Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .v. Capittel.

1

⁺MAer die Philistijnen namen Gods arcke, ende droeghen die wech vanden steen der helpen tot in Azoten,

+ A

2

Ende die Philistijnen namen Gods arcke ende droeghen die in Dagons tempel, ende stelden die by Dagon,

3

Ende als die van Azoten des morgens vroech opghestaen waren, Siet soo lach Dagon plat neder ter aerden op sijn aensicht, voor des Heeren arcke, Ende sij namen Dagon, ende stelden hem weder in sijn plaetse,

4

Ende als sij des anderen daechs oock vroech weder opstonden, so vonden sij Dagon ligghende op sijn aensicht op die aerde voor des Heeren arcke, maer Dagons hooft, ende beyde die palmen van sijnen handen, waren afghesneden op den dorpel,

5

Maer Dagon den block alleen was bleuen in sijn plaetse, Om dese sake en terden die priesters van Dagon, ende alle die in sijnen tempel gaen op den dorpel van Dagon niet in Azoten tot opden dach van heden toe.

6

⁺Maer die hant des Heeren is swaer gheworden ouer die van Azoten, ende hy heeftse verdoruen, ende hy sloech die van Azoten ende alle die van haren palen in die verborghen plaetse der billen, Ende die dorpen ende die ackers wierpen op int midden des lants, ende daer sijn muysen voorts comen, ende daer is een bescaemtheyt van een groote sterfte afcomen in die stadt,

+ B

7

Ende die mannen van Azoten aldusdanighe plaghe siende seyden. En laet die arcke des Gods van Israhel by ons niet blijuen, want sijn hant is op ons verhart, ende op Dagon onsen Godt,

8

Ende sendende hebben sij vergadert alle die vorsten der Philistijnen tot henlieden ende hebben gheseyt. Wat sullen wi met dese arcke van Israhels Godt doen? Ende die van Geth hebben gheantwoort. ⁺Laet die arcke van Israhels Godt ommeghedraghen worden, Ende sij hebben die arcke van Israhels Godt omghedraghen,

+ C

9

Maer als sij die ommedroeghen, soo quam die hant des Heeren ouer alle die steden door een seer groote moort, ende sloech die mannen van elcker stadt vanden minsten totten meesten ende die eynden van haren eyndeldermen wtstekende verrotten, Ende die van Gech hebben eenen raet tsamen vonden ende hebben voor haerlieden stoelen van pelsen ghemaect,

10

Hierom soo hebben sij die arcke Godts ghesonden tot Accaron, Ende als die arcke Godts tot Accaron ghecomen was, soo hebben die Accaroniten seer gheroepen segghende. ⁺Sij hebben die arcke van Israhels Godt by ons ghebrocht, dat sij ons, ende ons volkc doot slaen soude,

+ D

11

Aldus soo hebben sij wt ghesonden ende vergadert alle die vorsten der Philistijnen die welcke hebben gheseyt. Laet die arcke van Israhels Godt gaen, ende laetse wederom keeren tot haer plaetse, dat si ons met onsen volcke niet doot en slae,

12

Want ouer alle die steden quam eenen grooten anxt vander doot ende een alderswaerste hant Godts, Ende die mans die niet gestoruen en waren, worden gheslaghen in die verborghen plaetse van haren billen, ende het ghecrijsch van ekcker stadt ghinck op totten hemel.