Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iij. Capittel.

1

⁺MAer nae dat sij wedercomen was by haers mans moeder soo hoorde sij van haer. Mijn dochter ick sal ruste voor v suecken, ende ick sal v voorsien dat v sal moghen wel sijn,

+ A

2

Dese Booz met wiens dienstmaechden ghy opt velt versaemt sijt is onse naemaesscap ende desen nacht wannet hy sijn wtghedorsschen gherste.

3

Hierom soo wascht v, ende salft v, ende doet v cierlijcste cleederen aen, ende gaet nederwaerts tot den dorschuloer, gheen mensch en sie v tot dat hy al ghegheten ende ghedroncken heeft,

4

Maer als hy sal slapen ghegaen sijn, soo slaet ghade die plaetse daer hy slaept, ende ghy sult comen ende ontdecken den mantel daer hy mede ghedect is aen dat eynde vanden voeten, ende ghi sult v nederlegghen, ende daer ligghen, ende hy sal v segghen wat ghy doen moet

5

⁺Die welcke antwoorde. Al wat ghy mi ghebiedt dat sal ick doen,

+ B

6

Ende sij is nederwaerts ghegaen inden dorschuloer, ende heuet al ghedaen dat haers mans moeder haer beuolen hadde.

7

Als Booz nv gheten ende ghedroncken hadde, ende verhuecht was, ende ghegaen was om te slapen by den hoop der schoouen, soo quam sij bedectelijck, ende als si den mantel aen sijn voeten opgheslagen hadde soo heeft sij haer daer neder gheworpen,

8

Ende siet nv inder middernacht, soo verscricte hem die man, ende was verbaest, ende hy heeft ghesien een vrouwe ligghende aen sijn voeten,

9

ende hy seyde tot haer. Wie sijdi? Ende si antwoorde. Ic ben Ruth v dienstvrouwe, spraeyt uwen mantel wt op v dienstvrouwe, want ghy sijt ons maesscap,

10

Ende hy seyde. Dochter ghebenedijt sijdi vanden Heere, ende ghy hebt die ierste barmherticheyt met de laetste te bouen ghegaen want ghy gheen ionghelingen gheuolcht en sijt, tsij arme oft rijcke,

11

Daerom so en wilt niet vreesen, maer wat ghy my segghen sult dat sal ick doen, Want alle het volck dat binnen mijnder stadtpoorten woont, ⁺weet wel dat ghy een duechdelijcke vrouwe sijt,

+ C

12

Ende ick en loochen niet dat ick maesscap ben, maer daer is

[p. *220]

een andere die naerder is dan ick,

13

Rust desen nacht, ende alst morghen gheworden sal sijn, eest dat hy v behouden wilt nae maesscaps recht, soo is die sake wel vergaen, maer eest dat hijt niet en wilt, soo sal ic v sonder eenigen twijfel ontfanghen, alsoo warachtelijck als die Heere leeft, slaept tot den morgenstont

14

Hierom heeft sij by sijn voeten gheslapen, tot dat den nacht ouer was.

⁺Aldus is si opghestaen eer die menschen malcanderen kennen mochten, ende Booz seyde. Wacht dat niemant en wete dat ghy hier ghecomen sijt,

+ D

15

Ende wederom. Spraeyt (seyt hy) uwen mantel breedt wt daer ghy mede bedect sijt, ende houdt dien met beyde uwe handen, Ende als sij dien wtspraeyde ende hiel soo heeft hy ghemeten ses maten gherste, ende haer die opgheleyt, Die welcke dragende is sij in die stadt ghegaen,

16

ende ghecomen by haers mans moeder, Die welcke heeft tot haer gheseyt. Wat hebdy ghedaen dochter? Ende sij vertelde haer alle dat die man haer ghedaen hadde,

17

Ende sij seyde. Siet hy heeft mi ses maten ghersten ghegeuen, ende heeft gheseyt. Ick en wil niet dat ghy ydel sult wederom gaen tot ws mans moeder,

18

Ende Noemi seyde. Dochter verbeyt tot dat wij sien moghen hoe dit dinck eynden sal, want dese man en sal niet ophouden voor dat hy volbracht sal hebben tghene dat hy ghesproken heeft.