontsculdich bloet, doodende Dauid die sonder scult is?

6

Doen Saul dit ghehoort hadde, soo worde hy te vreden ghestelt door Ionathas stemme, ende swoer, Alsoo warachtelijck als die Heere leeft, hy en sal niet ghedoot worden.

7

Aldus so heeft Ionathas Dauid gheroepen, ende hem alle dese woorden te kennen ghegheuen, ende Ionathas heeft Dauid binnen by Saul ghebracht, ⁺ende hy is voor hem gheweest ghelijck hy daer ghisteren ende eerghisteren was.

+ B

8

Wederom isser noch een orloghe op ghestaen, ende Dauid is wt ghetrocken, ende heeft teghen die Philistijnen ghestreden, ende heeft die gheslaghen met eenen seer grooten slach, Ende sij vloden van sijnen aensicht.

9

Ende den quaden gheest des Heeren is in Saul comen, ende hy sadt in sijn huys, ende hadde een lancie in sijn hant, Maer Dauid die speelde opt snaerspel met sijn hant.

10

Ende Saul leyder op toe, om Dauid metter lancien aenden want te speten, maer Dauid wijcte van Sauls aensichte, maer die lancie sonder wonde te maken vlooch inden want, Ende Dauid vloodt, ende werde dien nacht behouden.

11

Hier om so heeft Saul sijn dienaers in Dauids huys ghesonden dat sij hem bewaren souden, ende datmen hem des morghens vroech dooden soude. Ende doen Michol

[p. *236]

sijn huysvrouwe dit hadde Dauid te kennen ghegeuen segghende, Ten sij dat ghi v seluen desen nacht verlost, soo suldi morghen steruen,

12

soo heeft sij hem neder ghelaten door een venster, ende hy is wech ghegaen ende gheuloden, ende behouden.

13

Doen nam Michol een staende beeldt, ende leyde dat opt bedde, ende een harich gheyten vel heeft sij gheleydt aen thooft van dien, ende sij decte dat beelt met cleederen.

14

Ende Saul sandt sijn dienaers, die Dauid souden metter macht vanghen, ende daer is gheantwoort dat hy sieck was.

15

Ende Saul heeft wederom boden ghesonden dat sij Dauid besien souden segghende, Brengt hem tot my opt bedde datmen hem doode.

16

Ende als die boden daer comen waren soo isser een beelt opt bedde vonden ende gheyten vellen aent hooft van dien.

17

⁺Ende Saul seyde tot Michol, Waerom hebdi my aldus bedroghen, ende hebt mijnen viant laten gaen dat hy wechvlieden soude? Ende Michol antwoorde tot Saul, Om dat hy my seyde, Laet mi gaen oft anders sal ic v dooden.

+ C

18

Maer Dauid vliedende is behouden, ende hy is by Samuel ghecomen te Ramatha, ende heeft hem ghebootscapt alle dat hem Saul ghedaen hadde, ende hy ende Samuel sijn wech ghegaen, ende hebben ghewoont in Naioth.

19

Ende het is Saul ghebootschapt van sommighe die seyden, Siet Dauid is te Naioth in Ramatha.

20

Hier om heeft Saul dienaren wtghesonden, dat sij Dauid metter macht vanghen souden, die welcke als sij saghen den hoop der propheten die propheteerden ende Samuel ouer hen staende, soo is den gheest des Heeren oock in hen worden, ende sij begonsten ooc te propheteren.

21

Ende als dit Saul ghebootscapt worde, soo heeft hy noch ander boden wtghesonden, maer die propheteerden oock. Ende Saul heeft noch die derde boden wtghesonden, die welcke oock ghepropheert hebben. ⁺Ende Saul seer ghestoort sijnde,

+ D

22

is selue oock nae Ramatha ghegaen, ende hy is comen tot den grooten put die daer is te Socho, ende hy heeft gheuraecht ende gheseyt, Op wat plaetse sijn Samuel ende Dauid? Ende hem is gheseyt, Siet sij sijn te Naioth in Ramatha,

23

ende hy is voorts ghegaen te Naioth in Ramatha, ende den gheest Godts is ooc gheworden op hem, ende hy wandelde voortgaende, ende hy propheteerde tot dat hy quam te Naioth in Ramatha.

24

Ende hy heeft oock hem seluen ghebloot van sijnen cleederen, ende propheteerde metten anderen voor Samuel, ende hy heeft al naect ghesonghen alle dien dach ende nacht, Waer wt dat dit ghemeyn segwoordt comen is, Is Saul ooc onder die propheten?