Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xv. Capittel.

1

⁺ENde Samuel seyde tot Saul, Die Heere heeft my ghesonden dat ic v soude saluen tot eenen coninck ouer sijn volck van Israel, daer om hoort nv des Heeren stemme,

+ A

2

Dit seyt die Heere der heyrscaren, Ic heb ouerleyt alle dat Amalec Israel ghedaen heeft, hoe dat hy hem wederstont inden wech doen hy wt Egipten opwaerts quam.

3

Daerom gaet henen nv ende slaet Amalec, ende verderft alle dat hem toebehoirt, en spaert hem niet, noch en begheert van sijnen dinghen niet, Maer slaet doot vanden mans totten vrouwen, ende die cleyn kinderen metten suyghelinghen, ossen ende scapen, kemels ende ezels.

4

Aldus soo heeft Saul dit den volcke gheboden, ende hy heeftse ghetelt ghelijc lammeren, twee hondert duysent voetvolcs, ende thien duysent mannen van Iuda.

5

Ende als Saul totter stadt van Amalec comen was soo leyde hy laghen aen die beke.

6

Ende Saul seyde tot dat Cineus volck, ⁺Gaet wech, sceyt van hier, ende maect v wech verre van Amalec, dat ic v by auontueren met hem te samen niet en ouerualle, want ghy hebt bermherticheyt ghedaen met alle den kinderen van Israel als sij wt Egipten opquamen. Ende dat Cineus volck is vertrocken wt het midden van Amalec.

+ B

7

Ende Saul heeft Amalec gheslaghen van Heuila aen tot datmen coemt te Sur, welck is teghen ouer Egipten.

8

Ende hy heeft Agag den coninck van Amalec leuende gheuanghen, maer alle dat ghemeyn volc heeft hy dootgheslaghen met dat scerpe vanden sweerde.

9

Ende Saul metten volcke hebben Agag ghespaert ende die beste cudden van scapen, ende runderen, ende die cleederen, ende die rammen, met alle dat scoon was, ende sij en hebben die niet willen verderuen, maer wat snoode ende verworpen was, dat hebben sij verdoruen.

10

Doen is het woordt des Heeren tot Samuel ghesciet segghende,

11

⁺Het berout my dat ic Saul coninck ghestelt hebbe, want hy heeft my verlaten, ende mijn woorden en heeft hi metten wercken niet volbracht. Ende Samuel is bedroeft gheworden, ende hy heeft alle den nacht gheroepen totten Heere.

+ C

12

Ende als Samuel des nachts opghestaen was, dat hy des morghens vroech tot Saul tot Saul gaen soude, soo eest Samuel gheseyt, hoe dat Saul was comen opden berch Carmelus, ende dat hy hem seluen hadde opghericht eenen ouerwelfden boghe der triumphen, ende dat hy weder om ghekeert sijnde door ghegaen was, ende tot Galgala nederwaerts comen. Aldus soo is Samuel tot Saul comen, ende Saul offerde den Heere brantoffer vanden besten der roouen die hy van Amalec ghebracht hadde.

13

Ende als Samuel by Saul comen was soo heeft Saul tot hem gheseyt, Ghy sijt ghebenedijt den Heere, Ick heb des Heeren woordt volbrocht.

14

⁺Ende Samuel heeft gheseyt, Ende wat gheroep der cudden is dit dwelck daer gheluyt maect in mijn ooren, ende van dat groot vee, welck ick hoore?

+ D

15

Ende Saul seyde, Van Amalec hebben sij dese ghebracht, want het volck heeft die beste scapen ende runderen ghespaert, om datmen die den Heere uwen Godt offeren soude, maer alle dander hebben wi ghedoot.

16

Maer Samuel seyde tot Saul, Laet my gheworden ende ic sal v te kennen gheuen wat die Heere mi desen nacht gheseyt heeft. Ende hy seyde tot hem, Spreect.

