Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vij. Capittel.

1

⁺HIerom sijn die mannen van Cariath-iarim comen, ende hebben des Heeren arcke wederom ghebracht, ende die ghedraghen in Abinadabs huys te Gabaa, Ende Eleazar sijnen sonen hebben sij gheheylicht, om dat hy des Heeren arcke bewaren soude,

+ A

2

ende het is gheschiet vanden daghe dat des Heeren arcke tot Cariathiarim bleef dat ter veel daghen verliepen, want het was nv twintichste iaer, ende tgheheel huys van Israhel ruste nae den Heere,

3

Maer Samuel sprach tot dat gheheel huys van Israhel, segghende. Eest dat ghy met gheheelder herten tot den Heere wederkeert, so neemt wech alle vreemde goden wt dat midden van v lieden, Baalim ende Astharoth, ende bereyt v herten den Heere ende dient hem alleene, ende hi sal v verlossen wt der Philistijnen hant,

4

Aldus hebben die kinderen van Israhel Baalim ende Astharoth wech ghenomen, ende hebben den Heere alleen ghedient,

5

⁺Maer Samuel heeft gheseyt. Vergadert gheheel Israhel in Masphath, dat ick den Heere voor v mach bidden,

+ B

6

Ende sij sijn te Masphath vergadert, ende sij hebben water ghescept, ende dat ghegoten voor dat aensicht des Heeren, ende sij hebben op dien dach gheuast, ende aldaer gheseyt. Wij hebben den Heere ghesondicht Ende Samuel heeft die kinderen van Israhel recht ghedaen te Masphath.

7

Ende die Philistijnen hebben ghehoort, dat die kinderen van Israhel te Masphath vergadert waren, ende die vorsten der Philistijnen sijn opghetrocken tot Israhel, Als die kinderen van Israhel dat ghehoort hadden, soo hebben sij gheureest van der Philistijnen aensichte,

8

Ende sij hebben tot Samuel gheseyt. En wilt niet ophouden voor ons te roepen tot den Heere onsen Godt, dat hi ons verlosse wter Philistijnen hant,

9

⁺Maer Samuel heeft ghenomen een suyghende lammeken, ende dat gheoffert al gheheel den Heere tot eenen heelenbrantoffer, ende Samuel heeft totten Heere gheroepen voor Israhel, ende die Heere heeft hem verhoort.

+ C

10

Ende het is ghebuert die wijle dat Samuel dien heelenbrantoffer offerde, dat die Philistijnen begonsten te strijden teghen Israhel, Maer die Heere heeft ghedondert met eenen seer grooten donder op dien dach ouer die Philistijnen, ende hy heeftse veruaert ende sij sijn verslaghen van die kinderen van Israhel

11

Ende die mannen van Israhel wt Masphat gaende hebben die Philistijnen veruolcht, ende die verslaghen totter plaetsen die daer is beneden Bethchar,

12

Ende Samuel heeft eenen steen ghenomen, ende dien ghestelt tusschen Masphat ende tusschen Sen, ende heeft die plaetse ghenoemt den steen der helpen, Ende hy seyde. Tot hier toe heeft ons die Heere gheholpen

13

⁺Ende die Philistijnen sijn vernedert ende sij en hebben voorts daer niet meer toe ghedaen om te comen in die palen van Israhel, Aldus so is die hant des Heeren worden op die Philistijnen, alle die dagen van Samuel,

+ D

14

Ende die steden welck die Philistijnen Israhel afghenomen hadde, sijn Israhel wederom ghegeuen, van Accaron tot Geth toe, ende tot haren palen, ende die Heere heeft Israhel verlost wter Philistijnen hant, ende het was paeys tusschen Israhel ende die Amorrheen,

15

Ende Samuel ordeelde Israhel alle sijn leefdaghe lanck

16

ende hi reysde alle iare ghaende rontomme Bethel ende Galgala ende Masphath ende hi ordeelde Israhel in die voorseyde steden,

17

Ende hy keerde wederomme te Ramatha, want daer was sijn huys ende daer ordeelde hy Israhel, ende hy heeft daer den Heere ooc eenen outaer ghetimmert.