Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .xi. Capittel.

1

⁺ENde het is ghesciet bynaest nae een maent dat Naas die Ammoniter opwaerts comen is, ende heeft begonst te strijden teghen Iabes-Galaad. Ende alle die mannen van Iabes hebben gheseyt tot Naas, Hebt met ons een verbont, ende wij sullen v dienen.

+ A

2

Ende Naas die Ammoniter heeft hen gheantwoordt, Hier door sal ick mijn verbont met v maken, dat ick die rechte ooghen van v allen wtsteken sal, ende v lieden stellen tot een scande in gheheel Israel.

3

Ende die ouders van Iabes hebben tot hem gheseyt, Gheeft ons seuen daghen respijts, dat wij moghen boden wtsenden tot alle die palen van Israel, ende eest datter niemant en is die ons bescerme, soo sullen wij tot v wtcomen.

4

Hier om sijn die boden comen tot Sauls Gabaa, ende sij hebben dese woorden ghesproken daert volck dat hoorde, ⁺ende alle dat volck heeft sijn stemme opghehauen ende gheweent.

+ B

5

Ende siet Saul quam volghende die ossen vanden velde, ende hy seyde, Wat heeft dat volck dattet weent? Ende sij hebben hem vertelt die woorden der mannen van Iabes.

6

Ende die gheest des Heeren is in Saul ghespronghen, als hi dese woorden ghehoort hadde, ende sijnen toren is bouen maten seer gram gheworden.

7

Ende nemende beyde die ossen heeft hy die in stucken ghehouwen ende ghesonden door alle die palen van Israel door die handt der boden segghende, Soo wie niet wt en gaet, ende niet en volcht Saul ende Samuel, aldus sal sijnen ossen ghescieden. Hier om heeft die vreese des Heeren dat volck beuanghen, ende sij sijn wtghetrocken ghelijc een man.

8

⁺Ende hy heeftse ghetelt te Besec, ende der kinderen van Israel waren drij hondert duysent. Maer der mannen van Iuda waren dertich duysent.

+ C

9

Ende sij hebben gheseyt totten boden die daer comen waren, Aldus suldi segghen den mannen die te Iabes Galaad sijn, Morgen sal v salicheyt wesen, als die sonne sal werm gheworden sijn Aldus sijn die boden comen, ende hebben dat den mannen van Iabes ghebootschapt. Die welcke verblijt sijn gheweest,

10

Ende sy hebben gheseyt, Morghen sullen wi tot v comen ende ghy sult ons doen alle dat v belieuen sal.

11

Ende het is ghesciedt als den dach van morghen comen was dat Saul heeft dat volck ghestelt in drij deelen, ende hy is ghegaen int midden van den heyre in die morghenstont wake, ende hy heeft die van Ammon gheslaghen tot dat den dach werm worde. Maer die andere sijn al verstroyt, alsoo datter niet twee by een en bleuen.

12

⁺Ende het volck seyde tot Samuel, Wie is dese die gheseyt heeft, Saul en sal ouer ons niet regneren? Leuert die mannen, ende wi sullense dootslaen.

+ D

13

Ende Saul seyde, daer en sal niemant op desen dach ghedoot worden, want heden heeft die Heere in Israel salicheyt ghewrocht.

14

Maer Samuel heeft totten volcke gheseyt, Coemt ende laet ons gaen tot Galgala, ende daer het conincrijc vernieuwen.

15

Ende alle dat volck is ghegaen in Galgala, ende sij hebben Saul daer coninck ghemaect voor den Heere in Galgala, ende sij hebben daer vreed offeranden gheoffert voor den Heere. Ende Saul is daer vrolijck gheweest, ende alle die mannen van Israel bouen maten seer.