Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺ENde het is gheschiet in dien daghen dat die Philistijnen sijn vergadert ten strijde, Ende Israhel is den Philistijnen teghen ghegaen ten strijde, ende sij hebben haren legher ghemaect by den steen der helpen, Maer die Philistijnen quamen te Aphec,

+ A

2

ende sij stelden haer slachoorden teghen Israhel, Maer als den strijt begonnen was, soo hebben die van Israhel den Philistijnen den rugghe ghekeert ende in dien strijt sijnder verslaghen hier en daer op die velden, by nae vier duysent mannen,

3

Ende dat volck is wederom ghegaen tot die legheren, Ende die ouderen van Israhel seyden. Waerom heeft ons die Heere heden gheslaghen voor die Philistijnen, Laet ons halen by ons van Silo die arcke van dat verbont des Heeren, ende laet die comen int midden van ons, op dat sij ons mach verlossen wt onser vianden handen,

4

Hierom heeft dat volck te Silo ghesonden ende sij hebben van daer ghehaelt die arcke van tverbont des Heeren der heyrscaren, sittende op die Cherubims Ende die twee sonen van Heli waren metter arcken van dat verbont des Heeren, Ophni ende Phinees,

5

⁺Ende als die arcke des verbonts inden heyrlegher comen was, soo hebben alle die van Israhel gheroepen met eenen grooten roep, ende die aerde gaf gheluyt,

+ B

6

Ende die Philistijnen hoorden die stemme des gheroeps, ende sij seyden. Wat is doch dese stemme des grooten ghecrijschs inder hebreeusschen leghere? Ende sij hebben vernomen dat die arcke des Heeren inden legher comen was,

7

Ende die Philistijnen hebben gheureest segghende. God is inden legher comen, Ende si versuchten, segghende. Wee ons want soo grooten vrolijcheyt en heeft ghisteren ende eerghisteren niet gheweest,

8

Wee ons, Wie sal ons behouden wt die hant van desen hooghen goden? Dit sijn die goden die Egipten sloeghen met alderhande plaghen in die woestijne,

9

O ghi Philistijnen versterct v, ende weest mannen, op dat ghy den hebreeusschen niet en dient ghelijck sij ons ghedient hebben, hebt v vromelijck ende strijt.

10

Aldus soo hebben die Philisthijnen ghestreden ende Israhel wert verslaghen, ende een ieghelijc is gheuloden in sijn tabernakel, ende daer is een seer groote nederlaghe ghesciet, ende daer ysser van Israhel gheuallen dertich duysent mannen te vote,

11

Ende die arcke Godts is ghenomen, ⁺ende die twee sonen van Heli sijn oock ghestoruen Ophni ende Phinees,

+ C

12

Ende een man van Beniamin wten strijde loopende, is ghecomen te Silo op dien dach, met gheschoorden cleede, ende met aerde op sijn hooft ghespraeyt,

13

Ende als hy comen was, soo sadt Heli op een setel teghen den wech verbeydende, want sijn herte was beanxt voor die arcke Godts, Ende als die man binnen comen was, soo heeft hy der stadt dit te kennen ghegheuen, ende alle die stadt heeft iammerlijck ghehuylt,

14

Ende Heli heeft dat gheluyt des gheroeps ghehoort, ende hy heeft gheseyt. Wat is dit gheluyt van desen gheruchte? Ende die man is haestelijck ghecomen, ende heeft dit Heli gheboot-

[p. *224]

schapt,

15

Ende Heli was acht ende neghentich iaren oudt, ende sijn ooghen waren verduystert ende hy en mocht niet sien,

16

Ende hy seyde tot Heli. Ick ben die ghene die wten strijde ghecomen ben, ende ick ben die wt die slachoorden heden gheuloden ben, Totten welcken hy seyde. Wat ysser ghesciet mijn sone?

17

Ende die de bootscap brachte heeft gheantwoort. Israhel (seyt hy) is gheuloden voor die Philistijnen, ende daer is een groote nederlaghe ghesciet onder tvolck, ende daer toe soo sijn beyde v sonen oock doot, Ophni ende Phinees, ende die arcke Godts is ghenomen,

18

Ende als hy Godts arcke ghenoemt hadde, soo viel Heli van den setel achterwaerts ouer, by die dore, ⁺ende brekende sijnen hals is hy geghestoruen, Want het was een out man, die langhe gheleeft hadde, ende hi heeft Israhel gheordeelt veertich iaren lanck.

+ D

19

Maer sijn behoude dochter Phinees huysvrouwe, was beurucht, ende seer by den tijt van baren, ende die bootscap hoorende dat die arcke Godts ghenomen was, ende dat haren sweer ende haer man doot waren, soo heeft sij haer nedergheboocht ende ghebaert, want sij was oueruallen met haestighe ende onuersiende pijne,

20

Ende op die selue stonde van haer doot, soo seyden haer die vrouwen die bi haer stonden. En vreest niet, want ghy hebt eeenen sone ghebaert, Die welcke hem niet en antwoorde, noch en bemercte dat niet

21

Ende sij noemde dat kint Ichabod, segghende. Die glorie is wech ghenomen van Israhel, om dat die arcke Godts ghenomen is, Ende voor haers mans vader, ende voor haren man

22

seyde sij. Die glorie is van Israhel wech ghenomen, om dat die arcke God ghenomen was.