Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .x. Capittel.

1

⁺DOen nam Samuel een olie potken, ende storte dat wt op sijn hooft, ende hy heeft hem ghecust, ende gheseyt. Siet die Heere heeft v ghesalft ouer sijn erfdeel tot eenen prince, Ende ghy sult sijn volck verlossen wt sijnder vianden handen, die rontsomme hen sijn, Ende dit sal v voor een teeken wesen dat die Heere v tot eenen prince ghesalft heeft.

+ A

2

Als ghy heden van my sult ghegaen sijn, soo suldi twee mans vinden by Rachels graf in die wterste palen van Beniamin, in die suytsijde, ende die sullen v segghen. Die eselinnen sijn gheuonden, daerom dat ghy wtghegaen waert om die te soecken, ende v vader (die eselinnen nv ongheacht latende) is voor v besorcht, ende seyt. Wat sal ic van mijnen sone doen?

3

Ende als ghy van daer sult ghegaen sijn, ende voorts ghegaen ende ghecomen tot die eycke Thabor, daer sullen v vinden drij mannen opwaerts gaende totten Heere te Bethel, waer af die eene dragen sal drij ionghe boxkens, ende die ander drij coecken broots, ende de derde draghende een flessche wijns,

4

Ende als die v sullen groeten, soo sullen sij v twee brooden gheuen ende ghy sult die van haren handen nemen,

5

Daer nae suldi comen tot Gods hueuel, daer der Philisthijnen hoede is, ende als ghy daer in die stadt sult comen sijn, soo sal v eenen hoop propheten ontmoeten, nederwaerts comende van dat hoochste, ende voor hen sal gaen een psalterspel, ende een bomme ende een pijpe, ende harpe, ende sij sullen propheteren,

6

⁺Ende den gheest des Heeren sal haestelijck in v springhen, ende ghy sult met hen propheteren, ende verandert worden in eenen anderen man.

+ B

7

Hierom soo wanneer v alle dese teekenen sullen comen sijn, soo doet al wat v hant vinden sal, want die Heere is met v,

8

Ende ghy sult voor mi nederwaerts gaen tot Galgala (Want ic sal sekerlijc daer tot v nederwaerts comen) dat ghi moecht een offerande offeren ende vreedofferanden dooden seuen daghen lanck suldi verbeyden, tot dat ick by v come, ende v toone wat ghi doen moet,

9

Aldus doen hy sijn scouder omghekeert hadde dat hy van Samuel wech gaen soude, soo heeft hem Godt sijn herte verandert in een andere, ende alle dese teekenen sijn op dien dach ghecomen,

10

Ende sij sijn ghecomen totten voorseyden hoeuel, ende siet eenen hoop propheten is hem te ghemoet comen, ende den gheest des Heeren is op hem ghespronghen, ende hi heeft int midden van hemlieden ghepropheteert,

11

Ende als dit saghen alle die hem van ghisteren ende eerghisteren kenden, dat hy metten propheten was, ende propheteerde, soo seyden sij tot malcanderen. Wat dinck is den sone van Cis ghesciedt? Is Saul oock onder die propheten?

12

Ende sij antwoorden deen den anderen, segghende. Ende wie is sijn vader? ⁺Daerom is dat een ghemeyn segwoort gheworden. Is Saul oock onder die propheten?

+ C

13

Ende hy hiel op van propheteren, ende is ghecomen tot op die hoochde,

14

Ende Sauls oom sprack tot hem ende tot sijnen knecht. Waer sijdi henen ghegaen? Ende sij hebben gheantwoort. Die eselinnen soecken, ende als wi die niet en vonden, soo sijn wij comen by Samuel,

15

Ende sijn oom seyde tot hem. Segt my wat heeft v Samuel al gheseyt?

16

Ende Saul heeft tot sinen oom gheseyt. Hi seyde ons dat die eselinnen vonden waren, Maer van die redene des conincrijcks en heeft hy hem niet gheseyt wat Samuel tot hem ghesproken hadde,

17

Ende Samuel heeft dat volck tsamen gheroepen tot den Heere in Masphath

18

ende hy heeft gheseyt tot die kinderen van Israhel, Dit seyt die Heere die Godt van Israhel. Ic heb Israhel wt Egipten gheleyt, ende ic heb v lieden verlost wt die handen der Egiptenaren ende wt die hant van alle der coninghen die v verdructen,

19

Maer ghy hebt heden uwen God verworpen, die welcke alleen v verlost heeft van allen uwen quaden ende tribulacien, ende ghy hebt gheseyt. ⁺Gheensins, maer stelt eenen coninc ouer ons, Daerom staet nv voor den Heere nae v gheslachten ende nae v familien,

+ D

20

Ende Samuel heeft alle die gheslachten van Israhel voorts aen ghebrocht, ende het lot is ghevallen op dat gheslachte van Beniamin,

21

Ende hi heeft dat gheslachte van Beniamin aenghebracht by sijn familien ende daer is gheuallen die familie van Metri ende is ghecomen tot Saul Cis sone, Hierom hebben sij hem ghesocht, ende hy en is niet gheuonden,

22

Ende sij hebben nae desen van den Heere gheuraecht, oft hy daer oock comen soude, Ende die Heere heeft gheantwoort. Siet hy is thuys gheborghen,

23

Aldus sijn sij tsamen derwaerts gheloopen, ende hebben hem van daer ghehaelt, ende hy heeft int midden van den volcke ghestaen, ende hy was hoogher dan alle dat volck vanden schouderen opwaerts,

24

Ende Samuel seyde tot allen tvolck. Voorwaer ghy siet hem den welcken die Heere vercoren heeft, want

[p. *228]

daer niemant sijns ghelijck en is onder alle tvolck. Ende alle dat volck heeft gheroepen ende gheseyt, Die coninck moet leuen.

25

Ende Samuel heeft den volcke gheseyt die wet des conincrijcs, ende hy heeft dat in eenen boeck ghescreuen, ende voor den Heere opgheleyt, ende Samuel heeft alle dat volck laten gaen, eenen ieghelijcken in sijn huys.

26

Desghelijcs is Saul oock ghegaen in sijn huys te Gabaa, ende een deel van dat heyr is met hem ghegaen, der welcker herten Godt gheraect hadde.

27

Maer Belials kinderen hebben gheseyt, Sal ons dese moghen verlossen? Ende sij hebben hem versmaedt, ende sij en hebben hem gheen ghiften ghebracht. Maer hy veynsde hem als oft hy dat niet ghehoort en hadde.