Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .viij. Capittel.

1

⁺ENde het is ghebuert doen Samuel out gheworden was dat hy sijn sonen maecte rechters van Israhel,

+ A

2

ende den naem van sijnen ierste gheboren sone was Ioel, ende den naem vanden tweeden was Abia, der rechteren in Bersabee,

3

Ende sijn sonen en wandelden in sijn weghen niet, maer sij wijcten af nae die ghiericheyt, ende ontfinghen ghiften, ende verkeerden dat recht.

4

Aldus alle die ouders van Israhel tsamen vergadert sijnde, quamen by Samuel in Ramatha,

5

Ende sij hebben tot hem ghseyt. Siet ghy sijt out gheworden, ende v sonen en wandelen in v weghen niet, Dus maect ons eenen coninck dat die ons ordeele, ghelijc alle ander natien van volc hebben,

6

Ende dese redene mishaechde in Samuels oogen, om dat si gheseyt hadden gheeft ons eenen coninck dat die ons ordeele, Ende Samuel heeft tot den Heere ghebeden,

7

⁺Ende die Heere heeft tot Samuel geseyt. Hoort na des volcs stemme in alle dat sij v seggen, want si en hebben v niet ver-

+ B

[p. *226]

worpen, maer mi, dat ick ouer hen niet regneren en soude, maer mi, dat ick ouer hen niet regneren en soude,

8

Nae allen hen wercken die sij ghedaen hebben van dien dach dat icse wt Egipten leyde tot op desen dach toe, ende ghelijck sij my verlaten hebben, ende hebben ghedient vreemde goden, alsoo doen sij v oock,

9

Daerom soo hoort nv hen stemme, Maer nochtans waerscouwet hen ende segget hen te voren des conincs recht, die ouer haer lieden regneren sal.

10

Aldus soo heeft Samuel alle des Heeren woorden ghesproken totten volcke die eenen coninck van hem begheert hadden,

11

ende hy seyde. ⁺Dit sal des conincs recht sijn, die ouer v lieden regneren sal, V sonen sal hi nemen ende stellen die in sijn waghenen, ende hy salse voor hem maken ruyters te peerde, ende voorloopers van sinen waghenen,

+ C

12

ende hy salse voor hem maken capiteynen ouer duysent mannen, ende ouer hondert mannen, ende ackerluyden van sijnen ackerlanden, ende coren maeyers, ende smeden van sijnen wapenen, ende waghen makers,

13

Ende uwe dochteren sal hy voor hem maken salfmakerssen, ende cokerssen, ende backerssen

14

Ende hy sal oock v beste ackerlanden ende wijngaerden, ende olijfgaerden nemen, ende gheuen die sijnen dienaers,

15

Oock sal hy v graen ende die iaerlijcksche vruchten van uwen wijngaerden verthienden, om te gheuen sijnen ghesneden camerlinghen ende knechten,

16

Ooc sal hy v knechten ende v dienstvrouwen, ende v fijnste ionghelinghen, ende v esels wech nemen, ende die in sijn werc stellen,

17

⁺v cudden sal hy oock verthienden ende ghi sult sijn slauen wesen,

+ D

18

Ende in dien dach sul di roepen van dat aensicht ws conincks den welcken ghy voor v lieden ghecoren hebt, ende die Heere en sal v op dien dach niet verhooren, om dat ghy eenen coninck begheert hebt voor v lieden,

19

Maer dat volc en heeft niet willen hooren nae Samuels stemme, maer sij seyden. Gheensins, want daer sal eenen coninc ouer ons sijn,

20

ende wij sullen oock wesen ghelijck alle die heydenen, ende ons coninck sal ons ordeelen, ende voor ons trecken, ende ons oorloghe voor ons strijden,

21

Ende Samuel heeft alle die woorden des volcs ghehoort, ende die ghesproken in die ooren des Heeren,

22

Maer die Heere heeft tot Samuel geseyt. Aenhoort hen stemme, ende stelt ouer hen eenen coninck Ende Samuel seyde tot die mannen van Israhel. Een yeghelijck gae in sijn stadt.