Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xviij. Capittel.

1

⁺ENde tis ghesciet (doen Dauid sijn woorden tot Saul volseyt hadde) dat Ionathas ziele met Dauids ziele vereenicht worde, ende Ionathas heeft hem bemint ghelijck sijn eyghen ziele.

+ A

2

Ende Saul heeft hem op dien dach aenghenomen, ende hy en heeft hem gheen orlof ghegeuen dat hy wederom in sijns vaders huys gaen soude.

3

Doen hebben Dauid ende Ionathas een verbont ghemaect, want Ionathas beminde hem ghelijc sijn ziele,

4

Want Ionathas track sijn cleedt wt daer hy mede ghecleedt was, ende gaf dat Dauid, ende voorts alle sijn ander cleederen tot sijn swaert en sijnen boghe ende tot sijnen gordel toe.

5

Ende Dauid reysde wt tot alle dinghen daer hem Saul toe sondt, ende hy droech hem seer wijselijck, ende Saul stelde hem ouer die mannen van orloghen, ⁺ende hy was seer behaechlijck voor alle des volcs ooghen, besonder voor dat aensicht van Sauls dienaers.

+ B

6

Maer doen Dauid den Philistijn verslaghen hadde ende wederom quam, ende bracht sijn hooft in Ierusalem, soo ghinghen die vrouwen wt alle die steden van Israel, singhende ende tsamen dansende den coninck Saul te ghemoete, met tamboeren der blijscappen, ende met cromme hornkens.

7

Ende

[p. *235]

die vrouwen songhen voore, spelende, ende segghende, Saul heefter duysent verslaghen, ende Dauid thien duysent.

8

Ende Saul is bouen maten seer gram gheworden, ende dit woort mishaechde hem in sijn ooghen, ende hy seyde, Sij hebben Dauid thien duysent ghegheuen, ende my hebben sij duysent ghegeuen, Wat ghebreect hem meer, dan alleene tconincrijcke?

9

Hier om soo heeft Saul van dien dach ende voortaen Dauid met slimmen ooghen aensien.

10

⁺Maer nae den anderen dach soo heeft den quaden gheest Godts Saul oueruallen, ende hy propheteerde int midden van sijnen huyse. Maer Dauid speelde snaerspel met sijn hant ghelijck hy alle daghe pleech te doen. Ende Saul hielt een lancie,

+ C

11

ende schoot die meynende dat hy Dauid soude moghen aenden want speten, Ende Dauid wijcte die tweede reyse wt sijn aensichte.

12

Ende Saul vreesde Dauid, om dat die Heere met Dauid was, ende van hem ghesceyden was.

13

Daerom heeft hem Saul van hem ghedaen, ende hy heeft hem ghemaect een hooftman ouer duysent mannen, ende hy ghinck wt ende in voor des volcks aensichte,

14

Ende in alle sijn weghen soo dede Dauid seer wijselijck, ende die Heere was met hem.

15

⁺Aldus heeft Saul ghesien dat hy bouen maten seer voorsienich was, ende hy heeft hem begonst te wachten van Dauid,

+ D

16

Maer gheheel Israel ende Iuda beminde Dauid, want hy ghinck wt ende in voor hemlieden.

17

Ende Saul seyde tot Dauid, Siet daer is mijn outste dochter Merob, dese sal ic v tot eender huysvrouwe gheuen, alleenlijck weest een vroem man, ende strijdt die strijden des Heeren. Maer Saul dachte by hem seluen, segghende, Mijn hant en sij op hem niet, maer laet der Philistinen hant op hem sijn.

18

Maer Dauid heeft tot Saul gheseyt, Wie ben ick, oft hoedanich is mijn leuen, oft mijns vaders gheslachte in Israel, dat ick des conincks behoude sone soude worden?

19

⁺Ende den tijt is comen datmen Merob Sauls dochter soude hebben moeten Dauid gheuen, soo is sij Hadriel den Molathiter tot een huysvrouwe ghegheuen.

+ E

20

Maer Dauid beminde Michol Sauls tweede dochter, Ende dit is Saul te kennen ghegeuen, ende het heeft hem wel behaecht.

21

Ende Saul seyde, Ick sal hem die gheuen, op dat sij hem sij tot een struycsel om te vallen, ende dat der Philistijnen hant op hem comen mach. Ende Saul seyde tot Dauid, Door twee dinghen suldi heden mijn behoude sone sijn.

22

Ende Saul gheboodt sijnen knechten, Spreect met Dauid daer ict niet en hoore, segghende, Siet ghy behaecht den coninck wel, ende alle sijn knechten hebben v lief, Aldus dan soo weest des conincs behoude sone.

23

Ende Sauls knechten hebben ghesproken alle dese woorden in Dauids ooren. Ende Dauid seyde, ⁺Duncket v een cleyn dinck te wesen des conincs behoude sone te sijn? Aenghesien dat ic een arm man ben die niet veel en heeft.

+ F

24

Ende die knechten hebben Saul dit wederom te kennen ghegheuen segghende, Aldusdanighe woorden heeft Dauid gheseyt.

25

Doen seyde Saul, Aldus suldi tot Dauid spreken, Die coninck en behoeft gheen bruloft goet, anders dan hondert voorslofkens der manlijcheyt vanden Philistinen, datter wraeck mach ghedaen worden van des conincks vianden. Maer Saul die dachte Dauid te leueren inder Philistijnen handen.

26

Als nv sijn dienaers Dauid wederom ghebootscapt hadden die woorden die Saul ghesproken hadde, soo behaechde dit woordt in Dauids ooghen, dat hy des conincs behoude sone worden soude.

27

⁺Ende nae een luttel daghen is Dauid opstaende wech ghegaen metten mannen die onder hem waren, ende hy versloech twee hondert mannen vanden Philistinen, ende bracht die voorslofkens van haerlieder manlijcheyt, ende hy leuerde die den coninck by ghetale, op dat hy sijn behoude sone worden soude.

Hier om heeft hem Saul Michol sijn dochter tot eender huysvrouwen ghegheuen.

+ G

28

Ende Saul mercte ende verstont wel dat die Heere met Dauid was. Maer Michol Sauls dochter hadde hem seer lief.

29

Ende Saul begonst lanck soo meer Dauid te ontsien, ende Saul is Dauids viant gheworden tot allen daghen.

30

Ende die princen der Philistinen sijn wederom wtghetrocken, ende van tbeghinsel haerder wtcoemsten soo droech hem Dauid voorsienlijcker dan alle Sauls knechten, ende sijnen naem is bouen maten seer vermaert gheworden.