Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .vi. Capittel.

1

⁺ALdus was des Heeren arcke inder Philistijnen lant seuen maenden,

+ A

2

Ende die Philistijen hebben gheroepen die priesters ende waersegghers, seggende. Wat sullen wi van die arcke des Heeren doen? Segt ons hoe wij die moghen wederom tot haer plaetse senden, Die welcke hebben gheseyt.

3

Eest sake dat ghy die arcke des Godts van Israhel wederomme seyndt, soo en wilt die niet ydel laten wech gaen, maer betaelt haer dat ghy schuldich sijt voor die sonde, ende dan suldi ghenesen worden, ende ghi sult weten waerom dat sijn hant van v lieden niet en ghaet,

4

Die welcke hebben gheseyt. Wat eest dat wij hem voor ons misdaet betalen moeten? Ende sij hebben gheantwoort.

5

Nae dat ghetal der lantscappen vanden Philistijnen suldi maken vijf gulden billen, ende vijf gulden muysen, want ouer v ende ouer v vorsten alle te samen was een plaghe, Ende ghy sult maken die ghelijckenissen van uwen aersbillen, ⁺ende die ghelijckenissen vanden muysen die het lant bedoruen hebben, Ende ghy sult Israhels Godt glorie gheuen, oft hy by auontueren verlichte sijn hant van v lieden ende van v goden ende van v lant,

+ B

6

Waerom beswaerdi v herten ghelijck Egipten ende Pharao haer herten verswaert hebben, En heeftse Pharao dan niet laten gaen, ende en sijn sij niet wech ghereyst na dat hi gehslaghen was?

7

Hierom gaet toe, ende maect eenen nieuwen waghen ende neemt twee coeyen die ionghe calueren suyghen, den welcken noyt gareel opgheleyt en is, ende spant die aenden waghen te samen, ende sluyt haer calueren thuys,

8

Ende ghy sult die arcke des Heeren nemen, ende die opden waghen legghen ende die gulden iuweelen die ghi hem voor v misdaet hebt betaelt, suldi in een cofferken aen haer sijde stellen, ende laetse alsoo varen, datse wech gae

9

⁺Ende ghy sult toesien, ende by alsoo dat si door den wech van haren palen opwaerts gaet recht na Bethsames, so heeft hi ons dit groot quaet ghedaen, Maer eest sake dattet alsoo niet en ghebuert, soo sullen wij weten dat sijn hant ons gheensins gheraect en heeft maer dat dit by gheualle gheschiet is,

+ C

10

Hierom hebben sij in deser manieren ghedaen, ende nemende twee coeyen die calueren soochden, spanden sij die aen den waghen, ende haer calueren hebben sij thuys ghesloten,

11

ende sij stelden die arcke Godts opden waghen, ende dat cofferken dwelck hadde die gulden

[p. *225]

muysen ende die ghelijckenisse vanden aersbillen,

12

Ende die coeyen ghinghen al recht voorts door den wech die daer leyt nae Bethsames, ende sij ghinghen eenen wech voorts gaende ende loeyende, ende sij en wijcten ter sijden niet af ter rechter noch ter slincker hant, Ende die vorsten vanden Philistijnen volchden tot aen die palen van Bethsames,

13

Ende die Bethsamiters maeyden tarwe in die valleye, ende opheffende hen ooghen hebben sij die arcke ghesien, ende si waren blijde doen sij die saghen,

14

Ende den waghen is comen in Iosue des Bethsamiters acker, ende daer bleef hy staende, Ende daer was eenen grooten steen, ende sij hebben dat hout vanden waghen in stucken ghehouwen, ende leyden die coeyen daer op den Heere tot eenen heelenbrantoffer,

15

Maer die Leuiten namen die arcke af ende dat cofferken welck by haer was, daer die gulden iuweelen inne waren, ende stelden die opden grooten steen, Ende die mannen van Bethsames hebben heel brantofferanden gheoffert, ende hebben op dien dach den Heere slachofferanden ten offer ghedoodt

16

Ende die vijf vorsten van Philistijm hebbent aensien, ende sijn wederom ghekeert nae Accaron op dien dach,

17

Dit sijn die gulden aersbillen welc die Philistijnen den Heere betaelt hebben voor haerlieden misdaet, Azotus een, Gaza een, Ascalon een, Geth een, Accaron een

18

ende gulden muysen, nae dat ghetal vander Philistijnen steden der vijf verscheyden lantscappen van die bemuerde stadt aen, ⁺tot dat dorp welc sonder mueren was, ende tot groot Abel toe, daer sij die arcke des Heeren op ghestelt hadden, die tot dien daghen toe bleuen was op Iosue des Bethsamiters acker,

+ D

19

Maer hy heeft sommighe vanden Bethsamiters mannen gheslaghen, om dat si des Heeren arcke ghesien hadden, ende versloech vanden volcke tseuentich mannnen, ende vanden ghemeynen volcke vijftich duysent Ende het volck heeft seer rouwich gheweest, om dat die Heere het volc met die groote plaghe gheslagen hadde,

20

Ende die mannen van Bethsames seyden. Wie sal moghen staen voor daenschijn van desen Heere den heylighen Godt ende tot wien sal die van ons opwaerts trecken?

21

Ende sij hebben boden ghesonden tot die inghesetenen van Cariathiarim, seggende. Die Philistijnen hebben die arcke des Heeren wederom ghebracht, coemt af ende haeltse wederom tot uwaerts.