Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .ij. Capittel.

1

⁺MYn herte heeft hem verhuecht inden Heere, ende mijnen horn is verhoocht in mijnen Godt, mijnen mont is wijde gheopent ouer mijn vianden, want ick ben verblijt gheworden in u-

+ A

[p. *222]

wen salicheyt.

2

Daer en is niemant heylich ghelijck die Heere, want daer en is ooc gheen ander buyten v, Ende daer en is gheen sterck als onse Godt.

3

En wilt niet veel spreken hooghe dinghen v beroemende, laet die oude dinghen van uwen mont ghaen Want die Heere is die God der wetenheyt, ende hem worden die ghedachten bereydt.

4

Den boghe vanden stercken is verwonnen, ende die crancke sijn omgort met vromicheyt.

5

Die te voren versaedt waren hebben hem seluen om brooden verhuert, ende die hongherighe sijn versaet gheworden, tot dat die onuruchtbaer vrouwe veel kinderen baerde, ende die veel kinderen hadde cranck gheworden is.

6

⁺Die Heere slaet doot ende maect leuende, hi leydt tot inder hellen, ende brengt daer weder wt.

+ B

7

Die Heere maect arm, ende maect rijck, hi vernedert, ende verheft.

8

Hy verwect den behoeftighen wt dat stubbe der aerden, ende wt den dreck verheft hy den arme, dat hy sitten soude met die princen, ende den stoel der glorien houden, want die herren van eertrijck behooren den Heere toe, ende hy heeft die werelt daer op ghestelt.

9

Hy sal sijnder heylighen voeten bewaren, ende die boose sullen in die duysternissen tsamen swijghen, Want een man en sal door sijn eyghen sterckheyt niet machtich worden.

10

Den Heere sullen alle sijn vianden ontsien, op hen sal hy in die hemelen donderen, die Heere sal recht doen ouer alle die hoecken van aertrijcke, ende hi sal sijnen coninc die heerlijcheyt gheuen, ende hi sal verheffen den horn van sijnen ghesalfden.

11

⁺Ende Elcana is wech ghegaen te Ramatha in sijn huys, maer dat kint was een dienaer voor den Heere, voor dat aensicht des priesters Heli,

+ C

12

Maer die sonen van Heli waren Belials kinderen, die den Heere niet en kenden,

13

noch ooc den dienst der priesteren totten volcke, Maer als daer iemant een slachofferande offerde, so quam des priesters knecht die wijle dat men het vleesch coecte ende hy hadde een crauwelken met drij tacken in sijn hant,

14

ende dat stack hy inden metalen pot, oft inden ketel, oft inden aerden pot, oft in die teyle, ende als dat hi met dat crauwelken opbracht dat nam die priester voor hem, ende alsoo deden sij alle die van Israhel der gheender die te Silo quamen,

15

Desghelijcs oock eer sij tvet des inghewandts ontsteken hadden, soo quam des priesters knecht, ende seyde den ghenen die sijn offerande doodde. Gheeft mi vleesch dat ict voor den priester mach coken, want ick en sal van v gheen ghecooct vleesch ontfanghen, maer rou

16

⁺Ende die ghene die sijn offerande sloech seyde tot hem laet dat vet des inghewants heden ierstmael ontsteken worden nae die ghewoonlijcke maniere, ende dan neemt voor v alsoo vele als v ziele begheert, Ende hy antwoorde ende seyde tot hem. Ten sal soo gheensins sijn, maer ghi sullet my nv gheuen, oft anders ick salt met ghewelt nemen,

+ D

17

Aldus soo was die sonde der kinderen bouen maten seer groot voor den Heere, want die menschen versmaedden dat sacrificie des Heeren,

18

Maer Samuel diende voor dat aensicht des Heeren, een kint omgort met eenen lijnen Ephod,

19

Ende sijn moeder maecte hem eenen cleynen rock, den welcken sij bracht ten ghesetten daghen, als sij opwaerts quam met haren man om die feestelijcke offerande te offeren,

