Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xvi. Capittel.

1

⁺ENde die Heere heeft tot Samuel gheseyt, Hoe langhe suldi Saul beweenen, aenghesien dat ic hem verworpen hebbe dat hy ouer Israel niet regneren en soude? Vult uwen horen met olie, ende coemt, dat ic v sende tot Isai den Bethlehemiter, want ic heb my versien van eenen coninc wt sijnen sonen.

+ A

2

Ende Samuel seyde, Hoe sal ic gaen? Want Saul sal dit hooren, ende my dooden. Ende die Heere seyde, Ghy sult een calf vanden grooten vee brenghen met uwer handt, ende ghy sult segghen, Ic ben comen om den Heere een slachofferande te dooden,

3

Ende ghy sult Isai tot die slachofferande nooden, ende ic sal v toonen wat ghy doen sult, ende ghy sult saluen den welcken ic v toonen sal.

4

Aldus heeft Samuel ghedaen ghelijc hem die Heere beuolen hadde, Ende hy is comen te Beth-lehem, ende die ouders vander stadt hebben hen verwondert, hem te ghemoet gaende, ende hebben gheseyt, Is v incoemst ooc vreedtsamich?

5

⁺Ende hy seyde, Hy is vreedtsamich, want ick ben comen om den Heere een slachofferande te doen, Heylicht v ende coemt met my, dat ick die offerande doen mach. Aldus soo heeft hy Isai ende sijn sonen gheheylicht, ende die tot dat sacrificie ghenoodt.

+ B

6

Ende als sy binnen comen waren, soo sach hy Eliab, ende seyde, Is nv voor den Heere sijnen ghesalfden?

7

Ende die Heere seyde tot Samuel, En aensiet sijn aensicht niet, noch die hoocheyt sijnder lingden, want ic heb hem verworpen, ende ick en ordeel niet nae der menschen ghesicht, want die mensche siet die dinghen die van buyten scijnen, maer die Heere doorsiet dat herte.

8

Ende Isai riep Abinadab, ende hy bracht dien voor Samuel, Ende hy seyde, desen en heeft die Heere ooc niet vercoren,

9

Maer Isai heeft Samma by hem bracht, Vanden welcken hy seyde, Desen en heeft die Heere ooc niet vercoren.

10

Aldus so heeft Isai sijn seuen sonen voor Samuel bracht, ende Samuel heeft tot Isai gheseyt, Die Heere en heeft gheen van desen vercoren.

11

Ende Samuel heeft gheseyt tot Isai, Sijn alle v sonen nv hier ghebracht? Ende Isai antwoorde, Daer is noch een cleyn knechtken achterbleuen, ende die voedt die scapen. Ende Samuel seyde tot Isai, ⁺Sendt, ende doet hem herwaerts brenghen, want wij en sullen ter maeltijt niet sitten gaen, voor dat die hier comen is.

+ C

12

Aldus soo heeft hy wtghesonden ende hem ghehaelt. Ende hi was rosachtich, schoon van opsien, ende weselijck van aensicht. Ende die Heere heeft gheseyt, Staet op, ende salft hem, want hy eest.

13

Hierom soo heeft Samuel den horn metter olien ghenomen, ende heeft hem ghesalft int midden van sijnen broeders. Ende den gheest des Heeren is ghesciet in Dauid, van dien dach ende voortaen. Ende Samuel is opghestaen, ende wech ghegaen nae Ramatha.

14

Maer den gheest des Heeren is van Saul ghesceyden, ende eenen quaden gheest vanden Heere quelde hem.

15

Ende Sauls dienaers seyden tot hem, Siet den quaden gheest Godts quelt v.

16

Onse Heere ghebiede, ende v knechten die voor v sijn, sullen eenen man soecken die met een harpe can spelen, op dat hy (als v den quaden gheest des Heeren ouercoemt) met sijnder hant spele, ende dat ghy dan te lichter moecht verdraghen.

17

Ende Saul seyde tot sijnen dienaers, Besorcht my dan iemant die wel spelen can, ende brengt dien by my.

18

Ende een vanden knechten antwoordende heeft gheseyt, ⁺Siet ic heb Isai des Beth-leemiters sone ghesien die wel spelen can, ende is seer sterck van machte, ende een strijdtbaer man, ende voorsienich van woorden, ende een schoon man, ende die Heere is met hem.

+ D

19

Daerom soo heeft Saul boden tot Isai ghsonden segghende Sendt tot my Dauid uwen sone die in die weyde is.

[p. *233]

20

Aldus soo nam Isai eenen ezel met broode gheladen, ende een flesche wijns, ende een boxken wt die gheyten, ende heeft dat door Dauids sijns soons hant tot Saul ghesonden.

21

Ende Dauid is by Saul comen, ende hy heeft voor hem ghestaen, ende hy heeft hem bouen maten seer lief ghehadt, ende is sijn wapendragher gheworden.

22

Ende Saul heeft tot Isai ghesonden, segghende, Laet Dauid voor mijn aensicht staen, want hy heeft gratie in mijn ooghen vonden.

23

Aldus soo wanneer den quaden gheest des Heeren Saul acnueerde, so nam Dauid sijn herpe, ende sloech die met sijnder hant, ende Saul worde daer door vermaect, ende verlichter mede, want den quaden gheest ghinck dan van hem.

[afbeelding]