Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ix. Capittel.

1

⁺ENde daer was een man van Beniamin Cis ghenaemt een sone van Abiel, des soons Seor, des soons Bechorath, des soons Aphia eens mans van Iemini sone, sterc van crachte,

+ A

2

Ende hi hadde eenen sone Saul ghenaemt, wtuercoren ende onder die kinderen van Israhel en was gheen man beter dan hy, vanden scouderen opwaerts was hy hoogher van lingden bouen alle tvolck,

3

Ende die eselinnen van Cis Sauls vader waren verloren, ende Cis seyde tot Saul sijnen sone. Neemt met v een vanden knechten ende opstaende gaet henen ende suect die eselinnen.

Ende als sij ouer dat gheberchte van Ephraim ghepasseert waren,

4

ende door het lantscap van Salisa, ende die niet vonden en hadden, soo sijn sij voorts ghegaen door dlant van Salim, ende sij en waren daer niet, Ende oock door het lant van Iemini, ende si en hebben die niet vonden,

5

Maer als sij comen waren int lant van Suph, soo seyde Saul tot den knecht die met hem was, Coemt ende laet ons wederom gaen dat by auontueren mijn vader die eselinnen niet en heb laten varen, ende sorchfuldich sij voor ons,

6

Die welcke seyde. Siet in dese stadt is een man Godts, een edel man al dat hy seyt dat coemt sonder twijfel, Daerom laet ons nu tot daer gaen, oft hy by auontuere mocht tbescheedt segghen van onser reysen, waer om dat wij comen sijn,

7

Ende Saul seyde tot sijnen knecht. Siet wi sullen daer gaen, maer wat sullen wi den man Godts draghen? ⁺Daer en is gheen broot meer in ons male, ende wij en hebben gheen ghiftken dat wij den man Godts ghauen, nocht yet anders,

+ B

8

Ende die knecht heeft wederom gheantwoort tot Saul ende gheseyt. Siet daer is noch een vierendeel van eenen silueren penninc in mijn hant vonden, laet ons dien den man Godts gheuen op dat hy ons tbescheedt van onser reysen wil segghen

9

(Hier voortijts pleech in Israhel een ieghelijc alsoo te segghen gaende om van Godt raet te halen) Coemt laet ons totten sienden gaen, Want diemen nu ter tijt noemt een propheet, dien noemde men hier voortijts een siende,

10

Ende Saul seyde tot sijnen knecht. V woort is dalder beste coemt laet ons gaen.

11

Ende sij sijn in die stadt ghegaen, daer die man Godts in was, Ende als si die hoochde vander stadt opghinghen, soo vonden sij ionghe dochters die wtwaerts ghinghen om water te sceppen, ende sij hebben tot die geseyt, Is die siender hier?

12

Die welcke antwoordende hebben geseyt, hi is hier, siet voor v, haest v nv, want hi is heden in die stadt comen, om dat tvolck heden een groote sacrificie te doen heeft op die hoochde,

13

Ende in die stadt comende suldy hem ter stont vinden, eer hy opwaerts op die hoochde ghaet om teten, Want het volck en sal niet eten voor dat hy comen sal, want hy sal die slachofferande ghebenedijden, ende dan sullen sij eten die daer gheroepen sijn, Daerom ghaet nv opwaerts, want ghy sult hem heden vinden,

14

Ende sij sijn op gheghaen in die stadt, Ende alssij wandelden int middel vander stadt, doen werde Samuel ghesien wtcomende hen te ghemoete, om te gaen opwaerts op die hoochde,

15

⁺Maer die Heere hadde Samuels oore open ghedaen eenen dach te voren eer Saul quam, segghende.

+ C

16

Morghen te deser seluer vren die nv is, sal ick eenen man tot v senden wt dat lant van Beniamin, ende ghy sult dien saluen tot eenen ouersten ouer mijn volck van Israhel, ende hy sal mijn volck verlossen wt der Philistijnen hant, want ic heb mijn volc aensien, want haerlieder gheroep is tot mi comen,

17

Ende als Samuel Saul aensien hadde, soo seyde die Heere tot hem. Siet daer den man dien ick v gheseyt hadde, dese sal heerscappie ouer mijn volck hebben,

18

Ende Saul quam bi Samuel int midden vander poorten, ende seyde. Ic bidde v segt my waer dat huys vanden siender is,

19

Ende Samuel antwoorde tot Saul, segghende. Ic ben die siender, gaet voor my op die hoochde, dat ghy heden met my etet, ende ick sal v morghen vroech laten gaen ende alle dat in v herte is sal ick v segghen,

20

Ende van die eselinnen die ghy eerghisteren verloren hebt, en wilt niet besorcht sijn, want sij sijn vonden, Ende wien sullen doch alle die beste dinghen van Israhel toebehooren? en sullen die v ende ws vaders huyse niet toebehooren?

21

Ende Saul antwoordende seyde. En ben ick niet een sone van Iemini vanden minsten geslachte van Israhel? ende en is mijn familie niet die alder laetste van allen die familien van Beniamins gheslachte? Waerom hebdi mi dan dese redene gheseyt?

22

⁺Aldus Samuel met hem nemende Saul ende sijnen knecht heeft die ghebracht in die eetplaetse, ende hy gaf hemlie

+ D

[p. *227]

den plaetse int opperste van alle die daer ghenoodt waren, want daer waren omtrent dertich mannen,

23

Ende Samuel seyde tot den cock. Gheeft dat stuck welck ick v ghegeuen hebbe, ende beuolen dat ghy dat by v op een sijde legghen soudt,

24

Aldus heeft die cock een scouder opghehauen, ende die gheleyt voor Saul, Ende Samuel seyde. Siet daer datter bleuen is, legget voor v, ende etet, want het is by voorsienicheyt voor v bewaert, als ick het volck ghenoodt hadde, Ende Saul heeft met Samuel gheten op dien dach,

25

Ende sij sijn weder af ghecomen van die hoochde, tot in die stadt, ende Samuel heeft met Saul ghesproken op den solder, ende hy bereydde Saul daer een plaetse om te slapen, ende hy heeft gheslapen,

26

Ende als sij des morghens opghestaen waren, ende dat nv claer dagh worde, soo riep Samuel Saul opden solder, seggende. Staet op dat ick v mach laten gaen, Ende Saul is opghestaen ende sij sijn beyde wtghegaen, te weten hy ende Samuel,

27

Ende als si nederwaerts ghinghen aen dat wterste deel vander stadt, soo seyde Samuel tot Saul. Segghet den knecht dat hy voor ons gae, ende door wech passere, maer blijft ghy hier een luttel tijts staende, dat ick v mach te kennen gheuen het woort des Heeren.

[afbeelding]