20

Ende Heli ghebenedijde Elcana, ende sijn huysvrouwe, ende sij seyde tot hem. Die Heere moet v saet wederom gheuen van deser vrouwen, voor tghewin, dwelcke ghi den Heere gheleent hebt, Ende sij sijn wederom ghegaen tot haer woonstede,

21

Hierom heeft die Heere Annam besocht, ⁺ende sij heeft ontfanghen ende ghebaert drij sonen ende twee dochteren, Ende dat kint Samuel is groot gheworden by den Heere,

+ E

22

Maer Heli was seer oudt, ende hi heeft ghehoort alle die dinhgen die sijn sonen deden alle den volcke van Israhel, ende hoe dat sij sliepen by die vrouwen, die wake hielden aen die dore des tabernakels,

23

ende hy seyde tot hen. Waerom doedi alsulcken dinghen, seer quade dinghen die ick hoore van alle den volcke?

24

En wilt soo niet doen mijn kinderen, want ten is gheen goet gherucht dat ick hoore, dat ghy tvolck des Heeren doet ouertreden,

25

Eest sake dat een man tseghen eenen man misdoet, soo mach hem Godt versoent worden, Maer eest sake dat een man teghen den Heere misdoet, wie sal voor hem bidden? Ende sij en hebben naer haers vaders stemme niet ghehoort, want die Heere wildese dooden,

26

Maer dat kint Samuel nam toe ende wies, ende behaechde soo wel Gode, als den menschen.

27

⁺Maer daer is een man Godts ghecomen tot Heli, ende heeft tot hem gheseyt. Dit seyt die Heere, En ben ick niet openlijc vertoont gheweest den huyse ws vaders, als sij in Egipten waren in Pharaos huys?

+ F

28

Ende ick heb hem vercoren wt alle die gheslachten van Israhel voor my tot eenen priester, dat hi opgaen soude tot mijnen outaer, ende dat hi mi die welriekende offerande ontsteken soude, ende dat Ephod voor my draghen, ende ict hebt ws vaders huyse al ghegheuen vanden sacrificien der kinderen van Israhel,

29

Waerom hebdi mijn slachofferande metten verssenen wech ghestooten, ende mijn ghiften, waer af ick gheboden hebbe datmen die inden tempel offeren soude, ende hebt v sonen meer gheeert dan my, om dat ghy eten soudt die beste gauen van allen den sacrificien mijns volcs Israhel.

30

Daerom soo seyt die Heere die Godt van Israhel. Ic heb sprekende gheseyt, dat v huys ende ws vaders huys voor mijn aenschijn dienen souden inder eewicheyt, Maer nv seyt die Heere, verre sij dat van my, Ende soo wie my eere bewijset, dien sal ick glorificeren, maer die my versmaden die sullen onedel wesen,

31

⁺Siet die daghen comen ende ick sal uwen arm afsnijden, ende den arm van ws vaders huys, alsoo datter gheen out man in v huys en sij,

+ G

32

Ende ghy sult uwen benijder sien inden tempel in alle die voorspoedicheden van Israhel, ende daer en gheen oudt man in v huys wesen tot allen daghen,

33

Maer nochtans en sal ick niet alle man van uwen gheslachte wech nemen van mijnen outaer, maer om dat v ooghen moghen vergaen, ende v ziele verdwijnen, ende een groot deel van uwen huyse sal steruen, als sij sullen comen sijn tot die mannelijcke ouderdom,

34

Ende dat sal v voor een teeken wesen dat uwen twee sonen toecomen sal Ophni ende Phinees, Op eenen dach sullen sij beyde steruen,

35

Ende ick sal voor my verwecken eenen ghetrouwen priester, die nae mijn herte ende nae mijn ziele doen sal, Ende ick sal hem een ghetrouwe huys timmeren, ende hy sal voor mijnen ghesalfden wandelen tot allen daghen,

36

Maer het sal noch comen, dat soo wie van uwen huyse sal ouerbleuen sijn die sal comen, om datmen voor hem bidden soude, ende dat hy eenen silueren penninck offere, ende eenen wronghel

[p. *223]

broots, ende segghe. Ick bidde v laet my comen tot een priesterlijc deel, op dat ick een montuolle broots eten mach.