Den gheheelen Bybel, Inhoudende het oude ende nieuwe Testament (Leuvense bijbel 1548)

1

⁺DAER was een man van Ramathaim-sophim, wt dat gheberchte van Ephraim ende sijnen naem was Elcana Ierohams sone, die een sone was van Eliu, des soons Thohu, des soons Suph, een Ephratijter

+ A

2

ende hy hadde twee huysvrouwen den naem der eender was Anna, ende den naem der ander Phenenna, Ende Phenenna hadde kinderen, maer Anna en hadde gheen kinderen,

3

Ende die man ginc opwaerts van sijnder stadt ten ghesetten dagen om den Heere der heyrscharen te aenbidden ende hem sacrificie te doen in Silo, maer daer waren doen priesters des Heeren twee sonen van Heli, Ophni ende Phinees.

4

Aldus so is den dach ghecomen ende Helcana heeft sijn slachofferande ghedaen, Ende hi gaf Phenenne sijnder huysvrouwen ende allen haer sonen ende dochteren deelen,

5

Maer Anna gaf hy een deel droef sijnde, want hy hadde Annam lief, Maer die Heere hadde haer lichaem besloten,

6

Ende haer benijdersse quelde haer, ⁺ende verdructese seer machtelijck, alsoo seere dat sij haer ooc verweet dat die Heere haren lichaem besloten hadde,

+ B

7

ende alsoo dede sij alle iaere, als sij naet verloop des tijts opwaerts trocken totten tempel des Heeren, ende aldus creytte si haer, Maer Anna die weende, ende sij en adt niet.

8

Hierom heeft Elcana haer man tot haer gheseyt. Anna waerom weendy? ende waerom en eedt ghy niet? ende waerom wort v herte bedruct? en ben ick v niet beter dan thien sonen?

9

Maer Anna is opghestaen nae dat sij ghegeten ende gedroncken hadde te Silo, Ende die wijle dat Heli die priester op sijnen stoel sadt voor die doorstijlen van des Heeren huys,

10

doen Anna bitter van herten was, soo heeft sij totten Heere ghebeden oueruloedelijck weenende,

11

ende een ghelofte ghelooft, seggende. O Heere der heyrscaren, eest dat ghi aensiende siet dat verdriet van uwer dienstvrouwen, ende dat ghy mijnder ghedachtich weest, ende uwe dienstvrouwe niet en vergetet, ende uwer dienerssen gheuet een mannelijcke vrucht, soo sal ick dien den Heere gheuen alle die dagen sijns leuen, ende gheen scheere en sal op sijn hooft comen,

12

Ende het is ghesciet (doen si haer ghebedt langhe maecte voor den Heere) dat Heli haren mont waernam,

13

Maer Anna die sprac in haer herte, ende haer lippen die worden alleenlijck gheroert, maer haer stemme en hoordemen niet.

⁺Aldus soo meynde Heli dat sij droncken hadde geweest,

+ C

14

ende hi seyde tot haer. Hoe langhe suldi noch droncken sijn? Vernuchtert v een luttelken van den wijn daer ghy droncken af sijt,

15

Anna antwoorde ende seyde. Ten is alsoo niet mijn Heere, Maer ic ben een alte seer onsalighe vrouwe, ende ick en hebbe gheenen wijn ghedroncken oft eenighen stercken dranck die droncken maken mach, Maer ick heb mijn ziele wtghestort voor dat aenschijn des Heeren,

16

En wilt v dienersse niet achten als een van Belials dochteren want wt die menichfuldicheyt van mijnen rouwe ende bedroeftheyt heb ick ghesproken tot nv toe,

17

Doen seyde Heli tot haer. Gaet in vreden, ende Godt van Israhel wil v gheuen v begheerte, daer ghy hem om ghebeden hebt,

18

Ende sij seyde. Och oft v dienstvrouwe mocht gratie vinden voor v ooghen, Ende die vrouwe is haren wech henen ghegaen, ende sij heeft gheten, ende haer aensicht en is niet meer verandert gheweest in versceyden ghedaenten,

19

Ende si sijn des morghens vroech opghestaen, ende hebben aenghebeden voor den Heere, ende sijn wederom ghekeert ende tot haren huyse ghecomen te Ramatha, Ende Elcana heeft Anna sijn huysvrouwe bekent, ende die Heere heeft haers ghedachtich gheweest,

20

ende het is ghesciet nae eenen omloop van dagen dat Anna heeft ontfanghen ende ghebaert eenen sone, ende sij heeft hem ghenoemt Samuel, om dat sij hem vanden Heere begheert hadde.

21

⁺Ende Elcana haer man met alle sijnen huysghesin is opwaerts ghetrocken, dat hy den Heere een feestelijcke offerande offeren soude, ende sijn belofte,

+ D

22

ende Anna en is niet mede opwaerts ghetrocken, want sij seyde tot haren man. Ick en sal niet ghaen tot dat het kint ghespeent sij, ende dat ict mach leyden, dat mach vertoont worden voor daenschijn des Heeren, ende daer eewelijc blijuen,

23

Ende Elcana haer man seyde tot haer. Doet dat v goet dunct, ende verbeyt tot dat ghy hem ghespeent hebt, ende ick bidde dat die Heere sijn woort wil volbrenghen. Aldus is die vrouwe thuys bleuen, ende sij heeft haren sone ghesoocht tot dat sij hem vanden melck speende,

24

Ende sij bracht hem met haer nae dien dat sij hem ghespeent hadde, met drij calueren ende drij vaten meels, ende een cruycke wijns, ende sij bracht hem totten huyse des Heeren te Silo, Maer dat kint was noch een seer ionck kindeken,

25

ende sij hebben een calf gheoffert, ende dat knechtken voor Heli ghebracht,

26

Ende Anna seyde. Ick bidde v mijn Heere alsoo warachtelijck als v ziele leeft Heere, ick ben die vrouwe die hier voor v ghestaen hebbe, den Heere biddende.

27

Om dit kint heb ick ghebeden, ende die Heere heeft my ghegheuen mijn begheerte, daer ick hem om badt,

28

Ende daerom heb ick dit kint den Heere tot sijnen dienst toeghescict, alle die daghen dat hy den Heere oorbaerlijck sijn sal, Ende sij hebben aldaer den Heere aenghebeden, Ende Anna heeft ghebeden ende gheseyt.