17

Ende Samuel seyde, En eest niet alsoo, doen ghy cleyn waert in uwen ooghen, soo sijdi gheworden het hooft in die gheslachten van Israel? ende die Heere heeft v ghesalft tot eenen coninck ouer Israel

18

ende

[p. *232]

die Heere heeft v opden wech ghesonden, ende gheseyt, Gaet henen ende slaet doot die sondaers van Amalec, ende ghy sult teghen hen strijden tot dat ghy die alle ghedoot hebt.

19

Waerom en hebdi dan die stemme des Heeren niet ghehoort, maer sijt ghekeert totten roof, ende hebt quaet ghedaen in des Heeren ooghen?

20

⁺Ende Saul heeft tot Samuel gheseyt, Ic heb emmer die stemme des Heeren ghehoort, ende heb ghewandelt inden wech door den welcke my die Heere ghesonden heeft, ende ick heb Agag den coninck van Amalec met my bracht, ende het volck van Amalec verslaghen.

+ E

21

Maer het volc heeft vanden roof ghenomen scapen ende ossen, die beste van alle dat daer verslaghen is om die den Heere haren Gode te offeren in Galgala.

22

Ende Samuel seyde, Meynde ghy dat die Heere begheert brantofferen ende slachofferanden, ende niet veel meer datmen des Heeren stemme onderdanich sij, Want onderdanicheyt is beter dan slachofferanden, ende ghehoorsam sijn, is meer dan offeren dat vet van rammen,

23

Want ghelijck die sonde der toouerien is wederspannich sijn, ende als dat groot misdaet der afgoderien, is niet willen hooren. Daerom want ghy dat woort des Heeren verworpen hebt, soo heeft v die Heere oock verworpen, dat ghy gheen coninck wesen en sult.

24

Ende Saul heeft tot Samuel gheseyt Ic heb ghesondicht om dat ic des Heeren woort ende v woorden ouertreden hebbe, ontsiende het volck ende haerlieder stemmen onderdanich sijnde,

25

Maer nv bid ic v wilt mijn sonde draghen, ⁺ende keert met my wederom dat ic den Heere mach aenbidden.

+ F

26

Ende Samuel seyde tot Saul, Ick en sal met v niet wederom keeren, want ghy hebt dat woordt des Heeren verworpen, ende die Heere heeft v verworpen dat ghy gheen coninc ouer Israel sijn en soudt,

27

Ende Samuel keerde hem omme, dat hy wech ghaen soude, maer Saul greep dat opperste van sijnen mantel, dwelck is ghescoert.

28

Ende Samuel seyde tot hem, Die Heere heeft dat conincrijck van Israel van v ghescoert op desen dach, ende heeft dat uwen naesten ouergegheuen die beter is dan ghy,

29

Voorts soo en sal die triumpheerder in Israel niet sparen, noch hy en sal door gheen berou ghebuycht worden, want hi en is gheen mensche, dat hy hem soude laten berouwen.

30

Ende hy seyde, Ick heb ghesondicht, maer bewijst my nu eere voor die ouders mijns volcs, ende voor Israel, ⁺ende keert weder met my dat ick den Heere uwen Godt aenbidden mach.

+ G

31

Aldus soo is Samuel wederom ghegaen ende is Saul ghuolcht, ende Saul heeft den Heere aenbeden.

32

Ende Samuel seyde, Brengt tot my Agag den coninck van Amalec. Ende Agag is al beuende tot hem ghebracht seer vet, Ende Agag seyde, Sceyddi alsoo o bitter doot?

33

Ende Samuel seyde, Ghelijck v sweert die vrouwen heeft sonder kinderen ghemaect, alsoo sal v moeder onder die vrouwen oock sonder kinderen wesen. Ende Samuel heeft hem in stucken gheslaghen voor den Heere in Galgalis.

34

Doen is Samuel wech gheghaen te Ramatha, Maer Saul is opwaerts gegaen in sijn huys te Gabaa.

35

Ende Samuel en heeft Saul niet meer ghesien totten dach sijns doots toe, Maer nochtans beweende Samuel Saul om dat den Heere berouwen was dat hy Saul coninck hadde ghemaect ouer Israel.