Den gheheelen Bybel, Inhoudende het oude ende nieuwe Testament (Leuvense bijbel 1548)

Dat .iiij. Capittel.

1

⁺HIerom is Booz opwaerts ter poorten ghegaen, ende heeft daer gheseten, Ende doen hi den naesten vanden bloede sach voorbi gaen daer te voren af gheseyt is, seyde tot hem. Coemt besijden een luttelken, ende sidt hier, noemende hem met sijnen naem, die welcke is besijden ghegaen ende heeft gheseten,

+ A

2

Ende Booz nemende thien mannen vanden ouders der stadt seyde tot henlieden. Sidt hier,

3

Ende als die gheseten waren, soo heeft hy gheseyt totten naesten vanden bloede. Noemi sal vercoopen een stuck vanden acker ons broeders Elimelech, die wederom comen is wt der Moabiten lantscap

4

het welc ick wilde dat ghi hooren soudt, ende dat ic v dit segghen soude voor alle die hier sittende sijn, ende die outste van mijnen volcke, die hier by sitten. Eest dat ghi dien wilt besitten nae trecht des maesscaps soo coopten ende besidten, Maer eest sake dat v dit selue mishaecht soo gheeft my dat te kennen, op dat ick weten mach wat my te doen staet, Want daer en is gheen na maesscap sonder v die de naeste sijt, ende ic die de tweede ben ⁺Ende hy heeft gheantwoort. Ick sal den acker coopen,

+ B

5

Doen seyde Booz tot hem. Als ghy den acker wter hant vander vrouwen sult ghecocht hebben, so sijdi sculdich tot een huysvrouwe te nemen Ruth die Moabitinne welck die huysvrouwe is des ghestoruens, op dat ghy moecht verwecken ws naesten naem in sijn erfdeel,

6

Die welcke antwoorde. Ick sceyde van dat recht des maesscaps, Want ick en behoore die naecomelingen van mijnder familien niet heel te niete te doene, Ghebruyct ghy mijn priuilegie, dwelck ick belijde dat ickt gheerne derue,

7

Ende dit was van oudts een ghewoonte in Israhel tusschen die naesten van eenen bloede, dat soo wanneer die eene den anderen sijn recht ouergaf op dat sulck ouergheuen vast wesen soude, soo ontbant sulck mensch sijnen schoen ende gaf dien sijnen naesten maesscap, dat was een ghetuyghenisse vanden afsceyden in Israhel.

8

Hierom soo heeft Booz gheseyt tot sijnen naesten. Doet uwen scoen wt, ende hy ontbont sijnen scoen terstont van sijnen voet,

9

Ende Booz seyde tot die ouders ende tot alle dat volck, ⁺Ghy sijt heden ghetuyghen, dat ick beseten hebbe, alle dat toe behoort heeft Elimelech, ende Chelion, ende Mahalon het welck Noemi my ouergheeft,

+ C

10

ende dat ick Ruth die Moabitinne Mahalons huysvrouwe ten houwelijcke ghenomen hebbe, op dat ick des ghestoruens naem mach verwecken in sijn erfdeel, op dat sijnen naem niet en vergae wt sijnder familien, ende wt sijnen broeders ende sijnen volcke. Hier af (seg ick) sijdi ghetuyghen

11

Ende alle het volck dat in die poorte was, ende die ouders hebben gheantwoort. Wij ghetuygent, Die Heere make dese vrouwe (die in v huys coemt) ghelijck Rachel ende Lia waren, die het huys van Israhel opghesticht hebben, op dat sij mach wesen eenen spiegel der duecht in Ephrata, ende dat si mach hebben eenen eerlijcken vermaerden naem in Bethlehem,

12

ende dat v huys van den sade dat v die Heere gheuen sal van deser iongher vrouwen mach worden ghelijck dat huys Phares den welcken Thamar Iude baerde,

13

Hierom heeft Booz Ruth ghenomen ende heeftse ghetrout tot eender huysvrouwen, ende heeft hem met haer versaemt, ende die Heere heeft haer verleent dat sij ontfinck ende baerde eenen sone,

14

Ende die vrouwen hebben gheseyt tot Noemi. ⁺Ghebenedijt sij die Heere die niet en heeft ghedoocht dat die naecomelinghen van uwer familien vergaen souden, ende op dat sijnen naem in Israhel niet vergaen en soude,

+ D

15

ende dat ghy hebben soudt eenen die v ziele vertroosten soude, ende v ouderdom op voeden, want van v behoude dochter is hy gheboren die v lief hebben sal, ende dese is v veel beter dan oft ghy seuen sonen hadt,

16

Ende Noemi dat kint ontfanghende heuet in haren schoodt gheleydt, ende was hem in die plaetse van een voestere ende draghersse,

17

Ende die vrouwen haer ghebuerinnen (met haer blijde sijnde ende segghende. Noemi is eenen sone gheboren) hebben sijnen naem ghenoemt Obed, dit is die vader van Isai des vaders van Dauid,

18

Dit sijn die generatien van Phares, Phares heeft ghewonnen Esron,

19

Esron heeft ghewonnen Aram, Aram heeft ghewonnen Aminadab,

20

Aminadab heeft ghewonnen Nahasson, Nahasson heeft ghewonnen Salmon,

21

Salmon heeft ghewonnen Booz, Booz heeft ghewonnen Obed,

22

Obed heeft ghewonnen Isai, Isai heeft ghewonnen David.

Hier voleyndt dat boeck van Ruth.