Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xiij. Capittel.

1

⁺EEn kint van eenen iare was Saul doen hy begonst te regneren, ende twee iaren regneerde hi ouer Israel.

+ A

2

Ende Saul heeft voor hem ghecoren drij duysent mannen wt Israel, ende twee duysent wasser met Saul te Machmas ende opt gheberchte van Bethel, maer een duysent met Ionatha te Gabaa Beniamin, maer alle dat ander volck heeft hy laten gaen een ieghelijc in sijn tabernakel.

3

Ende Ionathas heeft der Philistijnen legher verslaghen die te Gabaa was. Dwelck als die Philistinen ghehoort hadden, soo heeft Saul met een trompet gheslaghen ouer alle dlant, segghende, Laet die Hebreusschen dit hooren.

4

Ende aldus heeft gheheel Israel alsulck gherucht ghehoort, Saul heeft der Philistinen legher der hoeden verslaghen, ende Israel heeft hem opghericht teghen die Philistinen, Daer om heeft dat volc nae Saul gheroepen te Galgala.

5

Ende die Philistinen sijn verghadert om te strijden teghen Israel, dertich duysent waghenen, ende ses duysent ruyters te peerde, ende ander ghemeyn volck ghelijck het sant dwelck is aenden oeuer der zee seer veel. Ende optreckende hebben sij haren legher ghemaect te Machmas aen die oostsijde van Beth-auen

6

⁺Dwelc als die kinderen van Israel ghesien hadden, dat sij in benautheyt gestelt waren (want het volc was seer verdruct) soo hebben sij hen seluen gheborghen in speluncken, ende in bedecte plaetsen in die steenrootsen, in die holen, ende in die waterputten.

+ B

7

Maer die Hebreusschen sijn ouer die Iordane ghetrocken int lant van Gad ende Galaad. Ende als Saul noch te Galgala was, soo is alle tvolck seer veruaert gheweest dat hem volchde.

8

Ende hy verbeyde seuen daghen, nae Samuels beliefte, ende Samuel en quam te Galgala niet, ende het volck is hem afgheuallen.

9

Daerom heeft Saul gheseyt, brengt my een brantofferande ende vreedofferanden, ende hy offerde een brantofferande.

10

Ende als hy voldaen hadde die heel brantofferande offerende, siet doen quam Samuel, ende Saul is hem te ghemoet ghegaen, dat hy hem soude groeten.

11

Ende Samuel heeft tot hem gheseyt, Wat hebdi ghemaeckt? Saul antwoorde, om dat ick sach dat het volck my afviel, ende dat ghy niet comen en waert nae die ghesette daghen, voorts soo waren die Philistinen vergadert te Machmas,

12

⁺doen seyde ic, Nv sullen die Philistinen tot my nederwaerts trecken te Galgala, ende ic en heb des Heeren aensicht niet versoent, aldus van noot bedwonghen sijnde, heb ic een brantofferande gheoffert.

+ C

13

Ende Samuel heeft tot Saul gheseyt, Ghy hebt dwaesselijck ghedaen, ende ghy en hebt des Heeren ws Gods gheboden niet ghehouden, die hy v gheboden heeft, want en haddi dit niet ghedaen, soo soude die Heere v rijck nv bereyt hebben ouer Israel tot inder eewicheyt,

14

Maer nv en sal v rijck gheenssins voorts meer opstaen. Die Heere heeft voor hem eenen man ghesocht nae sijn herte, ende die Heere heeft hem beuolen dat hy ouer sijn volck die prince soude sijn, om dat ghi niet onderhouden en hebt tghene dat die Heere beuolen heeft.

15

Aldus is Samuel opghestaen, ende van Galgala op ghegaen tot in Gabaa Ben-iamin Ende dat ander volck is nae Saul ghereyst den volcke te ghemoete die hen bestreden, comende van Galgala te Gabaa, op den hoeuele van Beniamin. Ende Saul heeft dat volc ghetelt dat daer by hem vonden was ontrent ses hondert mannen.

16

Ende Saul ende Ionathas sijn sone ende tvolck dat met hen gheuonden was, dat was in Gabaa Ben-iamin. Maer die philistijnen waren neder gheslaghen te Machmas.

17

⁺Ende daer sijn drij hoopen wt der Philistijnen legher ghetrocken om te strijden. Den eenen hoop reysde teghen den wech van Ephra nae dlant Sual.

+ D

18

Ende den anderen, reysde door den wech van Beth-horon. Maer den derden hoop hadde hem ghekeert nae den wech der palen int lant van Sabaa, welck gheleghen is bouen die valleye van Seboim, teghen die woestijne.

19

Maer men en vant doen gheenen ysersmit in alle dlant van Israel, Want die Philistinen hadden dat verhoedt, dat by auontueren die Hebreusschen niet en souden eenich sweert oft lancie maken.

20

Daerom ghinghen alle die van Israel nederwaerts tot die Philistinen om dat een ieghelijck scerpen soude sijn ploechcouter, ende sijn houweel ende sijn bijl, ende sijn gaffele.

21

Aldus waren al bot die scerpten vanden ploechcouteren ende houweelen ende gaffelen ende bijlen, oock totten steecijser te beteren.

22

Ende als den dach des strijts comen was, soo en isser noch sweert noch lancie gheuonden in die hant van alle den volcke dat met Saul ende Ionathas was, wtghenomen Saul, ende Ionathas sijn sone.

23

Ende der Philistijnen hoede is wtghetrocken om ouer te reysen te Machmas.